Isaya 43 - Livulu lya Shukulu Kalunga

Njambi akulaesa kupatula vanu vendi

¹ Isalele, Shukulu Kalunga uje wamitangele alinakwendeka ngwendi, “Kesi muzive lyova, njikamyamena. Njakusana a lizina lyove, ngeci unapu u wange.

² Omo ukaita mu mema akulova, njikakala nove, kuwakakuzuvika embwe. Omo ukaita akati ka tuhya, kuukenye embwe, vyeseko vyakama vije vikaija ali yove, kuvikakuvulumuna.

³ Yange njapwa Kalunga Njambi yeni, Njambi wakujela wa Isalele, uje amyovola. Njikecela Ingito ngeci vamikule, Sundane na Semba ngeci vamiinge.

⁴ Muli na seo na kasingimiko kuli yange, eci cikeco canenesele ngeci njecele mafuti na miyati ya vanu ngeci njimyamene.

⁵ Kesi muzive lyova, njili amo neni! “Njikatundisa vanu vove vaje vali mu ngangela na mu kangombe ka yambi, nakuvelwisila kwimbo lyavo.

⁶ Njikaleka kunto na mbwela, kwecela vanu vange ngeci veluke kutunda ku mafuti a kulyala na ku mitambela yoshe ya mu kaye.

⁷ Vakevo vanapu vanu vange, njavatangele ngeci vanene kasingimiko kuli yange.”

Isalele wapwa mukaleo wa Shukulu Kalunga

⁸ Njambi alinakwendeka ngwendi, “Neneni vanu vange amolika. Vali na mesho, oloni vanapu tupuputwa, vali na matwi, oloni vanapu tusinda-matwi!

⁹ Saneni miyati ya vanu vaije kuno. Iyajo wa ali vinjambi vavo asa kwendeka vyuma vya kulutwe? Iyajo umo wavo wambulwile vije vilinakulingiwa ololo? Vinjambi ava vanene vakaleo vavo, mukumwesa ngeci vanendeka vushunga, mukushulisa vushunga vwa majwi avo.

¹⁰ “Vanu va Isalele, yeni munapu mu vakaleo vange, njakwangwile kupwa ngamba yange, njishaka ngeci unjizivuke nakunjikulaela, nakuzivisisa ngeci yange lika njapwa nji Njambi. Kukwesi weka lalo njambi, kukwakele njambi weka lalo wai, co kakakalako lalo.

¹¹ “Yange lika njapwa Kalunga, uje asa kumyamena.

¹² Njamikulaesele ngwange njimyamena, co njanyungile cikulaeso cange. Kukwesi njambi weka lalo nalingi cuma eci, yeni munapu mu vakaleo vange.

¹³ Yange njapwa nji Njambi, co simbu yoshe njikakalako. Naumo wai akatambula vaje vali mu livoko lyange, nambe kuvindika vije vinjipanga.”

Kuvomboloka kutunda mu Mbambilone

¹⁴ Njambi wakujela wa Isalele, Shukulu Kalunga uje wamipatwile, alinakwendeka ngwendi, “Akumyamena, njikatuma nzita yakulwisa Mbambilone, njikapokozola vikolo vya nganda, co muyoyo wa vanu valimo ukatenguluka kulila.

¹⁵ Yange njapwa Kalunga, Njambi yeni wakujela. Yange njamitangele, Isalele, yange njapwa mwene yeni.”

¹⁶ Ku san̄ulu Shukulu Kalunga wamangele ngila mu mema a kalunga, mema a cingungu-muta.

¹⁷ Wanyongesele mashwalale va nzita yakama, mashwalale va matemba na tuvalu. Voshe vawile kuvendukile lalo, vazimine ngwe mukole wa mu ndeya!

¹⁸ Oloni Shukulu Kalunga nendeka ngwendi, “Kesi mukakateye ku vyuma vyalaja nambe kuyongola vije vyalingiwile laja.

¹⁹ Kengeni ku vyuma vyaviha vije vinjikalinga. Vyalingiwa laja, mwasa kuvimona ololo! Njikamanga tapalo mu mambo, nakwitisamo vana va vindonga vya mema.

²⁰ Nameme tusitu vakanjisingimika, vimbanje na vankumbwa vakanjishangazala, njiketisa vindonga vya mema mu mambo, kwana mema ku vanu vange vaje vanjalyangwilile.

²¹ Vakevo vanapu vanu vaje njalitangelele, co vakaimba nakunjishangazala!”

Vuvi vwa Isalele

²² Shukulu Kalunga alinakwendeka ngwendi, “Isalele munajuka, kesi kujuka kwakunjilemesa.

²³ Kumwanjinenelele vin̄ombelo vyeni vya kwenyeka vya vimanga, kumwanjisingimikile na vin̄ombelo vyeni. Kunjamipesele akushaka vin̄ombelo, nambe kumiyandesa akushaka insense.

²⁴ Kumwanjilandelele insense, nambe kunjana litambelo lyalivwa lya tusitu tweni va n̄ombelo. Oloni mwanjizeyesa na vuvi vweni, mwanjizeyesa na vivulumuna mwalingile.

²⁵ Nameme ngoco, yange njapwa Njambi uje muka-kumisambesa ku vuvi vweni omwo lizina lyange, co kunjikanuka lalo vuvi vweni vuje vumunalingi.

²⁶ “Ijeni tuye ku mbanja, neneni viyongola vyeni, ambululeni n̄anda yeni kumwesa ngeci munalingi mwamuvwa!

²⁷ Kukulwila yeni wakulivanga walingile vuvi, vantwama veni valingile vuvi vwakunjilwisa,

²⁸ co vaka-kushwana veni vajwalesele mwela wange wakujela. Ngecivene, njanenele tuyando a Isalele, njatavele vanu vange vavazivise shwamwa.”