Isaya 44 - Livulu lya Shukulu Kalunga

Shukulu Kalunga ikeye lika Njambi

¹ Shukulu Kalunga alinakwendeka ngwendi, “Tolilila ololo Isalele, ngamba yange, vanu vange vakwangula, vatekulwila va Yakomba.

² Yange Kalunga uje wamitangele, tunde a simbu ije mwasemukile, njinamikwasa. Kesi uzive lyova, yove unapu ngamba yange, vanu vange vakwangula vaje vanjazema.

³ “Njikaka mema mu lifuti lya mema, nakwitisa mita ya vana va vindonga vya mema mu nunda. Njikana vana vove Munzinzime wange, na vivezikiso vyange njikavyana kuli vatekulwila vove.

⁴ Vakamena mwamuvwa ngwe mwila wakutukumwina mwamuvwa, ngwe mato aje ali ku vana va vindonga vyakwita mema.

⁵ “Vanu vakendeka kuli umo na mukwavo ngwavo, ‘Nji wa Shukulu Kalunga.’ Vakaija nakulipandakana na vanu va Isalele. Munu na munu akaka cizivukiso ca lizina lya Shukulu Kalunga a livoko lyendi, nakulitumbula ikeye vavenya kupwa umo wa vanu va Njambi.”

⁶ Shukulu Kalunga, Muka-nzili yoshe uje washwana nakunyunga Isalele, alinakwendeka ngwendi, “Yange wakulivanga na mamaneselelo, yange ange lika nji Njambi, kukwesi njambi weka lalo wai, kuvanga yange lika.

⁷ Kuma kwali munu weka lalo nalingi vije vinjinalingi yange ndi? Kuma kuli umo asa kwendeka vije vyalingiwile laja? Nakwendeka lalo vije vikalingiwa kulutwe?

⁸ Kesi muzive lyova vanu vange! Mwazivuka ngeci kutunda ku san̄ulu, nakweta ku visimbu vino vya ololo, njinendeka vyoshe vije vikalingiwa, co yeni munapu mu vakaleo vange! Kuma kuli njambi weka lalo ndi? Kuma kuli njambi weka lalo muka-nzili, uje kanda njizive ndi?”

Tumponya kuvasa kulinga cuma

⁹ Vanu vaje valinga tumponya kuvesi na seo, na tumponya vaje vavalinakulinga vapwa vangoco. Voshe vaje valemesa tumponya otu vanapu tupuputwa, vali lalo ku nzimba, co vakavazivisa shwamwa.

¹⁰ Kesi mwamuvwa kulinga kamponya ka vutale nakumulemesa ngwe njambi!

¹¹ Vanu voshe vaje vakakalemesa vakavazivisa shwamwa. Vanu vaje valinga tumponya kupwa vinjambi vavo vanapu vanu vangoco. Vaije vakusompe mu mbanja ngeci vazive shwamwa.

¹² Muka-kufula ambata cisempu ca vutale nakucaka a liko mukucifula. Ajundula muveto na livoko lyendi lya nzili mukupasha vutale. Oloni omo alinakupanga, aziva njala, na lihwila, nakujuka.

¹³ Muka-kushonga eseka livaya. Atwao cipalo na memba, alishonga na vyakushongesa vyendi, nakulipwisa citso cacivwa ca munu, na kucaka mu njuvo yendi.

¹⁴ Muti wa kendale nambe muti wa oke, nambe muti wa sipelese, nambe muti wa mu shwata wakukuna vanapande kuwangula mukushonga kamponya. Nameme muti wa kalipi wakukuna, co ukola na nyonzi omo inyoka.

¹⁵ Munu apangesa mutambela umo wa muti uje kupwa vitale vya tuhya, co mutambela ukwavo ashongao kamponya. Avwekesa tuhya mutambela ukwavo wa muti kwocao likende, mutambela ukwavo ashongao kamponya nakukalemesa.

¹⁶ Vitale vikwavo avwekao tuhya, ocao situ, ailya, co nakuta. Ota tuhya nakwendeka ngwendi, “Mwamuvwa manene njazivi shalu! Tuhya twapwa twatuvwa manene!”

¹⁷ Viti vyoshe vije vinasalao lalo avipanga kamponya, co akakulamena nakukalemesa. Akalombelela nakwendeka ngwendi, “Njamene njambi yange!”

¹⁸ Vanu va cifwa cangacije vapwa vilema manene, kuvazivuka vije valinakulinga. Vanashoko mesho avo na viyongola vyavo ku vyuma vya vushunga.

¹⁹ Muka-kushonga tumponya kesi na mana nambe kunyanyama ngeci endeke ngwendi, “Vitale vimo njinavyenyeka. A manungu avyo, njinocoo situ nakuyilya. Citi cije casaleleo njacishongele kamponya. Vikoni njikulamena asi nakulemesa cimbundi ca citi?”

²⁰ Mana angacije vunene anapu ngwe kulya manungu. Viyongola vya munu ou vinapu vya vulema, vinamusevwisa, ngeci kukwesi seo lalo yai. Kanangukile ngeci ngwendi aka kamponya kanakwata mu livoko lyendi kukapwile njambi embwe.

Shukulu Kalunga Ishamatanga na Muyoyesi

²¹ Shukulu Kalunga alinakwendeka ngwendi, “Isalele, anukeni eci, njakutangele ngeci upwe u ngamba yange, co nalumo lwai lunjikakwivala.

²² Njinazimangana vuvi vwove ngwe lishelwa lya kuhima. Iluka kuli yange, yange njinakwovola.”

²³ Tambekeni nakujolela, yeni melu! Tambekeni, yeni mitambela ya mwisi ya kaye! Tambekeni nakujolela, yeni minkinda na miti yoshe ya mu shwata! Shukulu Kalunga namwesa vukama vwendi akwamena vanu vendi va Isalele.

²⁴ “Yange Kalunga, muyoyesi weni, yange uje wamitangele, yange Kalunga, Ishamatanga wa vyuma vyoshe. Ange lika njajangumwine melu, omo njajalele kaye, naumo wai wanjikwaseleko.

²⁵ Vaka-kutaa njivapwisa vilema, nakuvindika vimona vya vaka-makuli. Majwi a vaka-kunyanyama, njikawapwisa angoco, nakumwesa ngeci mana avo anapu vulema.

²⁶ Oloni omo ngamba yange endeka vya vuka-kwimanena, omo njituma muluwa mukujombolola matumbe ange, njitumba matumbe na vuka-kwimanena ngeci vipwe vya vushunga. Njileka Yelusalema ngwange vanu vakatungamo lalo, na vinganda vya Yunda vakavitungulula lalo. Vinganda evi vikasholoka mu vingundu.

²⁷ Yange njishika, co mema a kalunga oma cau.

²⁸ Njendeka kuli Siluse ngwange, ‘Yove ukatwamenena vanu vange, ukalinga vije vinjinashakele kulinga, ukashika ngeci Yelusalema vaitungulule, na luvula lwa Njuvo ya Shukulu Kalunga valujale.’ ”