Isaya 38 - Livulu lya Shukulu Kalunga

Mushongo wa Mwene Hezekiya nakwinduka kwendi

¹ A matangwa aje Mwene Hezekiya wavinjile, co washakele kutsa. Isaya muka-kwimanena muna Amoze waileko nakumumona, co wendekele kuli ikeye ngwendi, “Shukulu Kalunga nendeka ngwendi vwaesa mwamuvwa vyuma vyoshe, omwo kuwinduka embwe. Utsa.”

² Hezekiya wakengesele cihanga cendi ku civumbe, co walombelele ngwendi,

³ “Shukulu Kalunga, anuka ngeci yange njakupangela nakukulaela na kulongwa, simbu yoshe njinakele nakulinga vije viwashakele ngeci njivilinge.” Co walilile manene.

⁴ Asinoni Shukulu Kalunga washikile Isaya

⁵ kwilukila kuli Hezekiya nakumuleka ngwendi, “Yange Kalunga, Njambi ya kukulwila yove Ndaviti, njinazivi lilombelo lyove, co njamono misozi yove, njakutava kuyoya myaka likumi na itanu.

⁶ Njikakwamena yove na nganda eyi ya Yelusalema kuli mwene wa Asilya, co yange njikanyunga nganda eyi simbu yoshe.”

⁷ Isaya wakumbulwile ngwendi, “Shukulu Kalunga akakwana cimweso cakumwesa ngeci ikeye akanyunga cikulaeso cendi.

⁸ A vindendelo vyatungile Mwene Ahaze, Shukulu Kalunga akelwisa munzinze munima manambo likumi.” Co munzinze welukile munima manambo likumi.

⁹ Omwo Hezekiya wendukile ku mushongo wendi, co wasonekele mwaso ou wakushangazala.

¹⁰ Njayongwele ngeci njikaya ku vukalo vwa vatsi, omwo vanatepulula matangwa akuyoya kwange mu simbu ino.

¹¹ Njayongwele ngeci muno mu kaye ka vaka-kuyoya, kunjikasa lalo kumona Shukulu Kalunga, nambe munu woshe uje alinakuyoya.

¹² Mwonyo wange vauvatwisilile, co wahwile ngwe mbalaka omo vanayeteka, ngwe nanga yakuteta ku mukundwilo. Njayongwele ngeci Njambi namanesa mwonyo wange.

¹³ Omwo mushongo, co njatetele vutsiki vwoshe, njazivile ngwe ndumba alinakupokozola vitsiya vyange. Njayongwele ngeci Njambi namanesa mwonyo wange.

¹⁴ Lijwi lyange lyapwile lyalindondo nakuzeya, co njalinyengele ngwe katela. Mesho ange ajukile nakukenga kuli yove. Shukulu Kalunga, njamene ku tuyando twoshe otu.

¹⁵ Vatijo njasa kwendeka? Shukulu Kalunga nalingi ngacije. Mbunge yange ilinakuvavala, co kunjasa kulala.

¹⁶ Shukulu Kalunga, njikayoyela ali yove, njiyoyela ali yove lika. Njikangwise, co njitave ngeci njiyoye.

¹⁷ Vusiwa vwange vukemuka kwoloka. Amena mwonyo wange ku vushonde vwoshe, unjisambese ku vuvi vwange vwoshe.

¹⁸ Naumo wai ali mu vukalo vwa vatsi asa kukushangazala. Vatsi kuvasa kukulaela kulongwa kwove.

¹⁹ Kuvanga vaka-kuyoya lika vakevo vakushangazala, ngwe munjili nakukushangazala yange ololo. Visemi valeka vana vavo mukwafwa kulongwa kwove.

²⁰ Shukulu Kalunga, unanjikangwisa, tukaimba tulyalya nakwimba myaso yakukushangazala, tukaimba myaso yakukushangazala mu Njuvo yove matangwa oshe akuyoya kwetu.

²¹ Isaya walekele mwene alameke mukamango wa mikuyu a lizimbo ngeci akanguke.

²² Asinoni Mwene Hezekiya wendekele ngwendi, “Cizivukiso mukajo cikanjimwesa ngeci njikasa lalo kuya ku Njuvo ya Shukulu Kalunga?”