Isaya 63 - Livulu lya Shukulu Kalunga

Shukulu Kalunga ahyana miyati

¹ “Iyajo ou alinakwija atunda ku nganda ya Mbozile mu Endome nazala vuzalo vwavuvwa manene vwakuvenga? Ou alinakuya kulutwe na nzili?” “Ikeye Shukulu Kalunga, uje ali na nzili yakwamena, alinakwija mukwambulula kuhyana kwendi.”

² “Omwo vikajo vuzalo vwendi vuvenga ngacije, ngwe muka-kukamuna vushuka vwa vinyu?”

³ Shukulu Kalunga alinakukumbulula ngwendi, “Njinalyatangela miyati ya vanu ngwe mikolovozi ya vushuka vwa vinyu, co naumo wai wezile mukunjikwasa. Njavalyatangelele na vukalu vwange, co maninga avo anatasanga a vuzalo vwange vwoshe.

⁴ Njalingile ngeci omwo simbu yakwamena vanu vange inete, yapwile simbu yakulinga shambandinga vitozi vavo.

⁵ Naumo wai wanjikwasele. Livoko lyange lya nzili lyahyanene nzita, omwo vukalu vwange vwalitakamesele.

⁶ Mu vukalu vwange njalyatangelele miyati ya vanu voshe nakuvatsena. Njetilile maninga avo asi oshe.”

Vuvwa vwa Shukulu Kalunga ku Isalele

⁷ Njikambulula vya cizemo cije kucesi kutenguluka, ca Shukulu Kalunga, njikamushangazala a vyoshe vije vyanatulingila. Navezikisa manene vanu va Isalele, omwo yakutetela kwendi na cizemo cije kucesi kutenguluka.

⁸ Shukulu Kalunga wendekele ngwendi, “Mwa vushunga vapwa vanu vange, kuvasa kunjikwisa embwe.” Ngecivene, wavamenene

⁹ ku tuyando twavo twoshe. Kesi kangelo embwe, oloni Shukulu Kalunga vavenya wavamenene. Mu cizemo cendi na mukutetela kwendi ngeci wavapatwile. Simbu ya kunima wakele nakuvanyunga,

¹⁰ oloni vanu vendi vamutengulukilile nakumulwisa nakulingisa vusiwa Munzinzime wendi Wakujela. Ngecivene, Shukulu Kalunga wapwile citozi cavo nakuvalwisa.

¹¹ Oloni vanu vendi vanukile vyuma vyakulaja, a matangwa a Mosesa, ngamba ya Shukulu Kalunga, co vehwile ngwavo, “Shukulu Kalunga ali kulijo ololo, uje waamenene vantwama va vanu vendi ku mema a kalunga? Shukulu Kalunga ali kulijo, uje waanene Munzinzime wendi kuli Mosesa?

¹² Nzili ya Shukulu Kalunga yapangesele Mosesa vyuma vyakama, uje wemikile mema a kalunga nakutwamenena vanu vendi a nzinga, ngeci lizina lyendi litsimane ku myaka yoshe.”

¹³ Shukulu Kalunga wavatwamenenene mu vinzinga vyakulova, co vendele mwamuvwa ngwe tuvalu vaje valyendela ngoco kujeneka kutanuka.

¹⁴ Munzinzime wa Shukulu Kalunga wavanene kuhwima mwamuvwa ngwe vingombe vawana kuhwima omo vavatwamenena ku cana ca mwila wauvwa. Lizina lya Shukulu Kalunga valishangazalele akulinga vyuma vyoshe evi.

Malombelo aa kutetela nakukwasa

¹⁵ Shukulu Kalunga, kenga ali yetu oku uli mwilu, mwimbo lyove lya vumpau. Kuma lajoko unatwivala ndi? Nzili yove ilikulijo? Cizemo cove nakutetela vilikulijo? Kesi utuyengule.

¹⁶ Yove wapwa u tatetu. Vakukulwila vetu Avilahama na Yakomba vonwele kutukwasa, oloni yove Shukulu Kalunga unapu u tatetu, uje muka-kutwamena ku visimbu vyoshe.

¹⁷ Omwo vikajo unatwecelela tutunde kuli yove? Omwo vikajo unakaluwisila vimbunge vyetu ngeci kesi tukukomoke? Iluka, yetu tunapu vangamba vove na vanu vove simbu yoshe.

¹⁸ Yetu, vanu vove vakujela, vitozi vetu vatutundisile mu lifuti lyetu kasimbu kakandondo lika, vitozi vetu vasiwile Njuvo yove yakujela.

¹⁹ Ulinakutupangesa ngwe kesi yove wapwile u ntwama yetu, ngwe kesi tu vanu vove.