Isaya 48 - Livulu lya Shukulu Kalunga

Shukulu Kalunga ashungamesa vanu vendi

¹ Yeni vanu va Isalele tolilileni evi, yeni mwatunda kuli Yunda, yeni mukalisingi na lizina lya Shukulu Kalunga, co mulitumbula kupwa vaka-kulemesa Njambi ya Isalele, oloni kumwesi kulinga vije mwendeka.

² Muli na kulyalesa nakwendeka ngweni munapu vandambo va Yelusalema, nganda yakujela, nakukulaela kuli Njambi ya Isalele, uje lizina lyendi lyapwa Shukulu Kalunga Muka-nzili yoshe.

³ Shukulu Kalunga alinakwendeka ku Isalele ngwendi, “Laja njambulwile vije vikalingiwa, cooni vinalingiwa.

⁴ Njazivukile ngwange yeni mwapwa vanu vavakalu, vanu va vimbunge vyakukola ngwe vutale.

⁵ Ngecivene, njamilekele vyuma evi, simbu kanda vilingiwe, kutewa mwendeka ngweni, tumponya tweni vamukalemesa, vakevo valingile vyuma evi.

⁶ “Vyoshe vinjendekele vinalingiwa, munapande kutava ngeci vyoshe njambulwile vinapu vya vushunga. Njikakuleka vyuma vyaviha vije vikaija, vyuma vije kunjajombolwele laja.

⁷ Ololo njilinakulinga cuma caciha, cije kanda uzive akulivanga. Nga vyakeleko nga wendeka ngwove wavizivukile laja vyoshe.

⁸ Njazivukile ngeci kumwakele cikulaeso muli yeni, simbu yoshe vamizivukile ngeci mwapwa muvaka-kutengulukila. Mukemwo kumwazivile evi, kumwazivileko nambe lijwi limo.

⁹ “Ngeci vanu vakashangazale lizina lyange, kunjikaluvala vwasi, co kunjiminyongesa.

¹⁰ Njinamyeseka mu simbu ya tuyando twakama manene, ngwe muvakeseka siliva mu lutengo lwakama. Oloni njinawana ngeci kumwesi na seo.

¹¹ Njalingile vyuma evi omwo cizango cange, kunjikatava lizina lyange ngeci valishaule, nambe kwana vumpau vwange kuli njambi umo weka lalo.”

Siluse ntwama wakwangula kuli Shukulu Kalunga

¹² Shukulu Kalunga alinakwendeka ngwendi, “Njitolilileni, yeni vaIsalele, vanu vaje vanjinasana! Yange njapwa Njambi, wakulivanga na mamaneselelo, Njambi umolika!

¹³ Njatangele kaye na mavoko ange, nakujangumuna lilu. Lilu na kaye vyononoka kushika kwange kwoshe.

¹⁴ “Kungulukeni yeni voshe mutolilile! Kukwesi vinjambi vayongwele ngwavo munu ou injinaangula asa kulwisa Mbambilone, nakulinga vije vinjishaka ngeci avilinge.

¹⁵ Yange njamusanene, njamutwamenenene, nakumuhyanesa.

¹⁶ “Shwenyeni muyehi nange muzive evi vinjendeka. Kutunda ku vushangumukilo njendekele neni citona-mesho, co majwi ange simbu yoshe anapu a vushunga.” (Ololo Shukulu Kalunga wa Akamwa ya Vyoshe nanjitumu na nzili yendi.)

Vutumbe vwa Shukulu Kalunga ali vanu vendi

¹⁷ Njambi wakujela wa Isalele, Shukulu Kalunga muka-kumyamena alinakwendeka ngwendi, “Yange Kalunga Njambi yeni, uje amilongesa vyuma vyavivwa, nakumitwamenena mu ngila yaivwa muje mumunapande kuya.

¹⁸ “Nga mwatolililile ku mashiko ange, nga vivezikiso vyeni vyapwile ngwe muna ndonga uje kesi kuma cau, nga munahyana ngwe mankimba aa mema a kalunga.

¹⁹ Nga vatekulwila veni vanatumu ngwe vinona vya lishen̄avu, co yange ngwe kunjatavele ngeci vavanyongese.”

²⁰ Tundeni mu Mbambilone! Lisambeni omo muya. Joleleni nakutambeka ngeci vanu voshe vazive ngwavo, “Shukulu Kalunga namena Isalele ngamba yendi!”

²¹ Omo Shukulu Kalunga watwamenenene vanu vendi mu mambo mwakushaluka mwakuma cau, kuvakele na lihwila. Ikeye wavatuwisilile mema mu limanya. Watavwile limanya mukati, co mema atuukile.

²² “Shukulu Kalunga alinakwendeka ngwendi, Kukwesi kwoloka kuli vaka-vuvi.”