Isaya 41 - Livulu lya Shukulu Kalunga

Cikulaeso ca Njambi ku Isalele

¹ Njambi alinakwendeka ngwendi, “Olokeni kuluu nakutolilila kuli yange, yeni muli mu mafuti a kulyala! Pweni vanu vakusimpa, shwenyeni kuno ngeci mwakwendeke. Ijeni tulikungulwile amo nakuyongola iya nashungamesa.

² “Iyajo uje wanenele Siluse mwene wa Pelesha kutunda mu ngangela nakumuhyanesa kwoshe kuje aya? Iyajo alinakumwasesa ngeci afungulule vimyene na miyati ya vanu? Mukwale wendi uvapwisa ngwe likungu lyangoco. Mikili yendi ivashandola ngwe mwila ushandoka na lihunzi!

³ Avasheka lumbisi manene ngeci mendi endi kesi kulyata asi!

⁴ Iyajo akalingisa vyuma evi? Iyajo akendesa vyuma tunde ku san̄ulu? Yange Shukulu Kalunga, njakeleko avushangumukilo, co lalo njikakalako a mamaneselelo.

⁵ “Vanu va ku mafuti a kulyala vamwene vije vinjalingile, valijajelele omo vavimwene. Co voshe valikungulwile nakwija.

⁶ Vanu valikwase nakulitakamesa umo na mukwavo.

⁷ Vaka-kushonga vatakamesa vaka-kufula ngolinde. Vaka-kufula vikuvo vatakamesa vaka-kutokeka vimbambo. Vendeka ngwavo, ‘Vanavitokeka mwamuvwa,’ co vapameya vyuma na vimbambo ngeci kesi vishwenye.

⁸ “Oloni yove, Isalele ngamba yange, yeni mwapwa muyati uje unjaangwile, vatekulwila va musamba wange Avilahama.

⁹ Njamitundisile ku mamaneselelo a kaye, njamisanene kutunda ku vimbango vyakulyala vya kaye, co njendekele kuli yeni ngwange, ‘Yeni munapu vangamba vange.’ Kunjamivyanene embwe, oloni njamyangwile.

¹⁰ Kesi muzive lyova, yange njili neni amo! Kesi mujaje, yange Njambi yeni! Njikamitakamesa nakumikwasa, njikaminyunga nakumyamena.

¹¹ “Voshe vaje vanamiluvalela, vakaziva shwamwa nakukomoka. Vaje valinakumilwisa vakanyonga,

¹² mukavashakezeka oloni kumukavawana, omwo vakevo vakanyonga.

¹³ Yange Kalunga Njambi yeni, njikamikolesa nakumileka ngwange, ‘Kesi muzive lyova, njikamikwasa.’ ”

¹⁴ Shukulu Kalunga nendeka ngwendi, “Isalele nameme munapu muvavandondo, kesi muzive lyova. Yange Njambi wakujela wa Isalele, njikamyamena nakumyovola.

¹⁵ Njikamipwisa ngwe likina lyakujungwisa, lije lili na mayo amaha akuvambuka. Mukajungula minkinda ngwe muvakajungula tiliku nakuyishalamesa, co malundu akatsenoka kupwa likungu.

¹⁶ Mukavombila mu mukambwila, co lihunzi lyakama likavashandola nakuvapekumwina kulyala. Asinoni mukavwaelela, nakunjishangazala, omwo yange njapwa nji Njambi yeni, Njambi wakujela wa Isalele.

¹⁷ “Omo tuutu na vaka-kujeneka vashakezeka mema, oloni kuvakaawana, co a milivu yavo ominina cau na lihwila, asinoni yange Kalunga, Njambi wa Isalele njikavakwasa, kunjikavevala embwe.

¹⁸ Njiketisa vindonga vya mema mukati ka malundu akuma, co masima a mema a tuvwelu-vwelu akaita mu vimbongo. Njikatengulula mambo kupwa mashali a mema, na livu lyakuma likakala na masima a mema a tuvwelu-vwelu.

¹⁹ Njikamenesa miti ya kendale mu mambo, na miti ya mingongo, na miti ya muleta, na miti ya olive, na miti ya tulipi, na miti ya njunipa, na miti ya sipelese.

²⁰ Vanu vakacimona, nakuzivuka ngeci yange Kalunga, Njambi wakujela wa Isalele, njavitangele vyoshe.”

Tumponya vanapu vangoco

²¹ Shukulu Kalunga, mwene wa Isalele, alinakwendeka ngwendi, “Yeni vinjambi va vaka-mafuti, ambululeni vin̄anda vyeni. Shololeni vukaleo vwavuvwa vumulinavwo!

²² Ijeni kuno, co simutwiyeni vije vikalingiwa, tulekeni vyuma vya kunima, co tukaviyongola. Tulekeni vuma vya kulutwe, ngeci tuzivuke vika vije vikalingiwa.

²³ Shololeni ngeci yeni mu vinjambi, akupwisa vyuma vije munendeka kupwa vya vushunga. Lingeniko cuma cimo cacivwa, nameme cacivi, ngeci yetu tuzive lyova nakulikomokela!

²⁴ Yeni kesi mu vanu, na vyoshe vimulinga kuvyesi na seo, vaje valinakumilemesa valinakulilingisa vunyengwe!

²⁵ “Njinaangula mwene uje ukatunda mu ngangela, njikamunena kuno ngeci akulwile ku kunto. Akalyatangela ali vaka-kushwana ngwe lindova, ngwe muka-kushonga alyatangela a vuma.

²⁶ Iyajo wa ali yeni uje watulekele vin̄anda te kanda vicilingiwe, ngeci tuvizivuke? Naumo wai weni wendekele lijwi, naumo wai wamizivile mwendeka cuma!

²⁷ Yange Kalunga njapwile wakulivanga kuleka muzimbu Siyone, njatumine muluwa ku Yelusalema nakukendeka ngwendi, ‘Vanu vove valinakwija kwimbo!’

²⁸ Omo njakengele mukati ka vinjambi, naumo wai wakele na cuma cakwendeka, naumo wai wakumbulwile vihula vinjehwile.

²⁹ Voshe vinjambi ava vanapu vangoco, nacimo cai civasa kulinga, vanapu vakuzeya, co kuvesi na nzili.”