Kolose 4 - Livulu lya Shukulu Kalunga

¹ Eni vashukulu, lingeni mwamuvwa na vushunga kuli vindungo veni. Anukeni ngweni neni muli na Shukulu.

Vilongesa

² Kakateyeni mu malombelo, co pweni vaka-kukengelela omo mulombela, nakukandelela kuli Njambi.

³ Tulombeleleniko netu lalo, ngeci Njambi atwane simbu yaivwa yakwambulula lijwi lyendi, a vyakushweka vya Kilistu. Omwo a cuma eci ngeci yange njili mu kamenga ololo.

⁴ Ngecivene, lombeleni, ngeci yange njendeke nakusimpa mu ngila yakutungukwa.

⁵ Pweni vakunyanyama mu ngila ije mulinakulinga kuli vaje kanda vakulaele, kupangesa simbu yoshe ije mulinavyo.

⁶ Endekesi yeni simbu yoshe inapande kupwa yaivwa ya mbwase nakuvwaelelesa, co zivukeni vati mu munapande kukumbulwila mwamuvwa kuli vanu voshe.

Viindu vyakumanesela

⁷ Musamba wetu itwazema Taikikase, uje napu muka-kupanga wa kulongwa na ngamba mukwetu mu vipangi vya Mwene, akamileka muzimbu woshe wa ali yange.

⁸ Eci cikeco cuma njilinakumutumina kuli yeni, ngeci akumivwaelelese akumileka vati yetu voshe mutunendukila.

⁹ Ikeye njinatumu na Onesimasi, ndolome yetu itwazema wa kulongwa, uje wakundama ku munga yeni. Vakevo vakamileka vyuma vyoshe vyalingiwa kuno.

¹⁰ Alisitakase, uje njili nendi mu kamenga, natumu viindu kuli yeni, amo na Mako lalo, mwehwa wa Mbanambase. (Yeni mwatambula laja vilongesa kumutambula mwamuvwa nga ikeye aija kuli yeni.)

¹¹ Yoshwa, uje vatumbula lalo ngwavo Yusitase, nendi lalo natumu viindu kuli yeni. Ava vatatu vakevo lika vanapu vaYunda vaka-kukulahela valinakupanga nange ku vipangi vya Vumwene vwa Njambi, co vakevo vananjikwasa.

¹² Viindu vyeni kuli Epafalase, mukweni umo wakundama ku munga yeni uje napu ngamba ya Kilistu Yesu. Ikeye simbu yoshe akamyanuka mu malombelo endi, nakulomba Njambi ngeci amikolese nakwimana mbe, ngwe vaka-Yesu vanakolo mu vu Yesu, na na mukwononoka kwoshe ku cizango ca Njambi.

¹³ Yange vene njasa kupwa mukaleo wakushula kukuundangana kwendi omwo yeni na omwo vanu va mu Laondisiya na mu Halapolise.

¹⁴ Luka, cimbanda cetu itwazema, na Ndemase vanatumu viindu kuli yeni.

¹⁵ Aneni viindu vyavivwa kuli vaka-kukulaela vali mu Laondisiya na kuli Nifa na cikungulukilo cije vakakungulukila mu njuvo yendi.

¹⁶ Omo munalava laja ou mukanda, kengeni ngeci mukanda ou vaulave lalo mu cikungulukilo ca mu Laondosiya. A simbu imolika, co laveni lalo uje mukanda uvakatuma vaka-kukulaela va mu Laondisiya.

¹⁷ Co lekeni Acipase ngweni, “Kenga ngwove unamanesa vipangi vije vivakwanene mukupangela Mwene.”

¹⁸ Na livoko lyange vene vavenya njasoneka ngwange, “Viindu vyakutunda kuli Paulu.” Kesi mwivale malyenge ange! Kutetela kwa Njambi kukale amo neni.