Kujombolola 4 - Livulu lya Shukulu Kalunga

Kulemesa kwa vaje vali mwilu

¹ Munima yevi njakele na cimona cikwavo, co njamwene cikolo cakushokoloka mwilu. Co lijwi lya cililimo lyakulifwa ngwe lupembo, lijwi lije njazivile lyendekele kuli yange akulivanga, lyendekele ngwalyo, “Ija kuno kwilu, co njikakumwesa vyuma vikasholoka munima yevi.”

² Co aje vene njakele mu Munzinzime. Muje mwilu, njamwene litanda na uje watumbameneo.

³ Cihanga cendi califwile ngwe mamanya a seo a njasipa na kanelya, co ku litanda kwoshe-ikwoshe kwazengelekele nkongolo yalifwile ngwe limanya lya emalinde.

⁴ Co ku litanda lije kwazengelekele matanda akwavo makumi avali na matanda awana aje avatumbamene vakulunu makumi avali na vakulunu vawana vazalele vuzalo vwakutoka, co vazalele vilongo vya ngolinde ku mitwe yavo.

⁵ Co ku litanda lije kwatundile vyeke vya muhyato, na cililimo nakuluma kwakushwakumo. Co vyeke vya mitetango itanu na ivali vyakele nakushukuma kulutwe lwa litanda, eyi inapu minzinzime itanu na ivali ya Njambi.

⁶ Co lalo kulutwe lwa litanda lije kwakele mema a kalunga akulifwa ngwe kalikengelo kakutungukwa ngwe kilisitale. Co ku mutambela umo na umo wa litanda, kwazengelekele vikashama vawana vakuyoya vakele na mesho kulutwe na kunima.

⁷ Cikashama wakulivanga walifwile ngwe ndumba, wamucivali walifwile ngwe muna ngombe, wamucitatu wakele na cihanga ngwe ca munu, co wamuciwana walifwile ngwe ngonga wakupulula.

⁸ Umo na umo wa vaje vikashama vawana vakuyoya wakele na mambava atanu na limo, co oshe akele na mesho, mukati na anja. Vakevo kuvalikelele kwimba vutsiki na mutanya ngwavo, “Wakujela, wakujela, wakujela, ikeye Shukulu Kalunga Njambi Muka-nzili yoshe, uje wakeleko, uje aliko, na uje akaija.”

⁹ Vaje vikashama vawana vakuyoya vaimba myaso ya vumpau na kasingimiko nakukandelela kuli uje natumbama a litanda, uje wayoya ku myaka yoshe, omo vaimba,

¹⁰ co vaje vakulunu makumi avali na vawana vakulama kulutwe lwa uje natumbama a litanda nakulemesa uje wayoya ku myaka yoshe. Co vombila vilongo vyavo asi kulutwe lwa litanda nakwendeka ngwavo,

¹¹ “Mwene yetu na Njambi yetu! Yove wafwila kutambula vumpau na kasingimiko na nzili. Omwo yove watangele vyuma vyoshe, co ku cizango cove vavyanene kuyoya na mwonyo.”