Isaya 36 - Livulu lya Shukulu Kalunga

VaAsilya vashungwiya Yelusalema

¹ Mu mwaka wamulikumi na iwana omo Mwene Hezekiya washwanene mu Yunda, Senakelivi, mwene wa mu Asilya, walwisile vinganda vyakele mu cimpaka ca Yunda, co wavifungulwile.

² Co washikile mwata wendi wakama vatunde ku Lakishe, vaye ku Yelusalema na mashwalale vavangi ngeci vakashike Mwene Hezekiya aliite. Mwata washokele ije ngila kuje vakele nakupanga vinanga, ku ngenge ya kandonga kaje kakele nakutuwisa mema mu kashali ka akamwa ya lilundu.

³ VaYunda vatatu vezile nakuliwana nendi, mwata wakama wa ku lipela, Elyakime muna Hilikiya, muka-kusoneka wa mu mbanja, Shevana, na mwata wakama muka-kunyunga vyakusoneka, Yowahe muna Asafe.

⁴ Mwata wa vaAsilya wavalekele ngwendi mwene ashaka kuziva vika vyalingisile Mwene Hezekiya kukulaela kwangacije.

⁵ Co wehwile ngwendi, “Kuma yove uyongola ngwove wasa kuhyana nzita na majwi lika ndi? Iyajo iwuyongola ngeci akakukwasa kutengulukila Asilya?

⁶ Yove ulinakuyongola ngeci Ingito ikukwasa, oloni eci cinapu ngwe munu apangesa lihongo kupwa mulamu, omo lipokoka, co likulengula mu livoko. Mukemwo mwanafu mwene wa Ingito omo munu ajendamena ali ikeye.”

⁷ Uje mwata wa vaAsilya wendekele lalo ngwendi, “Amo yove unjileka ngwove unajendamena ali Shukulu Kalunga Njambi yove ndi? Hezekiya ikeye wasiwile tuzangu twakulemesela Shukulu Kalunga, amo na mitula, omo walekele vanu va mu Yunda na mu Yelusalema kukalemesela lika ku mutula wa mu Yelusalema.

⁸ Ngecivene, njikalinga lizivasano nove mu lizina lya mwene. Njikakwana tuvalu 2,000 nga uwana vanu vavangi vakuvalonda.

⁹ Yove kuwesi na nzili yakweseka nameme na mwata wamundondo wa Asilya, yove wakulaela vaka-Ingito kukutumina matemba na vaka-kwendela a tuvalu.

¹⁰ Kuma wayongola ngwove njinalwisa lifuti lyove nakulinyongesa kujeneka Shukulu Kalunga kunjikwasa ndi? Shukulu Kalunga vavenya ikeye wanjilekele kulilwisa nakulinyongesa.”

¹¹ Ngecivene, Elyakime, na Shevana, na Yowahe valekele uje mwata ngwavo, “Endeka netu mu ndaka ya Alamaike tuziveko, kesi wendeke mu ciHevelu, omwo vanu voshe vali a civumbe valinakutolilila.”

¹² Co ikeye wavakumbulwile ngwendi, “Kuma mwayongola ngweni mwene nanjitumu kuli yeni lika na kuli mwene kumileka evi vin̄anda ndi? Embwe, njilinakwendeka lalo kuli vanu ava vanatumbama a civumbe, vaje vakalya vije vitunda mwimo lyavo nakunwa mema aa mivila yavo, ngwe yeni lalo.”

¹³ Asinoni mwata wemanene watambekele mu ciHevelu ngwendi, “Tolilileni evi vyamileka mwene wa Asilya.

¹⁴ Ikeye alinakuminangula ngeci kesi mutave Hezekiya amikwise embwe. Hezekiya kasa kumyamena ku nzili yange.

¹⁵ Co kesi mumutave amisindiye kujendamena ali Shukulu Kalunga. Kesi muyongole ngweni Shukulu Kalunga akamyamena, ngeci avindike mashwalale vetu vaAsilya kufungulula nganda yeni embwe.

¹⁶ Kesi mutolilile kuli Hezekiya embwe! Mwene wa Asilya alinakumishika ngeci mutuuke mu nganda mwakuliite. Co muvavoshe vakamitavesa kulya ku mikolovozi ya vushuka vwa vinyu, na mikuyu ya ku miti yeni, nakunwa mema a mu masima eni,

¹⁷ noo mwene namyaka mu lifuti lyakufwa ngwe lyeni, muje muli vitungu vya mikolovozi ya vushuka vwa vinyu, na tiliku yakulinga vunga vwa makende.

¹⁸ Kesi mutave Hezekiya amikwise akuyongola ngeci Shukulu Kalunga akamipatula. Kuma kuli vinjambi va ku miyati ya vanu veka vaamenene mafuti avo ku mavoko a mwene wa Asilya ndi?

¹⁹ Vali kulijo ololo vinjambi va ku Hamate, na ku Alepande? Vali kulijo vinjambi va vaSefalevaime? Kuma kuli umo wavo waamenene Samaliya ndi?

²⁰ Simbu ikajo vinjambi va mafuti oshe awa vaamenene lifuti lyavo ku mavoko a mwene yetu? Cooni cuma mukajo cimiyongwesa ngeci Shukulu Kalunga asa kwamena Yelusalema?”

²¹ Co vanu volokele kuluu, ngwe mwavalekele Mwene Hezekiya, kuvendekele lijwi limo.

²² Co Elyakime, na Shevana, na Yowahe vatavozwele vuzalo vwavo mukuviilila, co vakalekele mwene vije vyendekele mwata wa Asilya.