Kujombolola 16 - Livulu lya Shukulu Kalunga

Malonga a vukalu vwa Njambi

¹ Asinoni njazivile lijwi lyakama lyatundile mu Njuvo ya Shukulu Kalunga lyendekele kuli tungelo vatanu na vavali ngwalyo, “Yeni muketile asi aje malonga atanu na avali a vukalu vwa Njambi!”

² Ngecivene, kangelo wakulivanga waile wetilile lilonga lyendi asi. Co vimbandu vyakukomokesa vyakuvavala manene vyasholokele ali vaje vakele na cizivukiso ca uje cikashama na ali vaje valemesele kamponya kendi.

³ Asinoni Kangelo wamucivali wetilile lilonga lyendi mu mema a kalunga. Co mema emukile ngwe maninga a munu wa kutsa, co vyuma vyakuyoya vyoshe vyakele mu mema a kalunga vyatsile.

⁴ Asinoni kangelo wamucitatu wetilile lilonga lyendi mu vindonga na mu masima a mema a tuvwelu-vwelu, co vyemukile maninga.

⁵ Njazivile kangelo uje muka-kushika mema wendekele ngwendi, “Kusompa kuunalingi kunapu kwa vushunga, Yove Wakujela, yove uliko, co yove wakeleko!

⁶ Vetilile maninga a vanu va Njambi naa a vaka-kwimanena, ngecivene, unavana maninga ngeci vanwe. Valinakutambula vije vinavapande.”

⁷ Asinoni njazivile lijwi lyatundile ku mutula lyendekele ngwalyo, “Shukulu Kalunga Njambi Muka-nzili yoshe! Kusompa kwove kunapu kwa vushunga na vuvwa!”

⁸ Asinoni kangelo wamuciwana wetilile lilonga lyendi a litangwa, co valitavesele ngeci lyenyeke vanu na ntwima ya tuhya twalyo.

⁹ Vanu venyele na ntwima yakama, co vasingile lizina lya Njambi, uje ali na moko a tuyando otu. Oloni kuvatengulukile ku vivi vyavo nakushangazala vukama vwendi.

¹⁰ Asinoni kangelo wamucitanu wetilile lilonga lyendi a litanda lya uje cikashama. Co lisusulungu lyawililile akamwa ya vumwene vwa uje cikashama, co vanu valishumangele malimi avo omwo kuvavala kwavo,

¹¹ co vashawile Njambi wa mwilu omwo kuvavla na vimbandu vyavo. Oloni kuvatengulukile ku vingila vyavo vyavivi.

¹² Asinoni kangelo wamucitanu na umo wetilile lilonga lyendi a Ndonga yakama ya Yufuleti. Co ije ndonga yomine cau, mukwana ngila kuli vimyene vaje vatundilila mu ngangela.

¹³ Asinoni njamwene minzinzime itatu yakujwala ije yafwile ngwe mambotwe. Yatuukile kutunda mu kanwa ka canza-ngombe, na mu kanwa ka cikashama na mu kanwa ka muka-kwimanena wa makuli.

¹⁴ Vakevo vanapu minzinzime yakujwala ije ikalingi vizivukiso. Eyi minzinzime itatu ikayi kuli vimyene va ano a kaye oshe nakuvakungulwila amo lika ku nzita a Litangwa lyakama lya Njambi Muka-nzili yoshe.

¹⁵ “Tolilileni! Njilinakwija ngwe mwizi! Navezika uje atumbama nakukengelela nakunyunga vuzalo vwendi, ngeci kesi ende mushelengwa nakuziva shwamwa ku mesho a vanu!”

¹⁶ Asinoni ije minzinzime yakungulwile vaje vimyene amolika ku mutambela uje uvatumbwile mu ciHevelu ngwavo Alamangindone.

¹⁷ Asinoni kangelo wamucitanu na vavali wetilile lilonga lyendi mu lihunzi. Co lijwi lyakama lyatundile ku litanda lya mu Njuvo ya Shukulu Kalunga lyendekele ngwalyo, “Kunau!”

¹⁸ Co kwakele mihyato na cililimo na mikalateto na mandunduma akama a kaye. Kukwakele mandunduma akama ngwe awa anga vatangelele munu ano asi, awa akewo apwile mandunduma akama manene kutuvakana oshe!

¹⁹ Nganda yakama yatavozokele mu vimbazuvwila vitatu, co vinganda vya mu mafuti oshe vyanyongele. Co Njambi wanukile Mbambilone yakama, co wainwisile vinyu vya mu nganja yendi, vinyu vya vukalu vwendi.

²⁰ Man̄anda oshe atewele, co minkinda yoshe kuvaasele kuyimona lalo.

²¹ Nyonzi yakama ya mamanya yanyokele, limanya limo na limo akulipeselesa lyapwile ngwe makilo makumi atanu, atundile mwilu nakuwila a vanu, vaje vashawile Njambi omwo tuyando twa nyonzi ya mamanya, omwo kayando kaje kapwile kakukomokesa manene.