Isaya 5 - Livulu lya Shukulu Kalunga

Mwaso wa citungu ca mikolovozi ya vushuka vwa vinyu

¹ Njikembila musamba wange mwaso wendi wakutumbula citungu cendi ca mikolovozi ya vushuka vwa vinyu. Musamba wange wakele na citungu cendi ca mikolovozi ya vushuka vwa vinyu a lilundu lya vwilo.

² Waliminemo nakutundisamo mamanya, co wakunine mikolovozi ya vushuka vwa vinyu yaivwa. Co watungile kaposhi kakuvingilila, wendile mbulu yakukamwinamo vinyu. Wavandamenene vushuka vuhye, oloni vushuka vwoshe vwapwile vwakukamata.

³ Musamba wange alinakwendeka ngwendi, “Yeni vandambo va mu Yelusalema neni muli mu Yunda, sompeni akati kange na citungu cange ca mikolovozi ya vushuka vwa vinyu.

⁴ Kuma cuma mukajo kunjalingile ku citungu cange? Cooni omwo vikajo kunemi vushuka vwakukamata, oloni kesi vushuka vwavuvwa vuje vunjayongwele?”

⁵ “Eci cikeco cinjikalinga ku citungu cange ca mikolovozi ya vushuka vwa vinyu. Njikatundisa cipatanga cakwo, co njikasiwula civumbe cije canyungako, ngeci tusitu vakalye vushuka nakuvulyatangela.

⁶ Njikacecelela cikule mu shaku, kunjikasalulamo minango nambe kushakwila mikolovozi ya vushuka vwa vinyu, nambe kulimamo, oloni njikecela mishwena na mambimbo icifwike. Co lalo njikavindika mashelwa kunyokelamo nyonzi.”

⁷ Isalele napu citungu ca Shukulu Kalunga Muka-nzili yoshe ca mikolovozi ya vushuka vwa vinyu, vanu va mu Yunda vanapu mikolovozi ya vushuka vwa vinyu ije yaakunine. Ikeye wavakulaelele ngeci valinge mwamuvwa, oloni vakevo vanapu vaka-kutsiya. Ikeye wavakulaelele ngeci valinge vya vushunga, oloni vanu vaje vavalinakuyandesa vatambekele ngeci vavakwase.

Vuvi vuje vuvakalingi vanu

⁸ Ngongo yeni! Mulinakulanda vinjuvo vyavingi na mahya ngeci muwezelele ku vije mulinavyo laja. Co kukukakala lalo mutambela wakutungila vanu, co mukakala mu lifuti eni lika.

⁹ Njazivi Shukulu Kalunga Muka-nzili yoshe endeka ngwendi, “Vinjuvo vyoshe vije vyakama vyavivwa vikapwa vyamupulungwa.

¹⁰ Ku makasha-kasha a vinyu aje alinakumena mu lihya lya mahekita likumi, kukatunda lika malita atanu na atatu a vinyu. Co ku malita makumi atanu na atatu a vimbuto kukatunda lika malita likumi na atanu na atatu a vimbuto.”

¹¹ Ngongo yeni! Yeni mumenekela kunwa vwala mutondo-tondo, co mupenda vutsiki vwoshe.

¹² Ku viwano vyeni kwakala tulyalya, na tumbulumbumba, na vimbendo, na vinyu. Oloni kumuzivuka vije vyalinakulinga Shukulu Kalunga,

¹³ ngecivene, vakamitwala ku mafuti eka kupwa vinzinda. Vantwama veni vakatsa ku njala, co vanu vangoco vakatsa ku lihwila.

¹⁴ Vukalo vwa vatsi vulinakuvashungwiya, vuneshama kanwa kavwo, ngeci kaleule vaka-kufuka va mu Yelusalema amo na mbunga ya muyoyo wa vanu vangoco.

¹⁵ Munu woshe akaziva shwamwa, co vaka-kulyalesa voshe vakavakeesa.

¹⁶ Oloni Shukulu Kalunga Muka-nzili yoshe amwesa vukama vwendi akulinga vyuma vya vushunga, asholola kujela kwendi akusompa vanu vendi.

¹⁷ Co vana va vimanga vakalila mwila mu vingundu, na vana va vimembe vakawana kwakulila.

¹⁸ Ngongo yeni! Yeni kumwasa kutunda ku vuvi vweni.

¹⁹ Mwendeka ngweni, “Shukulu Kalunga azambule kulinga vije vyendekele, ngeci tuvimone. Njambi wa Isalele wakujela atumbe matumbe endi, ngeci tumone viyongola vyendi.”

²⁰ Ngongo yeni! Yeni mutumbula vyavivi ngweni vyavivwa, co mutumbula vyavivwa ngweni vyavivi. Mutengulula lisusulungu kulipwisa mutanya, nakutengulula mutanya kuupwisa lisusulungu. Mutumbula vyakulula ngweni vipwelelela, co mutumbula vyakupwelelela ngweni vyakulula.

²¹ Ngongo yeni! Yeni munayongola ngweni munapu mu vaka-mana, co mwanyanyama manene.

²² Ngongo yeni! Vingenyenye va vingalafwa vya vinyu! Mwapwa vaka-kusimpa nakujeneka lyova omo mutsingasana vyakunwa!

²³ Oloni a lizika-kanwa ni, mukasambesa vaka-milonga, oloni vaje kuvesi na milonga kumwesi kuvasompa mwa vushunga.

²⁴ Ngecivene, ngwe muvikenye vishati na mwila wakuma mu tuhya, ngecivene, mizi yeni ikavola, na vishani vyeni vikominina nakupekumuka, omwo munavyana vije vyatulongesele Shukulu Kalunga Muka-nzili yoshe, Njambi wakujela wa Isalele.

²⁵ Shukulu Kalunga naluvala na vanu vendi, co nolola livoko lyendi nakuvahisa. Minkinda ikajaja, co mivila ya vanu va kutsa ikalala mu vitapalo ngwe vyuma vya mazilo. Nameme ngoco, vukalu vwa Shukulu Kalunga kuvukahwilao embwe, oloni anga akolola livoko lyendi mukuvahisa.

²⁶ Shukulu Kalunga akalinga cizivukiso cakusana miyati yeka yakulyala. Navasana na mulozi, co kengeni, valinakwija lumbisi!

²⁷ Naumo wai wavo akajuka, co naumo wai akatanuka. Naumo wai akanenguka nambe kulala. Naumo wai akashengenyesa mwiva wendi, naumo wai akavatwisa mwiva wa n̄aku yendi.

²⁸ Mikili yavo yapwa ya vutwesi, mata avo a lusipa akunanela cimweja. Vimbemba vya tuvalu twavo vyapwa vyakukola ngwe vutale, co mavalo a ku matemba avo akalizenge ngwe kankumba.

²⁹ Mashwalale vavo vakaana ngwe vindumba vaje vanatsii kasitu, co vamukokela kulyala kuje naumo wai avatambulaye.

³⁰ Omo litangwa lije likaija, vakakuma a Isalele ngwe mema a kalunga. Kengeni a lifuti eli! Lisusulungu na tuyando! Ceke cinatenguluka kupwa lisusulungu.