Kujombolola 10 - Livulu lya Shukulu Kalunga

Kangelo na livulu lyalindondo lyakuzenga

¹ Asinoni njamwene lalo kangelo mukwavo wa nzili washulukile kutunda mwilu. Wazalele lishelwa na nkongolo yazengelekele mutwe wendi, co cihanga cendi cafwile ngwe litangwa na myanja yendi yafwile ngwe vimanda vya tuhya.

² Wakele na kalivulu kakandondo kakuzenga kakufukuka mu livoko lyendi. Walyatele lindi lyendi lya cilyo a mema a kalunga, co lindi lyendi lya cimoshwe walyatele a nunda,

³ co watambekele na lijwi lyakama lije lyafwile ngwe kwaana kwa vindumba. Co munima yakutambeka, vililimo vitanu na ivali vyakumbulwile nakwaana ngwe ndumba.

⁴ Vwasi-vwasi omo vikeyo vyendekele, aje vene njashakele kusoneka, oloni njazivile lijwi lyendeka kutunda mwilu ngwalyo, “Nyunga mu mbunge yove lika vije viinendeka evi vililimo vitanu na vivali, kesi uvisoneke!”

⁵ Asinoni uje kangelo injamwene nemana a mema a kalunga na a nunda wolwele livoko lyendi lya cilyo mwilu,

⁶ co walisingile mu lizina lya Njambi, uje wayoya ku myaka na myaka, uje watangele lilu na asi na mema a kalunga na vyuma vyoshe vilimo. Co kangelo wendekele ngwendi, “Vyuma evi kuvyapandele kwishwala embwe!

⁷ Oloni omo uje kangelo wamucitanu na vavali akaimba lupembo lwendi, asinoni Njambi akasholola cisin̄iko ca vutumbe vwendi, ngwe muje mwambulwile kuli vangamba vendi vaka-kwimanena.”

⁸ Asinoni lijwi lije njazivile lyakutunda mwilu lyendekele kuli yange lalo ngwalyo, “Ya ukanone lije livulu lyakuzenga lyakufukuka lije lili mu livoko lya uje kangelo nemana a mema a kalunga na a nunda.”

⁹ Ngecivene, njaile kuli uje kangelo nakumulomba ngeci anjane kaje kalivulu kakandondo. Wendekele kuli yange ngwendi, “Kanone ukalye, kakapwa kakulula mwimo lyove, oloni mu kanwa kove kakapwa kakupwelelela ngwe vuki.”

¹⁰ Co njanonele kaje kalivulu kakandondo mu livoko lyendi nakukalya, co kapwile kakupwelelela mu kanwa kange ngwe vuki. Oloni omo njinakali, co katengulukile kupwa kakulula mwimo lyange.

¹¹ Asinoni vanjilekele ngwavo, “Yove unapande kwambulula lijwi lya Njambi ku mafuti a mangi na ku vanu vavangi na ku vindaka vyavingi na ku vimyene vavangi.”