Isaya 8 - Livulu lya Shukulu Kalunga

Muna Isaya napu cimweso kuli vanu

¹ Shukulu Kalunga wendekele kuli yange ngwendi, “Nona citale cakama usonekeo malaka akama ngwove, ‘Mahele Shalale Hashe Mbaze.’

² Ambata vanalume vavali va kulongwa, Uliya muka-kukombelela na Zekaliya muka-kukombelela muna Njevelekiya, kupwa vakaleo.”

³ Mwetile simbu yaindondo, munakazi wange wakele na limo. Omo munetu wasemukile, co Shukulu Kalunga wendekele kuli yange ngwendi, “Muluke lizina ngwove, ‘Mahele Shalale Hashe Mbaze.’

⁴ Simbu kanda mwanike azivuke kusana ‘Nana’ nambe ‘Tate,’ vufuko vwoshe vwa mu Ndamasiku na vyuma vya seo vyoshe vya mu Samaliya vakavyambata kuli mwene wa Asilya.”

Mwene wa Asilya alinakwija

⁵ Shukulu Kalunga wendekele kuli yange lalo ngwendi,

⁶ “Omwo vanu ava vanavyana mema a mu Shiloahe aje enda mwamuvwa nakuziva lyova ku mesho a Mwene Lezine na Mwene Peka,

⁷ yange Kalunga, njikanena mwene wa Asilya na mashwalale vendi voshe ngeci vakulwise Yunda. Vakaija ngwe livazi lya mema a mu Ndonga ya Yufuleti, aje ajalela ku ngenge yayo yoshe.

⁸ Vakakovela mu lifuti lya Yunda mwoshe, ngwe livazi lyakusikisila mu mukoshi nakukupula vyuma vyoshe.” Njambi ali amo netu! Najangumuna mambava endi mukunyunga lifuti.

⁹ Kungulukileni amolika na lyova, yeni vanu! Tolilileni, yeni muli ku mitambela yakujela ya ano asi. Livwaeseleni cimweja kulwa nzita, oloni ziveni lyova! Eyo, livwaeseleni cimweja, oloni ziveni lyova!

¹⁰ Tumbeni matumbe eni! Oloni akapwa angoco. Endekeni vyoshe vimushaka! Oloni vyoshe vikapwa vyangoco, omwo Njambi ali amo netu.

Shukulu Kalunga anangula muka-kwimanena

¹¹ Shukulu Kalunga wanjikwatele na livoko lyendi lya nzili wanjinangwile ngeci kesi njende mu ngila ije ivalinakwenda vanu. Wendekele ngwendi,

¹² “Kesi ukovele ku vutumbe vwa vanu, co kesi uzive lyova lya vyuma vije vivatewa.

¹³ Anuka ngeci yange Kalunga Muka-nzili yoshe, njapwa wakujela, yange lika imunapande kukomoka.

¹⁴ Omwo Akujela kwange kwakukomokesa, njapwa ngwe limanya lyakutanukisa vanu, njapwa ngwe mweto wakukwikiya vanu va vumwene vwa Yunda na Isalele, na vanu va Yelusalema.

¹⁵ Vavangi vakatanuka, vakawa nakutsenuka. Co vakavafungulula nakuvakokela kulyala.”

Kunangula akwihula vaka-kutsa

¹⁶ Yeni vandongisi vange, munapande kunyanyama nakunyunga majwi aje ananjana Njambi.

¹⁷ Shukulu Kalunga nalishweke ikeye vavenya kuli vanu vendi, oloni yange njinamukulaela, co njinaka cinyangavili cange muli ikeye.

¹⁸ Yange uno, na vana vaje vananjana Shukulu Kalunga. Tunapu tu vimweso mu Isalele vyakutunda kuli Shukulu Kalunga Muka-nzili yoshe uje wakala a Munkinda wa Siyone.

¹⁹ Oloni vanu vakamileka kwihula majwi kuli vaka-kulukiya na kuli vaka-kwendeka na vakulu, na vaka-kuningita. Vakendeka ngwavo, “Vanu vanapandele kwihula majwi akutunda ku minzinzime nakwihula vatsi kwimanenako vaka-kuyoya.”

²⁰ Co yeni vakumbululeni ngweni, “Tolilileni ku vije vyamilongesa Shukulu Kalunga! Kesi mutolilile kuli vaka-kwendeka na vakulu mbwe, vije vivamileka kuvyasa kumikwasa.”

Simbu ya tuyando

²¹ Vanu vakendangana mu lifuti vakamona kukaluwa na njala. Omo vakaziva njala na vukalu, co vakasinga mwene yavo na Njambi yavo. Vakakenga mwilu,

²² nakukenga lalo asi, oloni vyai vakamona, vakamona lika tuyando na lisusulungu, lisusulungu lyakuzivisa lyova muje muvakavombila.