Isaya 59 - Livulu lya Shukulu Kalunga

Muka-kwimanena ahisa vuvi vwa vanu

¹ Kesi muyongole ngweni Shukulu Kalunga wapwa wakuzeya manene mukumyamena, nambe wapwa kasinda-matwi manene mukuziva malombelo eni ngeci amikwase embwe!

² Oloni vuvi vweni vukevwo vunamyangununa na Njambi yeni. Njambi kesi kuziva malombelo eni omwo vuvi vweni.

³ Vyendeka vyeni vinashulu na makuli na matumbe a muuka, na mavoko eni anashulu na maninga.

⁴ Muya ku mbanja, oloni kumwesi na vushunga. Mukalingi matumbe eni akuvulumuna vakweni.

⁵ Matumbe awa mulinakulinga anapu amavi ngwe mavunda a linyoka wa vushungu. Nga utivao limo, co mutuuka linyoka.

⁶ Oloni matumbe eni kesi amamvwa embwe, akewo anapu angoco ngwe vwanda vwa kavuvi!

⁷ Simbu yoshe mutumba matumbe a vyuma vya vuvi, co mukawalingi vwasi-vwasi. Mukazambula mukutsiya vanu vakujeneka mulonga. Kwoshe kumuya mukasezako vingundu nakuviisako,

⁸ kumuzivuka kukala mu kwoloka. Vyuma vyoshe mukalingi vyapwa vyakujeneka vushunga. Mukakavangeya vingila vya kupenga-penga, na voshe vaje vamikavangeya kuvesi kuwana kwoloka.

Vanu valitavela vuvi vwavo

⁹ Vanu valinakwendeka ngwavo, “Ololo twazivuka omwo vikajo Njambi katwamenene kuli vaje valinakutuyandesa. Twakele na cinyangavili cakwendela mu ceke, oloni kuli lika lisusulungu,

¹⁰ tulinakwenda nakupapateya ngwe tupuputwa. Tutanozoka mutanya mwelu, ngwe vutsiki, ngwe tuli mu lisusulungu lya vukalo vwa vatsi.

¹¹ Tuli na lyova na vusiwa. Tushaka Njambi atwamene ku tuyando na vuvi, oloni nacimo cilingiwa cai.

¹² “Shukulu Kalunga, milonga yetu ku mesho ove yaingi manene. Vuvi vwetu vulinakutuhisa. Twavuzivuka.

¹³ Twakutengulukila, nakuvyana kukukava. Twayandesele vakwetu nakutunda kuli yove. Viyongola vyetu vinapu vya makuli, na majwi etu anapu a makuli.

¹⁴ Kulongwa kunahu, na vushunga kuvwesiko lalo. Vushunga vunahumo mu mbanja, co kulongwa kwaiko lalo.

¹⁵ Kulongwa kunapu kwakundondo. Woshe uje alikela kulinga vuvi alimona ali na mulonga.” Shukulu Kalunga namono evi, co ikeye kesi nakuvwaelela omwo kukwesi vushunga.

Shukulu Kalunga alivwaesela kupatula vanu vendi

¹⁶ Ikeye nalikomokela manene akumona ngeci kukwesi uje akwasa vaka-kuyanda. Ngecivene, akapangesa livoko lyendi lya nzili mukuvapatula nakuhyana.

¹⁷ Akazala kulongwa ngwe cikoveyo ca nzita ca a nulo, kwamena kupwa ngwe tepa ya nzita ya ku mutwe. Vukalu na shambandinga vikapwa ngwe vuzalo vwendi.

¹⁸ Akahisa vitozi ngwe a vije vivalingile ku vanu vendi, nameme vene vitozi vaje vali ku mafuti a kulyala.

¹⁹ Kutunda mu ngangela nakweta mu kangombe ka yambi, vanu voshe vakakomoka vukama vwa nzili yendi. Akaija ngwe mema a cingungu-muta, ngwe lihunzi lyakama.

²⁰ Shukulu Kalunga alinakwendeka kuli vanu vendi ngwendi, “Njikaija ku Yelusalema, nakumimanena nakumyamena yeni voshe vaje vanatenguluka ku vuvi vweni.

²¹ Njilinakulikumiiya cikumiiyo neni, njinamyana Munzinzime wange na vilongesa vyange kupwa vyeni ku myaka yoshe, co kutunda lelo nakutwala kulutwe, munapande kunjononoka nakulongesa vana veni, na vatekulwila veni kunjononoka visimbu vyoshe vikaija kulutwe.”