Isaya 37 - Livulu lya Shukulu Kalunga

Mwene alomba Isaya kumunangula

¹ Omo Mwene Hezekiya wazivile muzimbu wavo, watavozwele vuzalo vwendi mukuviilila, co wazalele cikeleya, waile ku Njuvo ya Shukulu Kalunga.

² Watumine Elyakime, mwata wa ku lipela, na Shevana, muka-kusoneka wa mu mbanja, na vaka-kukombelela va vakulunu kuli Isaya muka-kwimanena muna Amoze. Navo lalo vazalele vikeleya.

³ Awa akewo majwi avalekele Hezekiya ngeci vaambulule kuli Isaya ngwavo, “Litangwa lya lelo linapu litangwa lya tuyando, vanatuhisa, co tuli mu vusiwa. Tunalifu na munakazi uje ashaka kukita, oloni kesi na nzili yakukita.

⁴ Mwene wa vaAsilya natumu mwata wakama kushaula Njambi wakuyoya. Shukulu Kalunga Njambi yove azive kushaula oku nakuhisa vaje vanendekelemo. Ngecivene, lombela kuli Njambi ali vanu vetu vaje vacili nakuyoya.”

⁵ Omo Isaya watambwile majwi awa kuli Mwene Hezekiya,

⁶ wamukumbulwile ngwendi, “Shukulu Kalunga nakuleka ngwendi kesi utave vaAsilya vakutewese na lingwavo lyavo ngeci ikeye kasa kumyamena embwe.

⁷ Shukulu Kalunga akazivisa mwene wa Asilya lingwavo lije likamwilwisila kwimbo lyavo, co Shukulu Kalunga akamutsiila kuje vene.”

VaAsilya valishungwiya lalo

⁸ Lambashake mwata wa vaAsilya wanangukile ngeci kuma mwene natundu mu Lakishe, alinakulwa na nganda ya muyehi ya Limbena, ngecivene, waile kuje nakumwihula.

⁹ Lijwi lyetele kuli vaAsilya ngeci nzita ya vaka-Ingito, ije yatwamenenene mwene wa ku Sundane, yakele nakwija nakuvalwisa. Omo mwene wazivile evi, co watumine mukanda kuli Mwene Hezekiya

¹⁰ wa mu Yunda wamulekele ngwendi, “Uje njambi iwakulaela nakuleka ngwendi kunjasa kukufungulula, oloni kesi ukulaele vyuma evi embwe.

¹¹ Unazivi laja vyakalingi mwene wa vaAsilya ku lifuti lyoshe lije lyanayongola kunyongesa. Kuma yove wayongola ngeci wasa kutewa ndi?

¹² Vakukulwila vange vanyongesele vinganda vya Ngozane, na Halane, na Lezefe, co vatsiile vanu va ku Mbetendene vaje vakele mu Telasale, njambi yavo naumo wai wavamenene.

¹³ Vali kulijo vimyene va vinganda vya Hamate, na Alepande, na Sefalevaime, na Hena, na Ivaha?”

¹⁴ Mwene Hezekiya watambwile uje mukanda kuli vaje miluwa, co waulavele. Asinoni waile ku Njuvo ya Shukulu Kalunga, co waakele uje mukanda ku mesho a Shukulu Kalunga,

¹⁵ co walombelele ngwendi,

¹⁶ “Shukulu Kalunga Muka-nzili yoshe, Njambi ya Isalele, yove watumbama akamwa ya vakelumbi va mambava, yove lika wapwa Njambi, yove washwana vumwene vwoshe vwa mu kaye. Yove watangele kaye na lilu.

¹⁷ Ololo Shukulu Kalunga, kenga a vyuma evi vilinakulingiwa kuli yetu. Tolilila ku vyuma vyoshe vije vyalinakwendeka Mwene Senakelivi vyakushaula yove Njambi wakuyoya.

¹⁸ Shukulu Kalunga, yetu voshe twazivuka ngeci vimyene vaAsilya vananyongesa miyati yaingi, co vanapwisa mafuti avo vingundu,

¹⁹ omwo vinjambi vavo kuvapwile vinjambi vavavwa, oloni vifwa lika vya viti, na mamanya, vije valingile na mavoko a vanu, ngecivene, vavenyekele.

