Kujombolola 2 - Livulu lya Shukulu Kalunga

Lijwi lyakutuma ku Efeso

¹ Kuli kangelo wa ku cikungulukilo ca mu Efeso soneka ngwove, “Eli likelyo lijwi lyatundu kuli uje nakwata vingongonosi vitanu na vivali mu livoko lyendi lya cilyo, uje alinakwendangana akati ka vitumbikilo vya vindeya vya ngolinde vitanu na vivali.

² Njinazivuka vije viwunalingi, njinazivuka kuundangana kwove nakusimpa kwove. Njinazivuka ngwange kuwasa kuundangana amo na vaka-kulinga vyavivi embwe, co lalo unelula vaje vaka-kwendeka ngwavo vanapu miluwa oloni kesi vakevo embwe, co vanasholoka ngeci kuma vanapu vaka-makuli.

³ Unapu u muka-kusimpa vene, unayanda na n̄avava omwo lizina lyange, co kuwaombwanesele embwe.

⁴ Oloni kuli cuma cimo njalinyenge ali yove, kuwesi nakunjizema ngwe muje muwanjizemene akulivanga.

⁵ Anuka kuje kuunawila! Tenguluka ku vivi vyove nakulinga vije viwalingile akulivanga. Nga shove kutenguluka ku vivi vyove, co yange njikaija kuli yove nakutundisa citumbikilo ca ndeya yove mu mwela waco.

⁶ Oloni eci cikeco ulinaco, yove unazindi vije vivakalingi vaNikolau, ngwe muje munjavazinda yange lalo.

⁷ “Nga uli na matwi, tolilila vije vyalinakwendeka Munzinzime ku vikungulukilo! “Kuli vaje vahyana, njikavana moko yakulya ku vushuka vwa muti wa mwonyo uje uli mu Lihya lya Njambi.

Lijwi lyakutuma ku Simina

⁸ “Kuli kangelo wa ku cikungulukilo ca mu Simina soneka ngwove, “Eli likelyo lijwi lyatundu kuli uje wakulivanga nakukotokela, uje watsile, co lalo wayoyele.

⁹ Njinazivuka tuyando twove, njinazivuka ngeci yove unapu kautu, oloni mwa vushunga unapu muka-kufuka! Njinazivuka kushaula kuje valinakukushaula vaje valitumbula ngwavo vanapu vaYunda oloni kesi vakevo embwe, vakevo vapwa vaka-munga yakundama kuli Satana!

¹⁰ Kesi ulishoshomwene a n̄avava ije ukamona. Tolilila! Liyavola akamyaka mu ceseko mukwaka vamo veni mu kamenga, co tuyando tweni tukapwa twa matangwa likumi. Ngecivene, pwa muka-kulongwa kuli yange noo kutsa, co njikakwana cilongo ca mwonyo.

¹¹ “Nga uli na matwi, tolilila vije vyalinakwendeka Munzinzime ku vikungulukilo! “Kuli vaje vahyana, kutsa kwamucivali kucikavavulumuna.

Lijwi lyakutuma ku Pelengamu

¹² “Kuli kangelo wa ku cikungulukilo ca mu Pelengamu soneka ngwove, “Eli likelyo lijwi lyatundu kuli uje ali na moko ya mukwale ya vuvela kuvali.

¹³ Njizivuka kuje kuwakala, kuje kwakala litanda lya Satana. Yove unapu muka-vushunga kuli yange, co kuwombilile kukulaela kwove kuli yange, nameme mu simbu omo Antipase, mukaleo wange wa kulongwa vamutsiilile kuje vene kwakala Satana.

¹⁴ Oloni kuli vyuma vyavindondo njalinyenge ali yove, kuvali vamo akati keni vaje vacikavangeya kulongesa kwa Mbalame, uje walongesele Mbalake kutwamenena vanu va Isalele kulinga vuvi akuvasindiya kulya vyakulya vije vanakombelela ku tumponya nakulinga vupangala.

¹⁵ Mu ngila eyi vene, yove lalo akati kove acili vanu vaje valinakukavangeya kulongesa kwa vaNikolau.

¹⁶ Tenguluka ku vivi vyove! Nga shove, co njilinakwija vwasi kuli yove nakulwisa vanu vaje na moko ya mukwale yakutunda ku kanwa kange.

¹⁷ “Nga uli na matwi, tolilila vije vyalinakwendeka Munzinzime ku vikungulukilo! “Kuli vaje vahyana, njikavana maana yakushweka. Co lalo njikana umo na umo wavo limanya lyakutoka aje vanasoneka lizina lyaliha lije naumo wai alizivuka kuvanga uje vavenya alitambula.

Lijwi lyakutuma ku Tiyatila

¹⁸ “Kuli kangelo wa ku cikungulukilo ca mu Tiyatila soneka ngwove, “Eli likelyo lijwi lyatundu kuli Muna Njambi, uje ali na mesho akuvyazima ngwe mulangi wa tuhya, uje ali na mendi akutwa ceke ngwe vunengu vwakukwita mufwitilo.

¹⁹ Njinazivuka vije viwukalingi. Njinazivuka cizemo cove na kulongwa kwove na vipangi vyove na lukakateya lwove. Njizivuka ololo ngeci ulinakulinga mwamuvwa manene kutuvakana muwalingile akulivanga.

²⁰ Oloni kuli cimo njalinyenge ali yove, unecelela uje munakazi Njezevele, uje alinakulitumbula ikeye vavenya ngwendi muluwa wa Njambi. Kulongesa kwendi kulinakutwamenena vangamba vange kulinga vupangala nakulya vyakulya vyakukombelela ku tumponya.

²¹ Njinamwana simbu ngeci atenguluke ku vivi vyendi, oloni ikeye kashaka kutenguluka ku vupangala vwendi.

²² Co njikamumbila a vulili na vaje valingile nendi vupangala, co vakayanda na n̄avava yakama. Ololo njikalinga eci, kuvanga vatenguluke nakutunda ku vyuma vyavivi vije vivalingile nendi.

²³ Co lalo njikatsiya vaka-kumukava, asinoni vikungulukilo vyoshe vikazivuka ngeci kuma yange uje azivuka viyongola vya vanu na vizango vyavo. Njikafweta umo na umo weni kupwisa ku vilinga vyendi.

²⁴ “Oloni vungi vweni muli mu Tiyatila kumwakavangeyeye vilongesa evi vyavivi, yeni kumwalilongesele vije vivanatumbula vakweni veka ngwavo, ‘cisin̄iko ca kulova ca Satana.’ Kunjikamitwiki citele ceka lalo.

²⁵ Oloni munapande kukakateya mbe kuli vije mulinavyo noo njikaija.

²⁶ Kuli vaje vahyana, vaje valinga vije vinjishaka noo akukotoka, njikavana moko a miyati,

²⁷ co vakavashwana na mulamu wa cikuvo nakuvatovozola vitambi-vitambi ngwe ndeo ya vuma, ngwe yange njatambwilela nzili kuli Tate.

²⁸ Co lalo njikavana litota lya mutondo.

²⁹ “Nga uli na matwi, tolilila vije vyalinakwendeka Munzinzime ku vikungulukilo!