Kolose 2 - Livulu lya Shukulu Kalunga

¹ Njishaka ngwange muzivuke vati njapangele na nzili omwo yeni na omwo vanu va mu Laondisiya na kuli voshe vaje kanda vacinjimone.

² Njilinakulinga eci ngeci vashule nakulitakamesa, co valitunge amolika mu cizemo namukushula kwa vufuko vuje vunena kuzivisisa. Mu ngila eyi vene, vakazivuke cisin̄iko ca Njambi, cikeco cinapu Kilistu vavenya.

³ Ikeye wapwa sapi yakusholola vufuko vwa Njambi vwakushweka vwa mana na kuzivisisa.

⁴ Ngecivene, njimileka ngwange, kesi mutave munu umo amikwise na vinguli vya makuli, nambe vikevyo vyavwaa vati.

⁵ Omwo nambe yange kunjesi neni amo mu muvila, oloni njili neni mu munzinzime, co yange njilinakujolela mukumona cizango ceni cakwimana amolika mukukulaela kweni muli Kilistu.

Kuyoya kwakushula muli Kilistu

⁶ Ngwe omo munatambula Kilistu Yesu kupwa Mwene, co yoyeni muli ikeye.

⁷ Mizi yeni ishalave manene muli ikeye, tungileni myonyo yeni ali ikeye, co pweni vaka-nzili manene mukukulaela kweni, ngwe muje muvamilongesele. Co shuleni nakukandelela.

⁸ Kengeni ngeci naumo wai akamipwise vindungo na mana endi a vunu a makuli, aje atunda ku vilongesa vya vanu na ku minzinzime ya ano a kaye ije ilinakushwana, co kuwatundile kuli Kilistu.

⁹ Omwo kushula kwa vu Njambi vwoshe vwakala muli Yesu, mu vunu vwendi,

¹⁰ co akukala muli ikeye, yeni vanamyana kushula kwa mwonyo. Ikeye napu mutwe wa minzinzime yoshe ije ilinakushwana na vaka-moko yoshe.

¹¹ Akukala muli ikeye, yeni vamituwile, kesi nakutuuka kwakulinga kuli vanu embwe, oloni nakutuuka kwakulinga vavenya Kilistu, kukemwo kupatuka kwakutunda ku nzili ya vuvi vwa muvila ou.

¹² Omo vamimbwitikile, vamitsindile amo na Kilistu, co akumimbwitika lalo vamisangwile amo na Kilistu akukulaela kweni ku nzili ya vipangi vya Njambi, uje wamusangwile ku kutsa.

¹³ A simbu imo mwatsile ku munzinzime omwo a vuvi vweni, omwo mwapwile vaje kesi vaYunda vakujeneka Lishiko. Oloni ololo Njambi naminena ku mwonyo muli Kilistu. Njambi watusambesele vivi vyetu vyoshe,

¹⁴ watundisile cishimbikiya ca makongo etu na mshiko aco, co wacitundisile akucishukika a cilindakano.

¹⁵ Co a cilindakano cije Kilistu walipatwile ikeye vavenya kutunda ku nzili ya minzinzime ije ilinakushwana na moko ya vaka-kushika, walingile eci mutanya mwelu kuli vakevo akuvatwamenena ngwe vinzinda mukuhyana kwendi.

¹⁶ Ngecivene, kesi mutave umo amishike a vije mulya nambe vije munwa nambe a matangwa akujela nambe a Ciwano ca Kutenama kwa Ngonde nambe a Litangwa Lyakuhwima.

¹⁷ Vyuma vyoshe evi vinapu munzinze wa vyuma vikasholoka kulutwe, oloni cuma mpundu cinapu Kilistu.

¹⁸ Kesi mutave vamihise kuli umo uje alisholola ikeye vavenya kupwa wakama omwo a vimona vimo vije endeka akulilumbilisa kwa makuli nakulemesa tungelo. Omwo vanu va cifwa cangacije vakalyalesa na viyongola vyavo vya vunu,

¹⁹ co vanalikela kukakateya kuli Kilistu, uje napu mutwe wa muvila. Ali Kilistu muvila woshe vanaulisa nakuukwatesa amolika omwo a manunga na mishisha, co ulinakukola ngwe muje Njambi ashaka ngeci ukolelemo.

Kutsa nakuyoya muli Kilistu

²⁰ Yeni munatsi amo na Kilistu, co vanamipatula kutunda ku minzinzime ije ilinakushwana ano a kaye. Ngecivene, omwo vikajo mulinakuyoya ngwe mwakundama ku kaye kano? Omwo vikajo mucili nakwononoka ku mashiko a cifwa cangacije ngwavo,

²¹ “Kesi mukwate cuma eci” “Kesi mumakele cuma cije,” “Kesi mukwateko vyeka”?

²² Vyuma vyoshe evi vilumbununa vyuma vije vipwa vyakujeneka seo anima yakuvipangesa, vinapu lika mashiko na vilongesa vya vanu.

²³ Mwa vushunga vene, mashiko awa asholoka kupwa akukundama a mana mukusindiya kwavo kwakulemesa tungelo nakulilumbilisa kwa makuli nakuyandesa mivila manene, oloni akewo kuwesi na seo mukuvindika mashungu a ku muvila.