Kujombolola 13 - Livulu lya Shukulu Kalunga

Vikashama vavali

¹ Asinoni njamwene cikashama atuuka mu mema a kalunga. Wakele na vimbinga likumi na mitwe itanu na ivali, ku mbinga imo na imo kwakele cilongo, co a mutwe umo na umo akele lizina lyakushaula Njambi.

² Co uje cikashama injamwene akumukenga wafwile ngwe ingwe na myanja yendi yalifwile ngwe ya mbeya na kanwa kendi ngwe kanwa ka ndumba. Co uje canza-ngombe waanene nzili yendi na litanda lyendi amo na vukama vwa moko yendi kuli uje cikashama.

³ Mutwe umo wa uje cikashama wafwile ngwe uje uvanavulumuna, oloni ije mbandu yakangukile. Co vaka-asi voshe vakomokele nakukavangeya uje cikashama.

⁴ Munu woshe walemesele uje canza-ngombe omwo wanene moko yendi kuli uje cikashama. Valemesele uje cikashama lalo vendekele ngwavo, “Iyajo walifwa na cikashama? Iyajo asa kumulwisa?”

⁵ Co uje cikashama vamutavesele kwendeka vyuma vyakushaula Njambi, co vamwanene moko ya vingonde makumi awana na vingonde vivali.

⁶ Co washangumukile kushaula Njambi na lizina lyendi na mutambela kuje kwakala na voshe vaje vakala mwilu.

⁷ Co lalo vamutavesele kulwa nzita na vanu va Njambi nakuvafungulula, co lalo vamwanene moko a miyati yoshe ya vanu na vindaka vyoshe na mafuti oshe.

⁸ Vanu voshe vakala ano asi vakamulemesa, kuvanga lika vaje mazina avo vawasonekele simbu kanda vatange kaye mu livulu lya mwonyo lya Muna Manga uje ivatsiile.

⁹ “Ngecivene, tolilileni nga muli na matwi!

¹⁰ Woshe uje vatwala ku vunzinda, mwa vushunga vene akaya ku vunzinda, woshe uje vakatsiya na moko ya mukwale, mwa vushunga vene akatsa na moko ya mukwale. Aa akeo vene anapande lukakateya nakukulaela kuli vanu va Njambi.”

¹¹ Asinoni njamwene cikashama mukwavo alinakutuuka mu livu. Wakele na vimbinga vivali ngwe vimbinga vya muna manga, co wendekele ngwe canza-ngombe.

¹² Ikeye wapangesele moko yakama ya uje cikashama wakulivanga ku mesho endi. Wasindiiye asi na voshe vaje vakalao kulemesa uje cikashama wakulivanga, uje mbandu yendi yakangukile.

¹³ Ou cikashama wamucivali walingile vikomokeso vyakama, wasele kutuma tuhya kutunda mwilu kwija ano asi ku mesho a vanu voshe.

¹⁴ Co wakwisile vanu voshe va ano asi mukulinga vizivukiso na vikomokeso vije vamutavesele kulinga ku mesho a uje cikashama wakulivanga. Uje cikashama wamucivali walekele vanu voshe va ano asi kumunga cifwa ca kamponya kusingimika cikashama uje vavulumwine na moko ya mukwale oloni wayoyele lalo.

¹⁵ Cikashama wamucivali vamutavesele kuhwimina mwonyo mu cifwa ca kamponya wa cikashama wakulivanga, ngeci kaje kamponya kase kwendeka nakutsiya vaje voshe kuvashaka kukalemesa.

¹⁶ Uje cikashama wasindiiye vanu voshe, vavandondo na ava vakama, vaka-kufuka na tuutu, ndungo na vaka-kupatuka, kukala na cizivukiso cakwaka ku mavoko avo a cilyo na a maholo avo.

¹⁷ Naumo wai asa kulanda nambe kulandulula kwakujeneka eci cizivukiso, cikeco lizina lya uje cikashama nambe nambala ije inemanena lizina lyendi.

¹⁸ Eci vacitumbula mana. Woshe uje ali na mana asa kweseka kuwana kulumbunuka kwa nambala ya uje cikashama, omwo nambala eyi inemanena lizina lya munu. Nambala yalyo inapu 666.