Isaya 61 - Livulu lya Shukulu Kalunga

Muzimbu wauvwa wakupatuka

¹ Shukulu Kalunga wa Akamwa ya Vyoshe nanjishulisa na Munzinzime wendi. Nanjangula nakunjituma mukutwala muzimbu wauvwa kuli tuutu. Mukukolesa vaka-vimbunge vyakupokoka. Mukwambulwila vinzinda kupatuka, nakupatula vaje vali mu kamenga.

² Nanjitumu mukwambulula ngeci simbu inete omo Shukulu Kalunga akaamena vanu vendi, nakufungulula vitozi vavo. Nanjitumu mukuzembeleka voshe vaje valinakulila,

³ nakwana kuli vaje valinakulila mu Siyone kuvwaelela nakujolela. Mwaso wakushangazala ukakalako kwinga mu mwaso wa vusiwa. Vakafwa ngwe miti ije yanakunu vavenya Shukulu Kalunga. Voshe vakalinga vya vushunga, co vakashangazala Njambi a vije vyanalingi.

⁴ Vakatungulula vinganda vije vyapwile vingundu.

⁵ Vanu vange, vaka-kwija vakamipangela. Vakanyunga matanga eni nakulima mahya eni nakunyunga miti ya vinyu.

⁶ Oloni yeni mukapwa vaka-kukombelela na vangamba va Shukulu Kalunga Njambi yetu. Vufuko vwa mafuti vukapwa vweni, na kulyalesa ngeci vunapu vweni.

⁷ Shwamwa yeni nakushauka kweni vikahwa. Mukakala mu lifuti lyeni vavenya. Co vufuko vweni vakavuwezelela luvali, kujolela kweni kukapwa kwa myaka yoshe.

⁸ Shukulu Kalunga alinakwendeka ngwendi, “Njazema vushunga, co njizinda vaka-kuyandesa na muuka. Njikana cikandelela vanu vange cakulikumiiya navo, cikumiiyo ca myaka yoshe.

⁹ Vakatsimana akati ka miyati ya vanu, munu woshe uje akavamona akavazivuka ngeci vanapu vanu vaje vanjinavezikisa.”

¹⁰ Yelusalema ijolela omwo vije vyanalingi Shukulu Kalunga. Shukulu Kalunga nafu ngwe shombolwa nazala vuzalo vwa vushombolwa. Njambi namwamena nakumuhyanesa.

¹¹ Mwa vushunga ngwe vimbuto vilinakumena nakukola, Shukulu Kalunga wa Akamwa ya Vyoshe akaamena vanu vendi, co miyati ya vanu voshe vakamushangazala.