Isaya 52 - Livulu lya Shukulu Kalunga

Njambi akapatula Yelusalema

¹ Yelusalema kala na nzili na vukama lalo! Nganda yakujela ya Njambi, zala vuzalo vwove vwavuvwa! Vaka- kulemesa Shukulu Kalunga vaje vasiwile nganda yove yakujela, kuvakakovelamo lalo mu nganda.

² Yelusalema, katuka mu likungu! Litotomone likungu, tumbama a litanda lyove! Yeni vinzinda va Siyone lizituleni malyenge aje anamikutu!

³ Shukulu Kalunga wa Akamwa ya Vyoshe alinakwendeka kuli vanu vendi ngwendi, “Omo mwapwile vinzinda, kuvamilandesele na vimbongo, co mu ngila eyi vene kuvakamipatula na vimbongo.

⁴ Omo mwaile mu Ingito nakukakalamo ngwe vangenzi, mwalingile cizango ceni, nameme ngoco, vaAsilya vamisindiiye kumitwala mu vunzinda kufweta cuma cimo.

⁵ Ngecivene, ololo cuma cimo lalo cinasholoka mu Mbambilone, munapu mu vinzinda, co nacimo cai vamilandele naco. Co vaje vamishwanene vatambekele, co vashawile lizina lyange.

⁶ Omo simbu yeta mukazivuka ngeci yange njapwa Njambi uje nendeka kuli yeni.”

⁷ Cinapu cuma cacivwa a minkinda kumona muluwa aija anena vin̄anda vyavivwa, vin̄anda vya kwoloka! Ambulula vyakuhyana nakwendeka kuli Siyone ngwendi, “Njambi yove ololo napu Mwene!”

⁸ Vaje vanyunga nganda valinakutambeka, valinakwimba nakujolela. Valinakumona na mesho avo vavenya, kwiluka kwa Shukulu Kalunga ku Siyone.

⁹ Yeni vingundu vya Yelusalema, shangumukeni kwimba myaso yakujolela! Shukulu Kalunga napatula Yelusalema nganda yendi nakuzembeleka vanu vendi.

¹⁰ Shukulu Kalunga akapangesa nzili yendi yakama mukwamena vanu vendi, co vaka-kaye voshe vakamona kwamena kwa Njambi yetu.

¹¹ Tundeni mu Mbambilone, yeni voshe vaka-kwambata vivala vya mu Njuvo ya Shukulu Kalunga. Kesi mukwate cuma cakujwala, lijeleseni ngeci muye.

¹² A simbu eyi kumukayi lumbisi nambe kuvomboloka embwe. Omwo Shukulu Kalunga Njambi yeni ikeye akamitwamenena, co akaminyunga ku mitambela yoshe.

Ngamba wakuyanda

¹³ Shukulu Kalunga alinakwendeka ngwendi, “Kenga, ngamba yange akavezika mu vipangi vyendi, akapwa wakama, co vanu vakamusingimika manene.

¹⁴ Vanu vavangi vakasamene omo vamumwene, wapwile ngwe liinga-nyambi akumukenga, kapwile ngwe munu.

¹⁵ Oloni miyati ya vanu vavangi vakamukomoka, co vimyene kuvakasa kwendeka, vakalikomokela lika. Vakamona nakuzivisisa cuma cije kuvazivukile akulivanga.”