Isaya 34 - Livulu lya Shukulu Kalunga

Njambi akahisa vitozi vendi

¹ Shwenyeni muyehi, yeni miyati ya vanu voshe na vaka-kaye voshe, na vyoshe vije vilinakuyoyao, ijeni kuno mwakutolilile.

² Shukulu Kalunga naluvala na miyati ya vanu voshe, na mashwalale vavo voshe. Ikeye navasompela kutsa.

³ Mivila yavo kuvakaitsindi, oloni ikavolela nakunikila kuje vene, co minkinda ikavenga na maninga.

⁴ Litangwa, na ngonde, na vingongonosi vikanyongolokota. Lilu vakalizenga ngwe livulu, co vingongonosi vikawa ngwe maputa atotomoka ku mukolovozi wa vushuka vwa vinyu nambe ku muti wa mukuyu.

⁵ Shukulu Kalunga navwaesa mukwale wendi, co ukatunda mwilu nakwija a Endome, ali vanu vaje vanasompela kutsa.

⁶ Mukwale wendi ukashula na maninga na mazi avo, ngwe maninga na mazi a vana va vimanga na vimembe vakukombelela. Shukulu Kalunga akatsiya vanu vavangi nakuvapwisa n̄ombelo mu nganda ya Mbozile, na mu mitambela yeka ya mu lifuti lya Endome.

⁷ Vanu vakawa ngwe vampakasha na vana va vingombe, co asi akavenga na maninga nakushula na mazi.

⁸ Eyi ikeyo simbu omo Shukulu Kalunga akapatula Siyone na nakulinga shambandinga vitozi vendi.

⁹ Vindonga vya Endome vikemuka lipombosiwa, co livu likemuka lilungu. Co lifuti lyoshe likenya ngwe lipombosiwa.

¹⁰ Likenya mutanya na vutsiki, co vwisi vukakakumuka myaka yoshe. Lifuti lya Endome likapwa lyamupulungwa ku myaka yoshe, naumo wai akaita mukati kalyo.

¹¹ Mu lifuti mukakala lika makun̄ulu na makololo. Shukulu Kalunga akalipwisa ngundu, ngwe mulyapwile laja.

¹² Naumo wai akashwanamo, na vatwama kuvakakalamo.

¹³ Mambimbo na mishwena vikamena mu mapela mwoshe na mu vinganda, co mukakala vimbanje na makun̄ulu.

¹⁴ Tusitu vakendanganamo, co minzinzime yakujwala ikalisanenamo umo na ukwavo. Cikashama wa vutsiki akaijamo mukushakezeka mutambela wakuhwimina.

¹⁵ Makun̄ulu vakatungilamo mashwa avo, nakusemenamo mavunda, nakutetwilamo vana vavo, nakuvalelelamo lalo. Makuvi vakakungulukilamo.

¹⁶ Shakezekeni mu livulu lya Shukulu Kalunga lya vikashama vakuyoya mulave vije vilyendeka. Nacimo cai cuma cakutanga cikajenekamo, co cuma cakutanga nacimo cai cikajeneka kukala na cikwavo. Shukulu Kalunga ikeye nashiki ngeci vifwemo, ikeye vavenya akavikungulwila amo.

¹⁷ Shukulu Kalunga ikeye akaangununa lifuti akati kavo nakwana mutambela walyo ku umo na umo. Vakakalamo myaka yoshe, co likapwa lifuti lyavo ku myaka yoshe.