Isaya 4 - Livulu lya Shukulu Kalunga

¹ Omo simbu ije yeta, vanakazi vatanu na vavali vakakwata munalume umolika nakwendeka ngwavo, “Twasa kulilisa nakulizika yetu vavenya, oloni tutave lika ngeci upwe u munalume wetu, ngeci kesi tukale na shwamwa yakuyoya mu vuzike.”

Yelusalema vaitungulula lalo

² Simbu ikaija omo Shukulu Kalunga akalingisa lifuti lyendi kukala na vwilo na vumpau. Co vanu va Isalele voshe vaje vakayoya vakajolela nakuvwaelela a vije vilinakumena mu lifuti lyavo.

³ Munu woshe uje nasalao mu Yelusalema, uje yanaangula Njambi ngeci ayoye vakamutumbula wakujela.

⁴ A nzili yendi, Shukulu Kalunga akasompa nakujelesa lifuti nakukusha mulonga wa Yelusalema na maninga aje etikilile muje.

⁵ Asinoni Shukulu Kalunga akatuma lishelwa akamwa ya Munkinda wa Siyone na a voshe vaje vakakungulukilao, a simbu ya mutanya, na vwisi, na mulangi wa tuhya a simbu ya vutsiki. Co vumpau vwa Njambi vukafwika nakunyunga nganda yoshe.

⁶ Vumpau vwa Njambi vukapwa munzinze wa nganda ngeci kesi mukale ntwima ku mutanya, nakupwisa nganda mutambela wauvwa, uje wakuvanda ku nyonzi na ku lihunzi.