Isaya 42 - Livulu lya Shukulu Kalunga

Ngamba ya Shukulu Kalunga

¹ Shukulu Kalunga alinakwendeka ngwendi, “Kengeni ngamba yange uje injinatakamesa, uje injinaangula, muli ikeye njinavwaelela. Njikaka munzinzime wange ali ikeye, co akanena vushunga ku mafuti oshe.

² Ikeye kakatambeka nambe kutendeka lijwi lyendi, nambe kwendeka majwi amangi mu vitapalo embwe.

³ Kakapokola lihongo lyakutepama, nambe kuzima mulangi wakutsitsivala wa mu ndeya. Akamona ngeci vushunga vulinakulingiwa ku vanu voshe.

⁴ Kakonwa nambe kujuka, noo nanene vushunga asi. Mafuti a kulyala akashungwiya manene vilongesa vyendi.”

⁵ Njambi watangele melu nakuwajangumuna, ikeye wajalele kaye na vyoshe vije vilimo, ikeye mukakwana mwonyo kuli vanu voshe va mu kaye. Co ololo Shukulu Kalunga Njambi nendeka kuli ngamba yendi ngwendi,

⁶ “Yange Kalunga njinakusana nakukwana nzili, nakumona ngeci vushunga vulinakulingiwa ano asi. Muli yove njikalinga cikumiiyo na miyati yoshe, muli yove njikasholola ceke ku mafuti.

⁷ Ukatonesa mesho a tupuputwa, nakupatula vaje vali mu tumenga twa lisusulungu.

⁸ “Yange lika Kalunga Njambi yeni. Kukwesi njambi weka lalo injikana vumpau vwange, nambe kutavesa vishangazala vyange kuvyana ku tumponya.

⁹ Kenga, vyuma vyoshe vinasholoka ngeci muje njendekele ngwange vikalingiwa, co ololo njambulula vyuma vije vikalingiwa kulutwe.”

Mwaso wakushangazala Njambi

¹⁰ Imbileni Shukulu Kalunga mwaso wauha, kaye koshe kaimbe nakumushangazala! Mushangazaleni, yeni vaka-kwenda a mema a kalunga, mushangazaleni, yeni vikashama vyoshe vya mu mema a kalunga! Mafuti aje alikulyala, na voshe vaje valimo, vaimbe.

¹¹ Mambo na membo amwo vashangazale Njambi, vanu va ku Kendale vamushangazale! Vaje vakala mu nganda ya Sela vatambeke nakujolela akamwa ya minkinda!

¹² Vaje vakala ku mafuti a kulyala vaane cishangala na vumpau kuli Shukulu Kalunga!

¹³ Shukulu Kalunga aya mukulwa, ngwe lishwalale wa vukalu alinakutambeka na nzili yendi yoshe, omo alinakulwisa vitozi vendi.

Njambi akulaesa kukwasa vanu vendi

¹⁴ Njambi alinakwendeka ngwendi, “Njinoloka kuluu simbu yakama, kunjakumbulwile vanu vange. Oloni ololo simbu yakulinga cuma cimo inete, njikatambeka ngwe munakazi akita.

¹⁵ Njikanyongesa malundu na minkinda nakumisa mwila cau na miti. Vindonga njikavipwisa mambo, co njikomisa cau mashali a mema.

¹⁶ “Njikatwamenena tupuputwa twange mu vitapalo vije kuvendele. Njikatengulula lisusulungu lyavo kupwa ceke, njikavavwaesela lifuti lije lya minkinda nakulipwisa lyakulambasa. Evi vikevyo vikulaeso vyange, co njikavanyunga, kunjikajuka embwe.

¹⁷ Voshe vaje valemesa tumponya, kuvapwisa vinjambi vavo, vakavelwisa munima nakuvazivisa shwamwa!”

Kwonwa kulilongesa kwa Isalele

¹⁸ Shukulu Kalunga alinakwendeka ngwendi, “Tolilileni, yeni vanu vakusinda matwi! Kengeseseni mwamuvwa, yeni tupuputwa!

¹⁹ Kwali umo kapuputwa natuvakana ngamba yange? Nambe kasinda-matwi uje natuvakana muluwa wange injatumu?

²⁰ Isalele, wamono vyavingi, cooni vyalumbunuka vikajo kuli yove? Uli na matwi akuziva lalo, oloni vyuma mukajo viwunazivi?”

²¹ Shukulu Kalunga wapwa Njambi uje ashaka kwamena, ashaka mashiko endi na vilongesa vyendi, ngeci vanu vendi vavyononoke.

²² Oloni vanu vendi vanavevila, voshe vanawila mu viteke, nakuvashweka mu tumenga. Vanavevila nakuvaviisila vyavo, oloni naumo wai naijako nakuvakwasa.

²³ Iyajo umo wa ali yeni akatolilila vyuma evi? Kutunda ololo nakutwalao? Kuma mukatolilila nakunyanyama?

²⁴ Iyajo waanene Isalele kuli vaje vavevilile? Shukulu Kalunga uje twaviisilile, ikeye walingile cuma eci! Kutwapandele kuyoya ngwe muje mwashakele ngeci tuyoyemo, nambe kwononoka vilongesa vije vyatwanene.

²⁵ Ngecivene, twazivile nzili ya vukalu vwendi, nakumona tuyando twa nzita, vukalu vwendi vwashukumine mu Isalele ngwe tuhya, oloni kutwazivukile vije vyalingiwile, nacimo cai twalilongeseleo.