Isaya 60 - Livulu lya Shukulu Kalunga

Vumpau vwa kulutwe vwa Yelusalema

¹ Induka, Yelusalema, vyazima ngwe litangwa, omwo ceke cove cinaija, na vumpau vwa Shukulu Kalunga vulinakuvyazima ali yove!

² Lisusulungu likafwika miyati yeka, oloni ceke ca Shukulu Kalunga cikavyazima ali yove, ceke cendi cikakala amo nove.

³ Miyati ya vanu vakavashwenyesa ku ceke cove, co vimyene vakavashwenyesa ku litangwa lyove lyaliha.

⁴ Kenga mesho ove noku-noku, umone vije vilinakulingiwa, vanu vove valinakukunguluka vaije kwimbo! Vana vove va vanalume vakatunda kulyala, vana vove va vanakazi vakavambata ngwe vana vavandondo.

⁵ Ukamona vyuma evi, co ukajolela manene, co mbunge yove ikashula nakujolela. Vufuko vwa miyati ya vanu veka vakavunena kuli yove, vukatunda musambwa ya mema a kalunga.

⁶ Matanga akama a tumelo, akatunda ku Mindyani na Efa. Vanu va Shemba vakanena ngolinde, na insense mukushangazala Shukulu Kalunga!

⁷ Vimanga voshe va ku Kendale na ku Nembayote Vakavanena kuli yove mukuvakombelela. Vakavakombelela a mutula mukuvwaelelesa Shukulu Kalunga. Co njikashangazala Njuvo yange ya vumpau.

⁸ Mato avikajo awa alinakupekumuka ngwe mashelwa? Ngwe tutela vaje veluka ku mashwa avo?

⁹ Anapu mato aje atunda ku mafuti a kulyala, ali na kwilwisa vanu va Njambi kwimbo lyavo. Valinakwiluka na siliva na ngolinde, mukusingimika lizina lya Shukulu Kalunga, Njambi wakujela wa Isalele, uje nalingisa miyati ya vanu voshe ngeci vasingimike vanu vendi.

¹⁰ Shukulu Kalunga alinakwendeka ku Yelusalema ngwendi, “Yelusalema, vaka-kwija vakatungulula vivumbe vyove, co vimyene vavo vakakupangela. Njakuhisile omwo vukalu vwange, oloni ololo njikakumwesa kutetela kwange, na mema ku mbunge ange.

¹¹ Vikolo vyove vikashokoloka mutanya na vutsiki, ngeci vimyene va miyati ya vanu yeka vakunenele vufuko vwavo.

¹² Miyati ya vanu vaje vakavyana kukupangela vakainyongesa njwa.

¹³ “Viti vya tulipi, na njunipa, na sipelese, viti vyavivwa vya mu shwata ya Lembanone, vakavinena mukukutungulula yove Yelusalema, mukuvwaesa vuvwa Njuvo yange, nakulingisa vumpau nganda yange.

¹⁴ Vatekulwila va vaje vakuyandesele vakaija nakutsikama kuli yove mukumwesa kasingimiko kavo. Voshe vaje vakuyeluwisile vakatsikama kuli yove, nakwendeka ngwavo, ‘Yove Siyone nganda ya Shukulu Kalunga, Njambi wakujela wa Isalele.’

¹⁵ “Nameme vakwivalele nakukuzinda, njikakupwisa nganda yakama yaivwa, mutambela wa kulyalesa nawo ku myaka yoshe.

¹⁶ Miyati ya vanu voshe na vimyene vakakunyunga ngwe cisemi alela munendi. Co ukazivuka ngeci yange, Kalunga Muka-nzili yoshe Njambi wa Isalele, njinakwamena nakukupatula.

¹⁷ “Njikakunenela ngolinde kwingisa mu vunengu. Njikakunenela siliva na vunengu kwingisa mu vutale na citi, njikakunenela vutale kwingisa mu limanya. Vaka-kushwana kuvakakuyandesa lalo, vakashwana na vushunga na kwoloka.

¹⁸ Kukukakala lalo lipakeso mu lifuti lyove, nambe kulitsiya nambe kulinyongesa mu lifuti lyove embwe. Njikakunyunga nakukwimanena ngwe civumbe, ukanjishangazala omwo yange njinakwamena.

¹⁹ “Litangwa kulikapu lalo ceke cove ku simbu ya mutanya, nambe ngonde kutwa lyezi ku simbu ya vutsiki, yange Kalunga, njikapwa ceke cove ku myaka yoshe, Njambi yove ikeye akapwa vumpau vwove,

²⁰ Matangwa akuviilila kwove akahwa. Yange Kalunga, njikapwa ceke cove ku myaka yoshe ceke cije kucesi kuhwa catuvakana ceke ca litangwa na ngonde.

²¹ Vanu vove voshe vakapwa vaka-vushunga, vakashwana lifuti ku myaka yoshe. Njavakunine, nakuvatanga, ngeci vasholole vukama vwange ku vanu voshe.

²² Nameme naanga yove yaindondo na kulikeesa, oloni vakapwa muyati wakama wa nzili. Omo simbu ikaija, yange Kalunga njikalinga vyuma evi vwasi-vwasi!”