Isaya 46 - Livulu lya Shukulu Kalunga

¹ “Awa akewo mamaneselelo a vinjambi va Mbambilone! Akulivanga valemesele Mbele na Nembo, oloni ololo vanavalondeka a vimulu, vanapu citele a myongo ya tusitu vaje vanajuka.

² Tumponya kutwasa kulyamena tuketwo vavenya, vanatufungulula nakututwala kweka. Awa akewo mamaneselelo a vinjambi va Mbambilone!

³ “Njitolilileni, yeni vatekulwila va Yakomba, yeni voshe mwasalao kuli vanu vange. Njinamilele tunde ku simbu ije mwasemukile.

⁴ Yange nji Njambi yeni, co njikamilela, noo munakolo, na vwele ku mitwe yeni. Yange njamitangele, co njikamilela, njikamikwasa nakumyamena.

⁵ Shukulu Kalunga alinakwendeka ngwendi, ‘Iyajo nalyeseka nange? Kuma kwali weka wakulifwa nange ndi?

⁶ Vanu vafukula mu vingonga vyavo, nakwitila kuti ngolinde, vapeselesa siliva a vipeseleso. Vakumuna muka-kufula ngolinde ngeci alinge kamponya, asinoni vamukulamena nakumulemesa.

⁷ Uje kamponya vamwambata a vitsili vyavo, vamwaka mu mutambela umo, co kemana aje vene, kukasa kutunda aje vanakaka. Nga munu alombela ku kamponya, kukasa kumukumbulula, nambe kumwamena ku tuyando.

⁸ “ ‘Anukeni evi, yeni vaka-vuvi, yongoleni vije vinjinalingi.

⁹ Anukeni vije vyalingiwile ku san̄ulu, taveni ngweni yange lika nji Njambi, co kukwesi weka lalo wakulifwa nange wai.

¹⁰ Tunde ku vushangumukilo, njendekele vati vyuma muvikafwa, ku san̄ulu njendekele vya vuka-kwimanena a vyuma vije vikalingiwa. Njendekele ngwange matumbe ange nalumo lwai akonwa, ngeci njasa kulinga vyuma vyoshe vinjayongola kulinga.

¹¹ Njinasana munu kutunda mu ngangela, akukukwavula ngwe kambembe, co akamanesa vije vinjayongwele. Njinendeka, co vikalingiwa.

¹² “ ‘Njitolilileni, yeni vanu vaka-kukaluwisa vimbunge, yeni muli kulyala nakwamena.

¹³ Litangwa lyakumyamena lili muyehi, kulyesi kulyala embwe. Kwamena kwange kucikeshwala embwe. Njikaamena Yelusalema, nakunena kasingimiko ku Isalele.’ ”