Isaya 6 - Livulu lya Shukulu Kalunga

Njambi asana Isaya kupwa muka-kwimanena

¹ Mu mwaka uje watsile Mwene Uziya, njamwene Shukulu Kalunga natumbama a litanda lyendi lyalilaja, lya akamwa, co cikoveyo cendi cacilaja cashulisile Njuvo ya Shukulu Kalunga.

² Akamwa yendi, emanene vikashama vakuvyazima, umo na umo wakele na mambava atanu na limo. Cikashama umo na umo walifwikile mambava endi avali ku mesho, co a muvila wendi walifwikile mambava avali, co mambava akwavo avali wakele nakuwapululwisa.

³ Co valitambekelele umo na mukwavo ngwavo, “Wakujela, wakujela, wakujela! Shukulu Kalunga Muka-nzili yoshe wapwa wakujela! Asi oshe anashulu na vumpau vwendi.”

⁴ Cililimo ca majwi avo cajajesele luvula lwa Njuvo ya Shukulu Kalunga, co Njuvo yashulile na vwisi.

⁵ Co njendekele ngwange, “Kunjesi na cinyangavili! Ngongo yange, omwo majwi aje atunda mu kanwa kange apwa majwi a vuvi, co lalo njayoya akati ka vanu vaje vendeka majwi a vuvi. Co ololo mesho ange anamono Mwene, Shukulu Kalunga Muka-nzili yoshe.”

⁶ Asinoni umo wa vaje vikashama wapulwile asi wezile kuli yange, wambatele linungu lya tuhya lije lyatundisile ku mutula na vimana.

⁷ Co wakambekele linungu lya tuhya a kanwa kange wendekele ngwendi, “Eli linakwata kanwa kove, co ololo mulonga wove unahu, na vuvi vwove vanakusambesavwo.”

⁸ Asinoni njazivile lijwi lya Shukulu Kalunga ngwalyo, “Iyajo injikatuma! Iyajo akapwa muluwa wetu?” Co njakumbulwile ngwange, “Yange unoye! Njitumeni!”

⁹ Ngecivene, wanjilekele kuya nakuleka vanu lijwi eli, “Kuziva mukaziva, oloni kumukazivisisa. Yeni kumona mukamona, oloni kumukamonesesa.”

¹⁰ Asinoni wendekele kuli yange ngwendi, “Tengulula mana ava vanu ngeci apwe akuzeya, vapwe tusinda-matwi, vapwe tupuputwa, ngeci kesi vase kumona nambe kuziva nambe kuzivisisa. Nga vapwa vavavwa, co vakatengulukila kuli yange mukuvakangwisa.”

¹¹ Co njehwile ngwange, “Yove Shukulu Kalunga, simbu mukajo vyuma evi vikapwa ngeci?” Co wanjikumbulwile ngwendi, “Kuvanga noo vinganda vyavo vinasiwuka nakupwa vingundu, noo vinjuvo vyavo vinapu vyamupulungwa, noo lifuti lyavo lyashandoka nakupwa vingundu.

¹² Yange njikashekela vanu ava kulyala nakupwisa lifuti lyoshe vingundu.

¹³ Nameme nga munu umo asalao akati ka vanu likumi mu lifuti, na ikeye lalo vakamunyongesa, akapwa ngwe cimbundi ca muti wa oke uje vanashinji.” (Cije cimbundi cinemanena vushangumukilo vwavuha vwa vanu va Njambi.)