Isaya 40 - Livulu lya Shukulu Kalunga

Majwi a cinyangavili

¹ Njambi yetu alinakwendeka ngwendi, “Zembelekeni vanu vange. Vazembelekeni!

² Takameseni vanu va ku Yelusalema. Valekeni ngeci tuyando twavo tunahu, na vuvi vwavo vanavusambesa. Njavahisile manene a vuvi vwavo vwoshe.”

³ Lijwi lya umo muka-kutambeka ngwendi, “Vwaeseleni Shukulu Kalunga tapalo mu mambo! Vwaeseni tapalo yakushungama ya Njambi yetu!

⁴ Ofweleni cimbongo coshe, nyekumwiseni minkinda yoshe. Malundu apwe cana, co lifuti lyakunyekama lipwe lyakulambesa.

⁵ Asinoni vumpau vwa Shukulu Kalunga vukasholoka, co vanu voshe vakavumona. Shukulu Kalunga ikeye vavenya nakulaesa evi.”

⁶ Lijwi lya umo muka-kutambeka ngwendi, “Ambulula lijwi!” Njehwile ngwange, “Lijwi mukajo njinapande kwambulula?” “Ambulula ngwove vanu voshe vanafu ngwe mwila, myonyo yetu ya kasimbu kakandondo lika, ngwe vishani vya mu shwata.

⁷ Mwila ujujwama, na vishani vyuma akushika kwa Shukulu Kalunga. Mwa vushunga vanu vanapu mwila.

⁸ Eyo, mwila ujujwama, na vishani vyuma, oloni lijwi lya Njambi yetu likakala simbu yoshe.”

⁹ Yelusalema, lamata a munkinda waulaja, ambulula vin̄anda vyavivwa! Siyone, tambeka na lijwi lyakama, ambulula vin̄anda vyavivwa! Ambulula, kesi uzive lyova. Leka membo a Yunda ngwove, Njambi yeni ali kuno!

¹⁰ Kengeni Shukulu Kalunga wa Akamwa ya Vyoshe aija nakushwana na nzili, alinakwija na cikandelela ca vanu vendi.

¹¹ Akanyunga vutanga vwendi mwamuvwa ngwe kanyungi, akakungulwila amolika vana va vimanga, nakuvambata mu mavoko endi, co akatwamenena vainavo kamandondo-kamandondo.

Naumo wai alyeseka na Njambi ya Isalele

¹² Iyajo neseka kuseteka mema a kalunga nambe kujangumuna lilu na mavoko endi? Iyajo naaka likungu mu mutonga, nambe kupeselesa minkinda na malundu a cipeseleso?

¹³ Iyajo asa kuleka Shukulu Kalunga vyanapande kulinga? Nambe kumulongesa nambe kumunangula?

¹⁴ Njambi wehwile iyajo ngeci amulongese mana na vushunga? Nambe kumulongesa muvinapande kupwa vyuma?

¹⁵ Miyati ya vanu inapu yangoco kuli Shukulu Kalunga, inapu ngwe limbase lya mema mu lilonga, na man̄anda aje ali alyala anapu ngwe likungu.

¹⁶ Tusitu voshe va mu shwata ya Lembanone, kuvapwilemo mukuvakombelela kuli Njambi yetu, na miti yamwo yaindondo manene kuyivwekesa tuhya.

¹⁷ Miyati ya vanu inapu yangoco kuli ikeye.

¹⁸ Iyajo alyeseka na Njambi? Cifwa mukajo mukamusetekesa naco?

¹⁹ Ikeye kafwile ngwe kamponya kakushonga kuli vanu, kaje kavanafwiki na ngolinde vaka-kushonga, nakukatumbika a citumbikilo ca siliva.

²⁰ Munu uje kasa kuwana siliva nambe ngolinde aangula citi cije kucesi kusukuwa. Ashakezeka mutongwe ngeci a shonge kamponya kaje kukasa kuwila asi.

²¹ Kuma kumuzivuka ndi? Kuma kuvamilekele ku san̄ulu ndi? Kuma kumwazivukile tunde a simbu yakutanga kaye?

²² Njambi ikeye muka-kushwana kaye koshe vanu voshe valinakuyoyao, vanapu lika ngwe mishwa. Ikeye wajangumwine lilu, ngwe nanga, ngwe mbalaka yakushokolola.

²³ Njambi akakeesa vaka-kushwana vakama, nakuvapwisa vangoco.

²⁴ Vanapu ngwe vimena vya njovolwezi, vije vilinakukola, oloni omo Shukulu Kalunga ahwiminao, co vyuma cau nakupekumuka ngwe vishwashwa.

²⁵ Njambi wakujela mwasa kumusetekesa neyajo? Kuma kwali umo wakulifwa nendi ndi?

²⁶ Anduleni mesho eni kwilu! Iyajo watangele vingongonosi vije mulinakumona? Uje avitwamenena ngwe mashwalale, ikeye azivuka vungi vwavyo, co avisana vyoshe a mazina avyo! Nzili yendi yapwa yakama manene, naimo ngongonosi yai yazimbalao!

²⁷ Isalele, omwo vikajo ulinyenga ngwove, “Shukulu Kalunga kazivuka tuyando twove, nambe kukunyunga nga uyanda kwakujeneka mulonga?

²⁸ Kuma kumuzivuka ndi? Kuma kuvamilekele ndi? Shukulu Kalunga ikeye Njambi wa ku myaka yoshe, ikeye watangele kaye koshe. Kesi kujuka nambe kuzeya. Naumo wai asa kuzivisisa viyongola vyendi.

²⁹ Shukulu Kalunga muka-kukolesa vaje vanazeye nakujuka.

³⁰ Nameme vakwenje vakazeye, vatanuka, co vawa.

³¹ Oloni vaje vakulaela kuli Shukulu Kalunga mukuvakwasa, vakawana nzili yaiha. Vakapulula a mambava ngwe vingonga, vakashatuka oloni kuvakajuka, vakenda oloni kuvakazeye.”