Kujombolola 20 - Livulu lya Shukulu Kalunga

Myaka 1,000

¹ Asinoni njamwene kangelo washulukile mwilu, wakwatele sapi ya mbulu kuyesi naa masima na lilyenge lyakama.

² Co wakwatele canza-ngombe, linyoka wa ku san̄ulu, ikeye Liyavola nambe Satana, co wamukutile malyenge myaka 1,000.

³ Co kangelo wamumbilile mu mbulu ije kuyesi naa masima, co washokele ije mbulu nakuyipata nakwakao kasateso, ngeci kesi lalo akakwisa vanu kuvanga noo myaka 1,000 ineti. Munima yevi, co vakamuzitula kasimbu kakandondo lika.

⁴ Asinoni njamwene matanda, co vaje vatumbameneo vavaanene nzili yakusompa. Co njamwene myonyo ya vaje vavatsiile omwo vambulwile vushunga vuje vwasholwele Yesu amo na lijwi lya Njambi. Kuvalemesele uje cikashama nambe kamponya kendi, nambe vakevo kuvatambwile cizivukiso ca uje cikashama a maholo avo nambe a mavoko avo. Vasangukilile ku mwonyo nakushwana ngwe vimyene amo na Kilistu myaka 1,000.

⁵ (Oloni vatsi vaje vasaleleo kuvasangukile noo myaka 1,000 ineti.) Oku kukekwo kusanguka kwa vatsi kwakulivanga.

⁶ Kuvwaelela nakuvezika kwakama kuli vaje vakasanguka a cisangukilo cakulivanga. Kutsa kwamucivali kucesi na nzili ali vakevo, vakapwa vaka-kukombelela va Njambi na Kilistu, co vakashwana amo nendi myaka 1,000.

Kufunguluka kwa Satana

⁷ Munima ya myaka 1,000, Satana vakamushokolola mu kamenga.

⁸ Co akaya nakukwisa miyati ya vanu voshe vaje vanashandokela mu kaye mwoshe, ikeyo Ngonge na Mangonge. Satana akavakungulwila amo nakulwa nzita, vungi vwavo vakapwa ngwe lishen̄avu lya ku ngenge ya mema a kalunga.

⁹ Vashandokelele ano asi oshe, co vazengelekele cilombo ca vanu va Njambi na nganda ije yazema. Oloni tuhya twatundile mwilu, co twavanyongesele.

¹⁰ Asinoni Liyavola, uje wavakwisile, vamumbilile mu lishali lya tuhya na sulufa, muje muvombilile laja uje cikashama na muka-kwimanena wa makuli, co vakayanda manene mutanya na vutsiki myaka na myaka.

Kusompa kwakukotoka

¹¹ Co njamwene litanda lyakama lyakutoka na uje watumbameneo. Kaye na lilu vyatewele ku mesho endi, co kuvavimwene lalo.

¹² Coi njamwene vatsi, vakama na ava vavandondo, vemanene kulutwe lwa litanda. Vafukwile mavulu, co lalo vafukwile livulu likwavo, likelyo livulu lya mwonyo. Co vatsi vavasompele ngwe ku vilinga vyavo vije vivalingile, ngwe muvavisonekele mu mavulu.

¹³ Co mema a kalunga atuwisile vatsi vaje vakelemo. Kutsa na lifuti lya vatsi lalo vecelele vatsi vaje vakelemo. Co voshe vavasompele ngwe ku vilinga vyavo vije vivalingile.

¹⁴ Asinoni kutsa na lifuti lya vatsi vavyumbilile mu lishali lya tuhya. (Eli lishali lya tuhya likelyo kutsa kwamucivali.)

¹⁵ Co woshe uje kuvasonekele lizina lyendi mu livulu lya mwonyo vamumbilile mu lishali lya tuhya.