Kujombolola 14 - Livulu lya Shukulu Kalunga

Muna Manga na vanu vendi

¹ Asinoni njakengele, co kuje kwakele Muna Manga wemanene a Munkinda wa Siyone, wemanene na vanu vakupwa 144,000 vaje vavasonekele lizina lyendi na lizina lya Ishe a maholo avo.

² Co njazivile lijwi lyatundile mwilu lyakufwa ngwe kukuma kwa mema a cipupa, ngwe mikalateto ya muhyato wakama. Lyafwile ngwe mwaso uvalinakwimba vaka-kwimba a tulyalya twavo.

³ Vanu vaje vakupwa 144,000 vemanene kukutwe lwa litanda na vikashama vawana vakuyoya na vakulunu, vembile mwaso wauha, uje naumo wai wasele kulilongesawo kuvanga vakevo lika. Vakevo lika vaje vavakulile kutunda akati ka miyati ya vanu voshe.

⁴ Vanapu vanalume vaje vanalinyungu vakevo vavenya kujeneka kulijwalesa na vanakazi, vapwile vaje kanda valimone na vanakazi. Vakakavangeya Muna Manga kwoshe kuje aya. Vanavakulu kutunda akati ka miyati ya vanu voshe, co vanapu vakulivanga kuvana kuli Njambi na kuli Muna Manga.

⁵ Co mu tunwa twavo kumwatuukile makuli, kuvesi na mulonga.

Tungelo vatatu

⁶ Asinoni njamwene kangelo mukwavo alinakupulula mwilu a mukambwila, na lijwi lya Vin̄anda Vyavivwa vyakwambulula kuli vanu va ano asi na ku mafuti oshe ku miyati yoshe na ku vindaka vyoshe na ku vanu voshe.

⁷ Co wendekele na lijwi lyakama ngwendi, “Komokeni Njambi, co shangazaleni vukama vwendi! Omwo simbu inete ngeci asompe vanu voshe. Lemeseni uje watangele lilu na asi na mema a kalunga na masima a mema a tuvwelu-vwelu!”

⁸ Kangelo wamucivali wakavele uje wakulivanga, wendekele ngwendi, “Nau! Mbambilone yakama nau! Uje walingisile vanu voshe kunwa vinyu vya lishungu lya vupangala vwendi.”

⁹ Co kangelo wamucitatu wakavele uje wamucivali, wendekele na lijwi lyakama ngwendi, “Woshe uje alemesa cikashama na kamponya kendi nakutambula cizivukiso nakucaka ku luholo lwendi nambe ku livoko lyendi,

¹⁰ ikeye lalo akanwa ku vinyu vya Njambi, vinyu vya vukalu vwendi, vije kesi vyakukumbasana mu nganja ya vukalu vwendi! Voshe vaje valinga eci vakakala mu n̄avava yakama mu tuhya na sulufa ku mesho a tungelo vakujela na ku mesho a Muna Manga.

¹¹ Co vwisi vwa tuhya twa n̄avava yavo yakama vukalonda mwilu ku myaka na myaka. Co kukukakala simbu yakuhwima mutanya nambe vutsiki kuli voshe vaje valemesa uje cikashama na kamponya kendi na kuli woshe uje ali na cizivukiso ca lizina lyendi.”

¹² Aa akeo vene ali lukakateya kuli vanu va Njambi, vaje vanyunga mashiko a Njambi nakupwa va kulongwa kuli Yesu.

¹³ Asinoni njazivile lijwi lyatundile mwilu lyendekele ngwalyo, “Soneka ngwove, vanavezika vatsi vaje vatsila muli Mwene kutunda ku lelo!” Munzinzime Wakujela wakumbulwile ngwendi, “Mwa vushunga vanavezika! Vakevo vakahwima ku vipangi vyavo vije vaundanganene, omwo fweto ya vipangi vyavo ikavakava.”

Kuteja kwa vimbuto vya ano asi

¹⁴ Asinoni njakengele, co kwakele lishelwa lyakutoka, co uje watumbameneo wafwile ngwe munu, wazalele cilongo ca ngolinde ku mutwe wendi, co wakwatele moko yakutejesa yakuvambuka mu livoko lyendi.

¹⁵ Co kangelo mukwavo watuukile mu Njuvo ya Shukulu Kalunga, co watambekele kuli uje watumbamene a lishelwa ngwendi, “Pangesa moko yove yakutejesa ngeci uteje, omwo simbu yakuteja inete, omwo vimbuto vya ano asi vinahi laja!”

¹⁶ Ngecivene, uje kangelo watumbamene a lishelwa watengulwisilile moko yendi yakutejesa asi, co vimbuto vya asi vavitejele.

¹⁷ Co lalo kangelo mukwavo watuukile mu Njuvo ya Shukulu Kalunga ili mwilu, na ikeye lalo wakele na moko yakuvambuka yakutejesa.

¹⁸ Asinoni kangelo mukwavo uje wakele na moko yakupangesa tuhya watundile ku mutula. Watambekele na lijwi lyakama kuli uje kangelo wakele na moko yakuvambuka yakutejesa ngwendi, “Pangesa moko yove yakutejesa, co vatozola vushuka ku mikolovozi ya vushuka vya vinyu vwa ano asi, omwo vushuka vunahi laja!”

¹⁹ Ngecivene, uje kangelo watengulwisilile moko yendi yakutejesa asi, wavatozwele vushuka ku mikolovozi ya vushuka wa vinyu, co wavumbilile mu cikamwino ca vinyu ca vukalu vwakama vwa Njambi.

²⁰ Co vuje vushuka vavukamwinine mu cikamwino anja ya nganda, co maninga atundile mu cikamwino asindumukile ngwe livazi, co aje maninga asindumukilile kulyala kupwa makilomita 300 mu vulaja, co mu vwihi vwakulova apwile mamita avali.