Isaya 56 - Livulu lya Shukulu Kalunga

Vanu va Njambi vakalipandakana na miyati yoshe

¹ Shukulu Kalunga alinakwendeka ku vanu vendi ngwendi, “Lingeni vije vinapu vya vushunga, na vuvwa, omwo njikamyamena vwasi-vwasi.

² Njikavezikisa vaje vanyunga Litangwa Lyakuhwima simbu yoshe kujeneka kulishaula. Njikavezikisa vaje kuvesi kulinga vuvi.”

³ Muka-kwija uje nalipandakana na vanu va Shukulu Kalunga kapandele kwendeka ngwendi, “Shukulu Kalunga kakanjitava kulemesa amo na vanu vendi.” Munalume kayunuke kapandele kuyongola ngwendi omwo kesi na vana, kasa kupwa umo wa vanu va Njambi.

⁴ Shukulu Kalunga alinakwendeka kuli munalume wa cifwa cangacije ngwendi, “Nga unjisingimika nakunyunga Litangwa Lyakuhwima, co nga ulinga vije vinjivwaelelesa nakunyunga cikumiiyo cange,

⁵ asinoni lizina lyove vakalyanuka mu Njuvo yange na akati ka vanu vange simbu yoshe kutuvakana nga wakele na vana va vanalume na ava va vanakazi. Naumo wai akakwivala.”

⁶ Shukulu Kalunga alinakwendeka kuli vaje vaka-kwija vanapu vamo va vanu vendi, vaje vamuzema nakumupangela, vaje vanyunga Litangwa Lyakuhwima nakunyunga mwamuvwa cikumiiyo cendi ngwendi,

⁷ “Njikamitwala ku Siyone, lilundu lyange lyakujela, co njikavajolesa mu Njuvo yange yakulombelela, co njikatambula vin̄ombelo vije vimukombelela a mutula wange. Co Njuvo yange vakaitumbula Njuvo yakulombelela miyati yoshe.”

⁸ Shukulu Kalunga wa Akamwa ya Vyoshe uje wanenele vanu vendi vaIsalele kwimbo kuvatundisa ku vunzinda, nakulaesa ngeci akanena veka lalo vakulipandakane navo.

Vantwama va Isalele vavahisa

⁹ Shukulu Kalunga naleke miyati ya vangenzi kwija ngwe tusitu nakulya vanu vendi.

¹⁰ Ikeye alinakwendeka ngwendi, “Vantwama voshe, vaje vapandele kunangula vanu vange, vanapu tupuputwa! Nacimo cai vazivuka. Vanapu ngwe tutali vaje vakanyungu vyuma oloni kuvesi kuvwoza, vakakala lika, vazema lika kulala nakulota!

¹¹ Vantwama vaje kuvesi kuzivisisa vanapu ngwe tutali vamutupu vaje kuvesi kukuta. Vantwama ava kuvesi kuzivisisa. Ntwama na ntwama ashaka kulinga vije vimuvwaelelesa.

¹² Vendeka ku umo na mukwavo ngwavo, ‘Twambateni vinyu tunwe ngwe mutunashakela! Co imene tukalinga lalo ngwe mutuli nakulinga lelo!’ ”