Kujombolola 11 - Livulu lya Shukulu Kalunga

Vakaleo vavali

¹ Asinoni vanjanene citi, cije califwile ngwe citi cakusetekesa, co vanjilekele ngwavo, “Ya ukaseteke Njuvo ya Shukulu Kalunga na mutula, co lava vaje valinakulemesela mu Njuvo ya Shukulu Kalunga.

² Oloni kesi ukaseteke vimbanja vyayo vya anja, omwo vanavyana kuli vaka-kujeneka kukulaela vaje vakalyatangela Nganda Yakujela a vingonde makumi awana na vingonde vivali.

³ Co njikatuma vakaleo vange vavali, vakazala vikeleya, co vakambulula muzimbu wa Njambi a matangwa aje akupwa 1,260.”

⁴ Vaje vakaleo vavali vanapu miti ivali ije ya olive na vindeye vivali vije vinemana ku mesho a Mwene wa asi.

⁵ Nga umo akeseka kuvavulumuna, co tuhya tukatunda mu tunwa twavo tukanyongesa vitozi vavo, co mu ngila eyi vene woshe akeseka kuvavulumuna vakamutsiya.

⁶ Vali na moko yakuvindika mashelwa ngeci nyonzi kesi inyoke simbu vacili nakwambulula lijwi lya Njambi. Vali lalo na moko a mema a tuvwelu-vwelu, kuwatengulula ngeci apwe maninga, vali lalo na moko yakuviisa kaye na miyati yoshe ya tuyando mwoshe-imwoshe muje muvashaka kulinga.

⁷ Omo vanamanesa kwambulula lijwi lyavo, cikashama uje akatuuka muje mu mbulu ije kuyesi naa masima akalwa nzita navo. Akavahyana nakuvatsiya,

⁸ co mivila yavo vakailangeka mu tapalo ya nganda yakama, kuje kuvashukikilile Mwene yavo. Cizivukiso ca lizina lya nganda ije lyapwa Sondoma nambe Ingito.

⁹ Vanu va ku miyati yoshe na ku vindaka vyoshe na ku mafuti oshe, vakelula vivimbi vyavo a matangwa atatu na litambelo, co kuvakavatava kuvatsinda.

¹⁰ Vanu vaka-asi vakajolela a kutsa kwa ava vanu vavali, vakalisamba nakutumisa mavwana kuli umo na mukwavo, omwo vaje vaka-kwimanena vavali vanenele tuyando twakama manene a vanu va ano asi.

¹¹ Munima ya matangwa atatu na litambelo, co muku wa mwonyo watundile kuli Njambi wakovelele muli vakevo, co vemanene, co voshe vaje vavamwene vazivile lyova.

¹² Asinoni vaje vaka-kwimanena vavali vazivile lijwi lyakama lyakutunda mwilu lyendekele kuli vakevo ngwalyo, “Ijeni kuno kwilu!” Co valondele mwilu mu lishelwa oku vitozi vavo vanavakengelela.

¹³ Co a simbu ije vene kwakele mandunduma akama, mutambela wamulikumi wa nganda wasiwukile, co vanu vakupwa 7,000 vatsile, vaje vasaleleo vazivile manene lyova, co vashangazalele vukama vwa Njambi wa mwilu.

¹⁴ Kayando kamucivali kaneti, oloni kenga, kayando kamucitatu kalinakwija vwasi-vwasi!

Lupembo lwamucitanu na luvali

¹⁵ Asinoni kangelo wamucitanu na vavali wembile lupembo lwendi, co kwakele majwi akama mwilu endekele ngwawo, “Nzili yakushwana kaye ololo inakundama kuli Mwene yetu na Wakuvwavesa wendi, co akashwana myaka yoshe!”

¹⁶ Asinoni vaje vakulunu makumi avali na vawana vaje vanatumbama a matanda avo ku mesho a Njambi valyumbilile asi na vihanga vyavo vyakwatele mu livu, co valemesele Njambi,

¹⁷ ngwavo, “Shukulu Kalunga Njambi Muka-nzili yoshe, uje aliko, uje wakeleko! Tukukandelela omwo unatambula nzili yove yakama, co unashangumuka kushwana!

¹⁸ Vaka-kujeneka kukulaela vashulile na vukalu, omwo simbu ya vukalu vwove inete, simbu yakusompa vatsi. Simbu inete yakwana cikandelela kuli vangamba vove vaka-kwimanena, na kuli vanu vove voshe, voshe vaje vakukomoka, vakama na ava vavandondo. Simbu inete yakunyongesa vaje vanyongesa kaye!”

¹⁹ Asinoni Njuvo ya Shukulu Kalunga ya mwilu yashokolokele, na Cikasa ca Cikumiiyo vacimwene muje. Asinoni kwakele kuvyakula kwa mihyato na mikalateto nakujaja kwakama kwa kaye na cililimo na nyonzi yakama ya mamanya.