Kujombolola 22 - Livulu lya Shukulu Kalunga

¹ Asinoni kangelo wanjimwesele ndonga ya mema a mwonyo, yakuvyakuma ngwe kilisitale, yatundile ku litanda lya Njambi na lije lya Muna Manga,

² co yetile mukati ka tapalo ya mu nganda. Ku ngenge na ngenge ya ndonga kwakele muti wa mwonyo, uje wakele nakwima vushuka visimbu likumi na vivali a mwaka, lumo a ngonde na ngonde, co maputa awo apwile vumbanda vwakukangwisa miyati ya vanu.

³ Kumukakala lalo cuma cakusinga mu nganda ije embwe. Litanda lya Njambi na lya Muna Manga likakala muje mu nganda, co vangamba vendi vakamulemesa.

⁴ Vakamona cihanga cendi, co lizina lyendi vakalisoneka a maholo avo.

⁵ Kumukakala lalo vutsiki muje, co kumukakala lalo ndeya nambe litangwa, omwo Shukulu Kalunga Njambi akapwa ceke cavo, co vakashwana ngwe vimyene ku myaka na myaka.

Kwija kwa Yesu

⁶ Co kangelo wendekele kuli yange ngwendi, “Majwi awa anapu a vushunga, co vasa kuwakulaela. Co Shukulu Kalunga Njambi, uje muka-kwana Munzinzime wendi kuli vaka-kwimanena, natumu kangelo kendi mukumwesa vangamba vendi vije vikalingiwa ololo.”

⁷ Yesu alinakwendeka ngwendi, “Tolilileni! Njilinakwija vwasi! Vanavezika vaje vononoka majwi a vuka-kwimanena a mu livulu eli!”

⁸ Yange Yowano, njazivile nakumona vyuma vyoshe evi. Co omo njavizivile nakuvimona, njawililile asi ku myanja ya kangelo uje wanjimwesele vyuma evi, co njashakele kumulemesa.

⁹ Oloni ikeye wendekele kuli yange ngwendi, “Kesi ulinge ngeci! Yange njinapu ngamba ngwe yove na vakweni vaka-kwimanena na voshe vaje vononoka majwi a mu livulu eli. Lemesa Njambi!”

¹⁰ Co wendekele kuli yange ngwendi, “Kesi upwise cisin̄iko majwi a vuka-kwimanena a mu livulu eli, omwo simbu ili muyehi omo vyuma vyoshe evi vikalingiwa.

¹¹ Woshe uje alinga vuvi acitwaleo kulinga vuvi, co woshe uje alinga vya vunyengwe acitwaleo vene kulinga vya vunyengwe, woshe uje alinga vuvwa acitwaleo kulinga vuvwa, co woshe uje najele acitwaleo kupwa wakujela.”

¹² Yesu alinakwendeka ngwendi, “Tolilileni! Njilinakwija vwasi! Njilinakwija na cikandelela cakwana kuli munu na munu ngwe ku vilinga vyendi.

¹³ Yange wakulivanga na muka-kukotokela, vushangumukilo na mamaneselelo.”

¹⁴ Vanavezika vaje vakusha vuzalo vwavo ngeci vujele, co vali na moko yakulya ku vushuka vwa muti wa mwonyo nakukovela mu vikolo vya mu nganda.

¹⁵ Oloni anja ya nganda ali tutali na valozi na vaka-vupangala na vaka-kutsiya na vaka-kulemesa tumponya na vaka-makuli mu majwi na mu vilinga.

¹⁶ “Yange Yesu, njinatumu kangelo kange nakwambulula vyuma evi kuli yeni mu vikungulukilo. Yange njatunda ku naanga ya Ndaviti, yange litota lyakuvyazima lya mutondo.”

¹⁷ Munzinzime na Shombolwa vendeka ngwavo, “Ija!” Woshe uje aziva evi napande lalo kwendeka ngwendi, “Ija!” Woshe uje ali na lihwila aije, woshe uje ashaka, atambule mema a mwonyo a vwana.

Mamaneselelo

¹⁸ Yange Yowano, njiminangula yeni voshe vaje vaziva majwi a vuka-kwimanena a mu livulu eli ngwange, nga munu awezelela cuma cimo ku majwi awa, co Njambi lalo akawezelela ku cihiso cendi tuyando tuje tuvanatumbula mu livulu eli.

¹⁹ Co nga munu atundisako koma kamo ku majwi a vuka-kwimanena a mu livulu eli, co Njambi akatundisa kuli ikeye vyuma vije vivanasoneka mu livulu eli, vikevyo mutambela wendi wa vushuka vwa muti wa mwonyo na mutambela wendi mu Nganda Yakujela.

²⁰ Uje ana vukaleo vwendi ku vyoshe evi endeka ngwendi, “Mwa vushunga vene! Njilinakwija vwasi!” Mukemwo vene cipwemo. Ija, Mwene Yesu!

²¹ Kutetela kwa Mwene Yesu kukale neni voshe. Ewa.