Isaya 55 - Livulu lya Shukulu Kalunga

Njambi azivila vanu mema ku mbunge

¹ Shukulu Kalunga alinakwendeka ngwendi, “Nga muli na lihwila, ijeni munwe mema! Nga kumwesi na vimbongo, ijeni mulye vije vimushaka! Ijeni mwakunwe vinyu na mavele, kujeneka kuvilanda na vimbongo!

² Omwo vikajo muviisila vimbongo a vyuma vije kuvyapwile vyakulya? Omwo vikajo muundanganena cuma cije kucasa kumikutisa? Tolilileni kuli yange nakulinga vije njendeka, co mukavwaelela na vyakulya vyavivwa manene.

³ “Yeni vanu vange tolilileni, ijeni kuli yange, co mukakala na mwonyo! Njikalikumiiya neni cikumiiyo ca myaka yoshe, nakumivezikisa vivezikiso vije vinjakulaesele Ndaviti.

⁴ Njamupwisile ntwama na muka-kushika miyati ya vanu, co wapwile mukaleo wange kuli vakevo.

⁵ Ololo mukasana miyati yeka, ije kumwazivukile akulivanga, oloni vakaija lumbisi nakulipandakana neni! Yange Kalunga, Njambi yeni, Njambi wakujela wa Isalele, njikalinga ngeci vyoshe evi vinapande kulingiwa, njikamishangazala nakumyana vumpau.”

⁶ Tengulukileni kuli Shukulu Kalunga nakulombela kuli ikeye omo acili muyehi.

⁷ Vaka-vuvi vecele vilinga vyavo vya vuvi, co vatengulule viyongola vyavo. Vatengulukile kuli Shukulu Kalunga Njambi yetu, ikeye muka-mema ku mbunge na muka-kusambesa vwasi.

⁸ Shukulu Kalunga alinakwendeka ngwendi, “Viyongola vyange kuvyafwile ngwe viyongola vyeni embwe, na vingila vyange vinalyangunuka na vingila vyeni.

⁹ Ngwe melu muwakala akamwa ya asi, ngecivene, vingila vyange, na viyongola vyange vili akamwa ya vingila na viyongola vyeni.

¹⁰ “Lijwi lyange linapu ngwe nyonzi ya vusuku-mbundu na nyonzi ije itunda kwilu nakujulisa asi aje akamene vimbuto vyakukuna, na vimbuto vya vinona vyakulya.

¹¹ Omu mukemwo muwapwa majwi ange, majwi ange kuwakeluka kuli yange, kujeneka kulinga vije njawatumine ngeci awalinge.

¹² Mukatunda mu Mbambilone nakujolela, vakamitwamenena mu kwoloka kutunda mu nganda. Minkinda na malundu vikaimba ngwe vanu omo mwita, na miti lalo ikatambeka nakujolela ngwe vanu.

¹³ Miti ya sipelese na cinyota ikamena mu mutambela muje mwakele mambimbo. Miti eyi ikapwa cizivukiso ca vumpau vwa Shukulu Kalunga ku myaka yoshe.”