Kujombolola 19 - Livulu lya Shukulu Kalunga

¹ Munima yevi njazivile cilumo cakufwa ngwe lijwi lya mbunga yakama ya vanu vali mwilu, lyendekele ngwalyo, “Shangazaleni Njambi! Kwamena na vumpau na nzili vyakundama kuli Njambi yetu!

² Kusompa kwendi kwapwa kwakuvwa na vushunga! Nahisa cikwizi wakama uje waviisile kaye na vupangala vwendi. Njambi namunyanyamesa omwo watsiile vangamba vendi.”

³ Vatambekele lalo ngwavo, “Shangazaleni Njambi! Vwisi vwakutunda ku milangi ije inenyeka nganda vulinakukakumuka ku myaka na myaka!”

⁴ Co vaje vakulunu makumi avali na vawana na vikashama vawana vakuyoya vawile asi nakulemesa Njambi, uje watumbamene a litanda, vendekele ngwavo, “Ewa! Shangazaleni Njambi!”

Ciwano ca vulo vwa Muna Manga

⁵ Asinoni lijwi lyatundile ku litanda lyendekele ngwalyo, “Shangazaleni Njambi yetu, yeni vangamba vendi voshe vaje vamukomoka, vakama na ava vavandondo!”

⁶ Asinoni njazivile lijwi lyakama ngwe lya mbunga, lyakufwa ngwe kukuma kwa cipupa ca mema, lyakufwa ngwe mikalateto ya mihyato. Co njazivile vendeka ngwavo, “Shangazaleni Njambi! Omwo Shukulu Kalunga Njambi yetu Muka-nzili yoshe, ikeye wapwa Mwene!

⁷ Tujoleleni nakuvwaelela, tushangazaleni vukama vwendi! Omwo simbu inete ya vulo vwa Muna Manga, co shombolwa yendi nalivwaesa laja.

⁸ Vanamwana vuzalo vwa linyu vwakuvyazima ngeci azale.” (Nanga ya linyu yapwa vilinga vyavivwa vya vanu va Njambi.)

⁹ Co kangelo wendekele kuli yange ngwendi, “Soneka ngwove, vanavezika vaje vavanalanya ku ciwano ca vulo vwa Muna Manga.” Co kangelo wendekele lalo ngwendi, “Awa akewo majwi a vushunga a Njambi.”

¹⁰ Co njawililile ku myanja yendi ngeci njimulemese, oloni wendekele kuli yange ngwendi, “Kesi ulinge ngeci! Yange njinapu ngamba ngwe yove na vakweni lalo voshe vaje vakakateya ku vushunga vuje vwasholwele Yesu. Lemesa Njambi!” Omwo vushunga vuje vwasholwele Yesu vukapangesa vaka-kwimanena.

Muka-kulonda a kavalu wakutoka

¹¹ Asinoni njamwene lilu lyashokolokele, co kwakele kavalu wakutoka. Co uje walondeleo vamutumbwile ngwavo Muka-kulongwa na Vushunga, ikeye akasompo nakulwa vinzita vyendi mu vushunga.

¹² Mesho endi afwile ngwe milangi ya tuhya, co wazalele vilongo vyavingi ku mutwe wendi. Vamusonekele lizina lije naumo wai walizivukile kuvanga ikeye vavenya lika.

¹³ Cikoveyo cije cazalele vacimbwitikile mu maninga. Lizina lyendi lyapwile, “Lijwi lya Njambi.”

¹⁴ Vimbunga vya nzita ya mwilu vyamukavangeyeye, valondele a tuvalu vakutoka, co vazalele vuzalo vwakujela vwakutoka vwa linyu.

¹⁵ Co moko ya mukwale yatuukile mu kanwa kendi, ikeyo yakafungulula nayo miyati. Ikeye akavashwana na mulamu wa cikuvo, co akakamuna vinyu mu cikamwino ca vinyu ca vukalu vwa Njambi Muka-nzili yoshe.

¹⁶ A cikoveyo cendi cacilaja na a myanja yendi vasonekeleo lizina ngwavo, “Mwene ya vimyene na Shukulu ya vashukulu.”

¹⁷ Asinoni njamwene kangelo wemanene a litangwa. Watambekele na lijwi lyakama ku tuzila voshe va a mukambwile ngwendi, “Ijeni mukunguluke amo ku ciwano cakama ca Njambi!

¹⁸ Ijeni mulye situ ya vimyene na vantwama vakama vanzita na mashwalale na situ ya tuvalu na vaka-kulondao na situ ya vanu voshe na vindungo na vaka-kupatuka, vakama na ava vavandondo!”

¹⁹ Co njamwene uje cikashama na vimyene va ano asi na mbunga yavo ya mashwalale vakungulukile mukulwisa uje walondele a kavalu nakulwisa mbunga yendi lalo.

²⁰ Co uje cikashama vamupwisile cinzinda, amo na muka-kwimanena wa makuli uje walingile vizivukiso ku mesho endi. (A vizivukiso vije vene akeo akwisilile vaje vakele na cizivukiso ca uje cikashama na vaje valemesele kamponya ka uje cikashama.) Uje cikashama na uje muka-kwimanena wa makuli vavombilile anga vaciyoya mu lishali lya tuhya twakushukuma na sulufa.

²¹ Co mbunga yavo ya mashwalale vavatsiile na moko ya mukwale ije yatundile mu kanwa ka uje walondele a kavalu, co tuzila voshe valile situ yavo ngwe muvashakelele.