Isaya 35 - Livulu lya Shukulu Kalunga

Kuvwaelela kwa vanu va Njambi

¹ Mambo na lifuti lyakuma vikajolela, na vishani vikashamwina mu mambo.

² Mambo ikaimba nakutambeka nakujolela, ikakala na vumpau ngwe Munkinda wa Lembanone, na vukama ngwe Munkinda wa Kalemele na Cimbongo ca Shalone. Munu woshe akamona vumpau vwa Shukulu Kalunga, akamona vukama vwendi na nzili yendi.

³ Koleseni mavoko aje anazeye, co takameseni mavuli aje akuvotsiya.

⁴ Endekeni kuli vaje vanalijujukila ngweni, “Koleseni kesi muzive lyova! Njambi yeni alinakwija. Aija nakulinga shambandinga vitozi veni.”

⁵ Asinoni tupuputwa vakamona, na tusinda-matwi vakaziva.

⁶ Vilema vakajombozoka nakukina, na vaje voshe kuvasele kwendeka, vakatambeka nakujolela. Vana va vindonga vakaita mukati ka mambo,

⁷ lishen̄avu lyakwenya likemuka lishali, co lifuti lyakuma likashula na masima a tuvwelu-vwelu. Muje mwakele vimbanje, mukamena mateve na mahongo.

⁸ Tapalo yaivwa ikaita muje, vakaitumbula ngwavo, “Tapalo Yakujela.” Kukwesi muka-vuvi akendamo, kukwesi cilema akasevwisa vaje vaikava.

⁹ Vindumba kuvakakalamo embwe, nambe tusitu vakutewesa kuvaketimo. Kuvanga lika vaje vanapatula Shukulu Kalunga vakevo lika vakenda mu ngila ije.

¹⁰ Vaketa mu Yelusalema nakujolela, vakaimba nakutambeka nakujolela. Vakavwaelela myaka yoshe, vusiwa nakuviilila kuvikakalako myaka yoshe.