Kujombolola 3 - Livulu lya Shukulu Kalunga

Lijwi lyakutuma ku Salendisiya

¹ “Kuli kangelo wa ku cikungulukilo ca mu Salendisiya soneka ngwove, “Eli likelyo lijwi lyatundu kuli uje ali na minzinzime ya Njambi itanu na ivali na vingongonosi vitanu na vivali. Njinazivuka vije viwulinakulinga, njinazivuka ngeci uli na lizina ngeci ulinakuyoya, nameme ngoco unatsi laja.

² Ngecivene, induka, co kolesa vije viwulinavyo simbu kanda vicitsililile vyoshe. Omwo njinawana ngeci vije viwunalingi kanda vicipwe vyakutungukwa ku mesho a Njambi yange.

³ Ngecivene, anuka vije vivakulongesele na vije viwazivile, vyononoke, co tenguluka ku vivi vyove. Nga shove kwinduka, njikaija kuli yove ngwe mwizi, co kuukazivuka nameme simbu ije njikaija kuli yove.

⁴ Oloni vamo veni vavandondo mu Salendisiya vananyungu vuzalo vwavo kupwa vwakujela. Vakenda amo nange, nakuzala vuzalo vwakutoka, omwo vafwila kulinga ngacije.

⁵ Kuli vaje vahyana, vakavazika vuzalo vuje vene vwakutoka, co kunjikatundisa mazina avo mu livulu lya mwonyo. Njikendeka citona-mesho ku mesho a Tate na ku mesho a tungelo twendi ngwange ava vanapu vange.

⁶ “Nga uli na matwi, tolilila vije vyalinakwendeka Munzinzime ku vikungulukilo!

Lijwi lyakutuma ku Filandelufiya

⁷ “Kuli kangelo wa ku cikungulukilo ca mu Filandelufiya soneka ngwove, “Eli likelyo lijwi lyatundu kuli umo uje wakujela na vushunga. Nakwata sapi ije yakundamene kuli Ndaviti, co omo ashokolola lipito, naumo wai asa kulishoka, co omo alishoka, naumo wai asa kulishokolola.

⁸ Njinazivuka vije viwukalingi, njinazivuka ngeci yove uli na nzili yaindondo, unakavangeya vilongesa vyange, co unapu muka-kulongwa kuli yange. Njinashokolola lipito kulutwe lwove, kukwesi umo asa kulishoka.

⁹ Tolilila! Ngwe ku munga ije yakundama kuli Satana, vaka-makuli vaje valitumbula vakevo vavenya ngwavo vanapu vaYunda oloni kesi vakevo embwe, njikavalingisa ngeci vakaije kuli yove nakukulama ku myanja yove. Voshe vakazivuka ngeci kuma njakuzema.

¹⁰ Omwo unanyungu lijwi lyange nakupwa muka-kusimpa, co lalo njikakunyunga a simbu ya tuyando tuje tulinakwija mu kaye koshe nakweseka vanu voshe va ano asi.

¹¹ Njilinakwija vwasi-vwasi. Nyunga mwamuvwa vije viwulinavyo, ngeci kesi kukale umo akunyeke cilongo cove cakuhyana.

¹² Uje ahyana njikamupwisa manda mu Njuvo ya Shukulu Kalunga Njambi yange, co nalumo lwai lalo akatundamo. Co njikasoneka ali ikeye lizina lya Njambi yange, na lizina lya nganda ya Njambi yange, ikeyo Yelusalema yaiha, ije ikashuluka kutunda mwilu kuli Njambi yange. Co lalo njikasoneka ali ikeye lizina lyange lyaliha.

¹³ “Nga uli na matwi, tolilila vije vyalinakwendeka Munzinzime ku vikungulukilo!

Lijwi lyakutuma ku Laondisiya

¹⁴ “Kuli kangelo wa ku cikungulukilo ca mu Laondisiya soneka ngwove, “Eli likelyo lijwi lyatundu kuli Ewa, mukaleo wa kulongwa na vushunga, ikeye nsina ya vyuma vyoshe vije vyatangele Njambi.

¹⁵ Njanazivuka vije viwunalingi, njinazivuka ngeci yove kesi uwakushaluka nameme uwakutonola. Te njishaka ngeci yove upwe uwakushaluka nameme uwakutonola!

¹⁶ Oloni omwo wapwa u wa ngwinye-ngwinye, kesi uwakushaluka nameme uwakutonola, njikakukunja nakukujekula mu kanwa kange!

¹⁷ Omwo wendeka ngwove, ‘Yange nji muka-kufuka njapwisamo, vyoshe njitonda njilinavyo.’ Oloni yove kuuzivuka vuutu na tuyando ulinatwo! U kautu, uli na vuzu, co lalo u kapuputwa.

¹⁸ Ngecivene, njikunangula ngeci ulande ngolinde kuli yange, ngolinde yakujela, ngeci ufuke. Co lalo landa vuzalo vwakutoka uzale ngeci ufwike mutotototo wove wa shwamwa. Co lalo landa cemba cakwaka mu mesho ove, ngeci wase kumona.

¹⁹ Yange njivindika nakunyanyamesa vaje voshe vanjazema. Ngecivene, nyanyammeni, co tengulukeni ku vivi vyeni.

²⁰ Tolilila! Njinemana ku lipito nakutota, nga umo aziva lijwi lyange nakushokolola lipito, njikakovela mu njuvo yendi nakulya amo nendi, na ikeye lalo akalya amo nange.

²¹ Kuli vaje vahyana, njikavana moko yakutumbama kuyehi nange a litanda lyange, ngwe omo yange njahyanene, co ololo njinatumbama kuyehi na Tate a litanda lyendi.

²² “Nga uli na matwi, tolilila vije vyalinakwendeka Munzinzime ku vikungulukilo!”