Isaya 39 - Livulu lya Shukulu Kalunga

Miluwa vakutunda ku Mbambilone

¹ A simbu ije vene mwene wa ku Mbambilone, Melondake Mbalandane, muna Mbalandane wazivile ngeci Mwene Hezekiya nakele nakuvinja, co wamutumine mukanda amo na vwana.

² Hezekiya watambwile mwamuvwa vaje miluwa, wavamwesele vufuko vwendi, siliva na ngolinde, na n̄undu, na mazi akunika lwengo lwaluvwa, na vitwa vyendi vyoshe vya mashwalale vendi. Wavamwesele vyuma vyoshe vyakele mu milili yendi yakutulikila na mu vumwene vwendi.

³ Asinoni Isaya muka-kwimanena waile kuli Mwene Hezekiya, wamwihwile ngwendi, “Vanu ava vanatundu kulijo? Vikajo vanendeka kuli yove?” Hezekiya wamukumbulwile ngwendi, “Vanatundu ku lifuti lya kulyala, ku Mbambilone.”

⁴ “Vikajo vanamono mu lipela?” Hezekiya wamukumbulwile ngwendi, “Vanamono vyuma vyoshe. Njavamwesa vyuma vyoshe vya mu milili yakutulikila.”

⁵ Co Isaya walekele mwene ngwendi, “Shukulu Kalunga Muka-nzili yoshe nendeka ngwendi,

⁶ simbu ilinakwija omo vyuma vyoshe vya mu lipela lyove, na vyuma vyoshe vije vakukulwila vove vatulikile kweta ku litangwa lya lelo, vakavitwala ku Mbambilone. Nacimo cai cikasalao.

⁷ Vatekulwila vove vamo va a mbunge vakavatwala, co vakavapwisa vayunuke ngeci vakapange mu lipela lya mwene wa ku Mbambilone.”

⁸ Co Mwene Hezekiya wayongwele ngwendi kukakala kwoloka na vushunga a simbu yakuyoya kwendi, co wendekele kuli Isaya ngwendi, “Lijwi wanjileke lyakutunda kuli Shukulu Kalunga linapu lyalivwa.”