Kujombolola 18 - Livulu lya Shukulu Kalunga

Kuwa kwa Mbambilone

¹ Munima yevi njamwene kangelo watundile mwilu. Wakele na moko yakama, co asi a vyazimine na vumpau vwendi.

² Watambekele na lijwi lyakama ngwendi, “Inau! Mbambilone Yakama inau! Ololo inapu nganda yakukala minzinzime yakujwala na kamenga ka minzinzime yakujwala na ya miyati yoshe ya tuzila vavushakulwizi na mazilo oshe.

³ Omwo mafuti oshe vananu vinyu vyakulula vya mashungu endi amavi. Vimyene va ano asi vanalingi nendi vupangala, co vaka-kulanda va ano asi vanafuku na vufuko vwa mashungu endi.”

⁴ Co njazivile lalo lijwi likwavo lyatundile mwilu lyendekele ngwalyo, “Eni vanu vange! Tundeni kuli ikeye! Kesi mulipandakane nendi mu vuvi vwendi, kesi mukundame ku cihiso cendi!

⁵ Omwo vuvi vwendi vunatumu vunete na mwilu, co Njambi nanuka vingila vyendi vya kupenga-penga.

⁶ Muyandeseni ngwe mwamiyandesele, mwilwisileni visimbu vivali ku vije vyalingile. Shuliseni nganja yendi na vyakunwa vyakulula ngwe vije vyamivwaeselele yeni.

⁷ Mumweseni manene n̄avava na tuyando ngwe muje mwalyanene ikeye vavenya vumpau nakujolelala. Omwo alinakulyendekesa ikeye vavenya ngwendi, ‘Njinatumbama ngwe nji vamwene! Kesi nji fwile embwe, kunjikazivi vusiwa!’

⁸ Omwo cuma eci, cihiso cendi cikaija litangwa limo, kutsa na vusiwa na njala. Co vakamwenyeka na tuhya, omwo Shukulu Kalunga Njambi, uje akamusompa, wapwa muka-nzili.”

⁹ Co vimyene va ano asi vaje valingile nendi vupangala na mashungu amavi vakalila nakulinyenga omo vakamona vwisi vulinakukakumuka omo alinakwenya.

¹⁰ Vakashondoloka nakwimana kulyala, omwo vakaziva lyova lya tuyando twendi, co vakendeka ngwavo, “Kengeni! Naana! Kayeketu! Kayeketu! Mbambilone nganda yakama! Mu ola imolika lajoko vanakunyanyamesa!”

¹¹ Co vaka-kulandulula va ano asi vakamulila nakusikoka, omwo naumo wai akalanda vufuko vwavo,

¹² naumo wai akalanda ngolinde yavo na siliva na mamanya a seo na makwalale na vinanga vya linyu nevi vyakuvenga nevi vyakuseneta nevi vya miti yakunika mwamuvwa na vivalavya kupanga na mayo a vinjamba na vya miti ya ndando yakama nevi vya vunengu nevi vya vikuvo nevi vya mamanya akutoka akukola,

¹³ na sinamone na n̄undu na insense na fulankininsense na vinyu na mazi a olive na vunga vwa tiliku na tiliku na vingombe na vimanga na tuvalu na matemba na vindungo na vanu.

¹⁴ Co vaka-kulandulula vendeka kuli ikeye ngwavo, “Vyuma vyavivwa vyoshe vije viwashakele kukala navyo vinakutundu, na vufuko vwove vwoshe na vije vyavivwa vinakutewa, co kuukaviwana lalo!”

¹⁵ Vaka-kulandulula vaje vafukile omwo ikeye, vakashondoloka nakwimana kulyala, omwo vakaziva lyova lya tuyando twendi. Vakalila nakusikoka,

¹⁶ co vakendeka ngwavo, “Kengeni! Naana! Kayeketu! Kayeketu! Nganda yakama! Ije yazalele vinanga vya linyu nevi vyakuvenguluka nevi vyakuvenga nakulifwika vya senga vya ngolinde nevi vya mamanya a seo na makwalale!

¹⁷ Co mu ola imolika lajoko nazimbalesa vufuko vwoshe ovu!” Na voshe vantwama va mato na vaka-kwendamo na vaka-kujavula na voshe vaje vakele nakulandulwila a mema a kalunga, vemanene kulyala,

¹⁸ co valilile omo vamwene vwisi vwa milangi ije yamwenyekele, co vendekele ngwavo, “Kukwesi lalo nganda yakama yakutuvakana eyi!”

¹⁹ Valishuwilile livu a mitwe yavo, valilile nakusikoka, co vendekele ngwavo, “Kengeni! Naana! Kayeketu! Kayeketu! Nganda eyi yakama! Yapwile nganda ije yafukisile vaka-mato akama voshe vaje vakele nakwendela a mema a kalunga! Co ola imolika lajoko nazimbalesa vyendi vyoshe!”

²⁰ “Lilu vwaelela, omwo nau! Yeni vanu va Njambi vwaeleleni, neni miluwa na vaka-kwimanena! Omwo Njambi namuhisa a vije vyalingile kuli yeni!”

²¹ Asinoni kangelo umo wa nzili wanonele limanya lyakama ngwe limanya lyakulolela vunga walyumbilile mu mema a kalunga, co wendekele ngwendi, “Omu mukemwo muvakombila asi nganda yakama Mbambilone, co kuvakaimono lalo.

²² Co majwi a tulyalya na vaka-kwimba vimbendo na malupembo, kuvakawazivi lalo muli yove! Naumo wai lalo muka-vipangi mu vipangi vyoshe-ivyoshe ivakawana lalo muli yove, co muyoyo wa limanya lyakulolela vunga kuvakauzivi lalo muli yove!

²³ Naumo wai lalo akamona ceke ca ndeya muli yove, nalumo lwai lalo vakaziva lijwi lya shombolwa na vavenya vulo muli yove. Vaka-kulanda vove vapwile vaka-nzili manene mu kaye mwoshe, co wakwisile vanu voshe va mu kaye na manseno ove a makuli!

²⁴ Mbambilone vainyanyamesele omwo maninga a vaka-kwimanena naa a vanu va Njambi aje avawanene mu nganda, eyo maninga a vaje voshe vavatsiile ano asi.”