Isaya 54 - Livulu lya Shukulu Kalunga

Cizemo ca Shukulu Kalunga kuli Isalele

¹ Yelusalema, unafu ngwe munakazi wa vana, oloni ololo wasa kwimba nakutambeka nakujolela. Ololo ukakala na vana vavangi kutuvakana munakazi uje nashomboka simbu yakama.

² Amesa mbalaka muulinakukala! Nungila ku mikole, co kolesa ku vipampalingo!

³ Ukambata mitambela ya mafuti eka, vanu vove vakeluka mu lifuti muje muli miyati yeka ololo. Vinganda vije vyapwile vingundu vikashula lalo na vanu.

⁴ Kesi uzive lyova, nambe kuziva shwamwa, kuukashauka lalo embwe. Ukevala kujeneka kulongwa kwove a simbu ya vwanike vwove, kesi uzive shwamwa akupwa ufwile.

⁵ Ishamatanga wove akapwa ngwe munalume wove, ikeye Shukulu Kalunga Muka-nzili yoshe, Njambi wakujela wa Isalele, ikeye muka-kushika a kaye koshe, co akakwamena.

⁶ Isalele, yove unapu ngwe mumbanda uje yanaseza munalume wendi, co ali mu vusiwa vwakama. Oloni Shukulu Kalunga akusana wiluke kuli ikeye, alinakwendeka ngwendi,

⁷ “Njakusezele kasimbu kakandondo lika, omwo a cizemo cange cakama njikakwilwisa lalo.

⁸ Omwo njaluvalele njakusezele kasimbu kakandondo lika, oloni njikakumwesa cizemo cange ku myaka yoshe. Ngwendi Shukulu Kalunga uje muka-kukwamena.

⁹ “Njakulaesele Nowa ngwange, nalumo lwai njikanena lalo livazi ano asi. Ololo njikukulaesa ngwange kunjikaluvala nove lalo embwe, nambe kukunyanyamesa.

¹⁰ Minkinda na malundu vikazimangana, oloni cizemo cange ali yeni kucikahu, njikanyunga cikumiiyo cange cakumyana kwoloka ku myaka yoshe.” Ngwendi Shukulu Kalunga uje wakuzema.

Yelusalema ije ikaija kulutwe

¹¹ Shukulu Kalunga alinakwendeka ngwendi, “Yelusalema, nganda ya tuyando, na nganda yakujeneka seo, naumo wai akakuzembeleka, njikatungulula luvula lwove na mamanya a seo yakama.

¹² Njikatunga tuposhi twove na mamanya a lumbi, vikolo vyove njikavitunga na mamanya aje akuvyazima ngwe tuhya, njikazengeleka civumbe na mamanya a seo.

¹³ “Yange vene njikalongesa vanu vove, nakuvavezikisa na kwoloka.

¹⁴ Vushunga na vuvwa vikakukolesa. Ukakala mwamuvwa kuvakakuyandesa nambe kukuzivisa lyova.

¹⁵ Nga munu akakulwisa, ikeye vavenya alinakucilinga, kesi yange njinamutumu embwe. Woshe uje akakulwisa akawa.

¹⁶ “Yange njatangele muka-kufula, uje akafulu vitwa a tuhya. Yange lalo njatangele lishwalale, uje muka-kupangesa vije vitwa mukutsiya.

¹⁷ Oloni kukwesi citwa cikasa kukuvulumuna, ukasa kukumbulula vaje voshe vakendeka majwi a makuli ali yove. Njikemanena vangamba vange nakuvahyanesa.” Mwanendeka Shukulu Kalunga.