Isaya 9 - Livulu lya Shukulu Kalunga

¹ Kukukakala lalo ngila yeka kuli vakevo yakutewelamo simbu eyi ya tuyando. Lifuti lya muyati wa Zembuloni na Nafetali akulivanga vavazindile Oloni kulutwe lifuti eli vakalisingimika kushangumukila ku Mema a Kalunga a Menditelenyani nakweta ku mutambela ukwavo wa lifuti lya Yondau noo ku Ngalileya kuvatungile vaka-kwija.

Kuli yetu kunasemuka mwana

² Vanu vaje vendele mu lisusulungu vanamono ceke cakuvyazima manene. Vanu vaje vakele mu lifuti lya munzinze wa kutsa, ololo ceke cinavatwila.

³ Yove Shukulu Kalunga unatumisa muyati wavo, vanavwaelela ku mesho ove ngwe muvakavwaelela vaka-kupanga omo vateja vimbuto, nambe ngwe muvakavwaelela mashwalale omo valipangela vufuko vwakupukula.

⁴ Omwo unapokola mandauluwa ya vaje vayandesele nakupakesa vanu vove, unafungulula muyati uje wayandesele nakulinga mwamuvi vanu vove ngwe muwafungulwile mashwalale va Mindyani laja.

⁵ Vin̄aku vya mashwalale va nzita na vuzalo vwavo vuje vunaviya na maninga vakavyenyeka na tuhya.

⁶ Omwo kuli yetu kunasemuka mbututu! Vanatwana mwana wa munalume! Co akapwa muka-kutushwana. Vakamutumbula ngwavo, “Muka-kunangula Wakukomokesa.” “Njambi Muka-nzili yoshe” “Tate wa ku Myaka Yoshe.” “Mwene wa Kwoloka.”

⁷ Nzili yendi ikakola mbe, co vumwene vwendi vukapwa vwa kwoloka simbu yoshe. Ikeye akainga ali Mwene Ndaviti. Akakolesa nzili yendi a mashiko a vushunga, kutunda ololo nakweta ku shongo. Shukulu Kalunga Muka-nzili yoshe akamona ngeci vyuma vyoshe evi vinapande kulingiwa.

Shukulu Kalunga akahisa Isalele

⁸ Shukulu Kalunga akasompesa vumwene vwa Isalele ali vatekulwila va Yakomba.

⁹ Vanu va Isalele voshe, na vaje vakele mu nganda ya Samaliya, vakazivuka ngeci Shukulu Kalunga ikeye nalingi evi. Oloni vakevo vaka-kulyalesa na vaka-kulyaka ku vukama, vakendeka ngwavo,

¹⁰ “Nambe vinjuvo vya vindopi vyalundumukila asi, oloni tukatunga vinjuvo vyeka vya mamanya akushonga. Nambe vanashinji miti ya mikuyu, oloni tukengisamo miti yaivwa ya kendale.”

¹¹ Shukulu Kalunga nashangumuna vitozi va Lezine ngeci vavalwise.

¹² Lifuti lya Silya mu ngangela na lifuti lya Filisitiya mu kangombe ka yambi, vaneshama tunwa twavo ngeci vamine Isalele. Nameme ngoco vukalu vwa Shukulu Kalunga kuvwahwililileo embwe, oloni anga nolola livoko lyendi mukuhisa.

¹³ Vanu va Isalele kuvatengulukile embwe, nameme Shukulu Kalunga Muka-nzili yoshe navahisa, oloni kuvatengulukilile kuli ikeye.

¹⁴ A litangwa limolika, Shukulu Kalunga akahisa vantwama va Isalele na vanu vayo. Ikeye akavavatozola mutwe wavo na mukila wavo.

¹⁵ Vakulunu na vanalume va kasingimiko vanapu mutwe, co vaka-kwimanena va vilongesa vya makuli vanapu mukila!

¹⁶ Vaje vatwamenena vanu ava valinakuvongumuna nakuvazimbalesa.

¹⁷ Ngecivene, Shukulu Kalunga kakatava vakwenje ngeci vaputumukeo, co kakazivila lalo mema ku mbunge vifwile nambe visiwa, omwo vanu voshe vanapu vaka-kujeneka kukulaela, co vanapu vaka-vuvi, na vyuma vyoshe vendeka vinapu vya vuvi. Nameme ngoco, vukalu vwa Shukulu Kalunga kuvukahu, oloni anga akolola livoko lyendi mukuvahisa.

¹⁸ Vuvi vwa vanu vushukuma ngwe tuhya twenyeka mambimbo na mishwena. Vushukuma ngwe likuna lya mu shwata lije lilinakwezoka milangi ya tuhya.

¹⁹ Omwo Shukulu Kalunga Muka-nzili yoshe naluvala, cihiso cendi cilinakushukuma ngwe tuhya mu lifuti mwoshe nakunyongesa vanu, co naumo wai akamena ndolome yendi.

²⁰ Co mu lifuti mwoshe vanu vakanyangula nakulya tuvyakulya tumo tuvasa kuwana, oloni kuvakasa kukuta. Valya nameme vene vana vavo!

²¹ Vanu va Manase na vanu va Efalime valinakulilwisa vakevo vavenya, co vatenguluka nakulwisa Yunda. Oloni nameme ngoco, vukalu vwa Shukulu Kalunga kuvukahu, anga nolola livoko lyendi mukuhisa.