²⁰ Ololo, Shukulu Kalunga Njambi yetu, twamene ku mavoko a vaAsilya, ngeci miyati yoshe ya mu kaye vakazivuke ngeci yove lika Shukulu Kalunga wapwa Njambi.”

Majwi a Isaya kuli mwene

²¹ Asinoni Isaya watumine majwi akuleka Mwene Hezekiya akukumbulula ku lilombelo lya mwene ngwendi,

²² Shukulu Kalunga nendeka ngwendi, “Nganda ya Yelusalema ilinakujola yove, Senakelivi, nakukushendumuna.

²³ Yove unayongola ngwove iyajo iwunashaula nakuyeluwisa? Yove wanjizivisa shwamwa yange, Njambi ya Isalele wakujela.

²⁴ Yove watumine miluwa vove nakulishasha kuli yange ngwove na matemba ove oshe, wafungulwile minkinda yailaja ya Lembanone. Walishashele ngeci yove washinjile miti yailaja ya kendale, na miti yaivwa ya sipelese, co ngwove waketele ku vishwata vyakuzika manene.

²⁵ Lalo walishashele ngwove wendile masima, co wanwile mema a mu mafuti a vaka-kwija, lalo ngwove mendi a mashwalale vove alyatangelele mu Ndonga ya Nailo nakuyumisa cau.

²⁶ “Kuma kuwazivile ngeci yange Kalunga njayongwele laja vutumbe ovu ndi? Co ololo njinavusholola. Njakwanene nzili yakutengulula vinganda vya vimpaka kuvipwisa mitumbo ya vishwashwa.

²⁷ Vanu vakelemo kuvakele na nzili, oloni vazeyele nakuziva lyova. Vafwile ngwe mwila wa mu lihya nambe ngwe shaku yakukolela a ciluli ca njuvo, co ipekumuka na lihunzi lyakutundilila mu ngangela.

²⁸ “Oloni njazivuka kalesi yove, na vije viwukalingi na kuje kuukai. Njazivuka nomu muukanjilwisila.

²⁹ Njatambula laja muzimbu wakuluvala kwove, na kulyalesa kwove, co njikakumwesa ngeci yange njapwa iya, omwo njikakutwala kwoshe kuje kunjinashaka.

³⁰ “Eci cikeco cimweso ca vije vikasholoka. Mwaka uno na mungolosika, mukalya lika vimbuto vyakulimenena mu shwata, oloni mungolosikulula mukalima tiliku nakuyiteja, co mukakuna mikolovozi ya vushuka vwa vinyu, nakulya vushuka vwakwo.

³¹ Co vaje vakasala mu Yunda vakayoya mwamuvwa, ngwe vimena vije vitwala mizi yavyo manene mu livu, co viima vushuka.

³² Mu Yelusalema mukakala vanu, co a Munkinda wa Siyone akakala vaje vanovoka, omwo Shukulu Kalunga Muka-nzili yoshe nayongola vyuma evi ngeci visholoke.

³³ “Omu mukemwo mwanendeka Shukulu Kalunga ali mwene wa vaAsilya ngwendi, ‘Kakakovela mu nganda eyi, nambe kwashamo mukili umo embwe. Kukwesi mashwalale vali na vintelo vakaija kuyehi na nganda eyi, nambe kuzengeleka cimpaka.

³⁴ Ikeye akeluka lalo mu ngila ije yezililile, kujeneka kukovela mu nganda. Yange Kalunga, njinendekamo.

³⁵ Njikamena nganda eyi nakuyinyunga, omwo a lizina lyange, na omwo a cikulaeso njalingile kuli ngamba yange Ndaviti.’ ”

³⁶ Co a vutsiki vuje vene kangelo ka Shukulu Kalunga waile ku cilombo ca vaAsilya, watsiile mashwalale vakupwa 185,000. Co alikaki mutondo, vavawanene voshe vanatsi!

³⁷ Asinoni Senakelivi mwene wa va Asilya watundileko, welukile ku Nenevayi.

³⁸ A litangwa limo, omo wakele nakulemesa mu njuvo ya njambi yendi Nisoloke, vana vendi vavali va vanalume, Andalameleke na Shalezele, vamutsiile na mikwale yavo, co vatewelele ku lifuti lya Alalate. Munendi Esalehandone wamushwanene kupwa mwene.