Kujombolola 12 - Livulu lya Shukulu Kalunga

Munakazi na canza-ngombe

¹ Asinoni cizivukiso cakama casholokele mwilu. Kwakele munakazi, cikoveyo cendi capwile litangwa, co ngonde yakele mwisi ya myanja yendi na cilongo ca vingongonosi likumi na vivali cakele a mutwe wendi.

² Wakele kuhyehi nakukita, co walilile omwo mushongo na kayando kakukita.

³ Co cizivukiso cakama cikwavo casholokele mwilu. Kwakele canza-ngombe wakama wakuvenga uje wakele na mitwe itanu na ivali na vimbinga likumi, co a mutwe umo na umo akele cilongo.

⁴ Wakokele mutambela wamucitatu wa vingongonosi na mukila wendi kuvitundisa ku mashelwa nakuvyumbila ano asi. Canza-ngombe wemanene kulutwe lwa uje munakazi washakele kukita, ngeci alye uje mwanike omo asemuka.

⁵ Asinoni uje munakazi wakitile mwana wa munalume, uje akashika miyati yoshe ya vanu na mulamu wa cikuvo. Oloni mwana vamuteweselele kulyala nakumutwala kuli Njambi na ku litanda lyendi.

⁶ Co uje munakazi watewelele mu mambo, kuje Njambi wamuvwaeselele mwela, kuje vakamulelelele a matangwa akupwa 1,260.

⁷ Asinoni nzita yashangumukile mwilu. Mingeli na tungelo twendi valwile nzita na uje canza-ngombe, co canza-ngombe na tungelo twendi valwile,

⁸ oloni uje canza-ngombe vamufungulwile, co ikeye na tungelo twendi kuvavatavesele lalo kukala mwilu.

⁹ Co uje canza-ngombe wakama vamumbilile asi, uje linyoka wa ku san̄ulu vatumbula ngwavo Liyavola, uje wakwisile kaye koshe. Vamumbilile asi amo na tungelo twendi voshe.

¹⁰ Asinoni njazivile lijwi lyakama lyendekele mwilu ngwalyo, “Ololo kwamena kwa Njambi kunaija! Ololo Njambi namwesa nzili yendi akupwa Mwene! Ololo Wakuvwavesa wendi namwesa moko yendi! Omwo uje wemanene ku mesho a Njambi yetu nakwana milonga vutsiki na mutanya kuli vaka-kukulaela vanamumbila asi kutunda mwilu.

¹¹ Vamuhyanene a maninga a Muna Manga na a vushunga vuje vambulwile, omwo vakele na cizango cakwecela myonyo yavo noo kutsa.

¹² Co vwaeleleni yeni melu neni mwakalamo! Oloni tuyando kuli yeni ano asi na mu mema a kalunga! Omwo Liyavola nashuluka asi kuli yeni, co nashulu na vukalu, omwo nazivuka ngeci kunasala lika kasimbu kakandondo kuli ikeye.”

¹³ Omo uje canza-ngombe wamwene ngeci vanamumbila ano asi, co washangumukile kukava uje munakazi wakitile mwana wa munalume.

¹⁴ Co uje munakazi vamwanene mambava avali a ngonga wakama ngeci apulwile ku mutambela wendi mu mambo, kuje vakamulelela a myaka itatu na vingonde vitanu na imo mukumwamena ku vushonde vwa uje canza-ngombe.

¹⁵ Uje canza-ngombe washanjele mema akutunda mu kanwa kendi ngwe livazi lya ndonga kukava uje munakazi, ngeci livazi lya mema aje likakupule uje munakazi.

¹⁶ Oloni kaye kakwasele uje munakazi, co keshamene kanwa kako nakuleula aje mema atundile mu kanwa ka uje canza-ngombe.

¹⁷ Co uje canza-ngombe waluvalele manene na uje munakazi, co welukile mukukalwisa naanga ya uje munakazi vaje vasaleleo, vaje voshe vononoka mashiko a Njambi na kulongwa ku vushunga vuje vwajombolwele Yesu.

¹⁸ Co uje canza-ngombe wemanene a lishen̄avu lya ku ngenge ya mema a kalunga.