Kujombolola 15 - Livulu lya Shukulu Kalunga

Tungelo vaje vakele na tuyando twakumanesela

¹ Asinoni njamwene cimweso cikwavo mwilu, cakama cakukomokesa. Kwakele tungelo vatanu na vavali na tuyando tutanu na tuvali, tuketwo tuyando twakumanesela, omwo tuketwo tumwesa vukalu vwa Njambi vwakumanesela.

² Asinoni njamwene cije cafwile ngwe mema a kalunga a kalikengelo akulikumbasana na tuhya. Co njamwene lalo vaje vahyanene uje cikashama na kamponya kendi, na ali uje lizina lyendi linemanena nambala. Vemanene ku ngenge ya mema a kalunga a kalikengelo, vakwatele tulyalya tuje twavanene Njambi,

³ co vakele nakwimba mwaso wa Mosesa, ngamba ya Njambi, na mwaso wa Muna Manga ngwavo, “Njambi Muka-nzili yoshe, vilinga vyove vinapu vyakama vyakukomokesa! Mwene wa miyati ya vanu, vilinga vyove vyapwa vyavivwa na vushunga!

⁴ Iyajo kasa kukukomoka yove Shukulu Kalunga? Iyajo avyana kushangazala vukama vwove? Yove lika wapwa wakujela! Miyati yoshe ya vanu vakaija nakukulemesa, omwo vilinga vyove vya vushunga vinasholoka kuli vanu voshe.”

⁵ Munima yevi njamwene Njuvo ya Shukulu Kalunga inashokoloka mwilu, na Mbalaka ya Vukaleo yakele muje.

⁶ Na tungelo vaje vatanu na vavali vakele na tuyando twakumanesela vatuukile mu Njuvo ya Shukulu Kalunga, vazalele vuzalo vwakujela vwakutoka vwa linyu, na miva ya ngolinde vaikutile ku vinulo vyavo.

⁷ Co umo wa vaje vikashama vakuyoya vawana wanene vaje tungelo vatanu na vavali malonga a ngolinde atanu na avali aje ashulile na vukalu vwa Njambi, uje wayoya ku myaka na myaka.

⁸ Co Njuvo ya Shukulu Kalunga yashululile na vwisi vwakutunda ku vumpau na nzili ya Njambi, co naumo wai wasele kukovela mu Njuvo ya Shukulu Kalunga kuvanga noo tuyando tutanu na tuvali tuje vanenele vaje tungelo vatanu na vavali twawile.