Isaya 47 - Livulu lya Shukulu Kalunga

Kuwa kwa Mbambilone

¹ Shukulu Kalunga alinakwendeka ngwendi, “Mbambilone, shuluka a litanda lyove, co tumbama asi mu livu. Laja wapwile u mumbanda, nganda ije kuvasele kufungulula, oloni kuwesi lalo na cikonde cacivwa cakuvotsiya, ololo unapu u ndungo!

² Tengulula n̄unju utwemo tiliku! Shulula nanga yove yakulivuva! Kambula cifunga cove! Jundula vuzalo vwove ku mendi, omo ujavuka vana va vindonga!

³ Vanu vakamona mushelengwa wove, vakamona kulilumbilisa kwove na shwamwa. Co yange njikalinga shambandinga, naumo wai asa kunjivindika.”

⁴ Njambi wakujela wa Isalele atupatula, lizina lyendi Shukulu Kalunga Muka-nzili yoshe.

⁵ Shukulu Kalunga nendeka ku Mbambilone ngwendi, “Tumbama kuluu mu lisusulungu, nalumo lwai lalo vakakutumbula vamwene wa mafuti!

⁶ Njaluvalele na vanu vange, njavapangesele ngwe kesi vanu vange. Njavaakele mu mavoko ove, oloni yove kuwavamwesele mema ku mbunge, nameme tukulukazi vene wavapangesele na muuka.

⁷ Yove wayongwele ngwove ukapwa vamwene simbu yoshe, oloni kuwaakeleko mbunge ku vyuma vije, nambe kuyongola ngwove vyuma evi vikahwa.

⁸ “Yove washaka vyuma vya senga, uyongola ngwove uli mwamuvwa na kwoloka. Ulinakuliyongola ngwove u wakama ngwe Njambi, ngwove kukwesi weka lalo wakulifwa nove. Wayongola ngwove nalumo lwai ukapwa u fwile, nambe kutsisa vana vove.

⁹ Oloni tolilila ku vyuma evi. Litangwa lilinakwija omo vyuma evi njinendeka vikalingiwa. Manseno ove oshe apwa angoco, ukapwa u fwile, co vana vove vakatsa.

¹⁰ “Wavandele mu vuvi vwove vavenya, wayongwele ngwove naumo wai asa kukumona. Mana ove nakuzivuka kwove vyakukwisile, wayongwele ngwove, ‘Yange Njambi, kukwesi weka lalo wakulifwa nange.’

¹¹ Tuyando twakama tukaija ali yove vwasi-vwasi kujeneka yove kuzivuka, co manseno ove oshe kuwakakukwasa.

¹² Manseno ove oshe na mikalo yove, vije viwapangesele tunde ku vukwenje vwove, amo vikakukwasa, nakuzivisa lyova vitozi vove.

¹³ Unalijukisa yove vavenya, akwihula vaka-kulilongesa vingongonosi, na vaka-kwambulula vyuma vya kulutwe, ngeci vakunangule ngonde na ngonde. Yako ukavehule vakuleke vije vikalingiwa ali yove.

¹⁴ “Vanu vaje vakulaela mu vingongonosi vanapu vangoco ngwe mwila, uje wenya mu milangi ya tuhya. Aje naumo wai asa kwikao vilya.

¹⁵ Vuje vukevwo vuvwa vwoshe vuvakalinga kuli yove, vaje vaka-kukunangula vawakele nakwihula simbu yoshe yakuyoya kwove. Voshe vakakuseza, nakuya kwoshe kuvashaka, co naumo wai akakwamena.”