Isaya 33 - Livulu lya Shukulu Kalunga

Lilombelo lyakukwasa

¹ Vitozi vetu vanavindama! Vanevi nakwenda vungungu, nameme kukwesi umo navevila nambe kuvenda vungungu. Oloni simbu yavo yakwiva nakwenda vungungu ikahwa, co navo lao vakavevila nakuvenda vungungu.

² Shukulu Kalunga, tuzivileko mema ku mbunge. Tunaka cinyangavili cetu muli yove. Tunyunge a litangwa na litangwa nakutwamena mu simbu ya tuyando.

³ Omo utulwila, miyati ya vanu vatewa muyoyo wa nzita yove.

⁴ Vufuko vwavo vakavupukula vwasi-vwasi nakuvwambata.

⁵ Shukulu Kalunga wapwa wakama! Ikeye wakala mu melu. Akashulisa Yelusalema na vushunga na kulongwa,

⁶ co akakolesa miyati ya vanu. Simbu yoshe akanyunga vanu vendi nakuvana mana nakuzivisisa. Vufuko vwavo vwakama manene vukapwa kasingimiko kuli Shukulu Kalunga.

⁷ Mashwalale vakusimpa valinakutambeka ngeci vavakwase. Miluwa vaje vashakele kunena kwoloka ololo valinakulila manene.

⁸ Vitapalo vyakama ololo vili na vushonde, co naumo wai alinakwendelamo. Lizivasano na cikumiiyo vinahu. Kukwesi lalo kalemeso ku munu uje anyunga cikulaeso.

⁹ Lifuti lyasala ngoco mupulungwa. Shwata ya Lembanone yajujwama, na Cana ca Shalone ca vwilo cinalifu ngwe mambo, shwata ya Mbashane na Munkinda wa Kalemele maputa alinakutotomoka ku miti.

Shukulu Kalunga anangula vitozi vendi

¹⁰ Shukulu Kalunga alinakwendeka ku miyati ya vanu ngwendi, “Ololo njipanga. Njikamwesa ayapwa nzili yange.

¹¹ Mulinakutumba matumbe angoco na vyuma vyoshe mulinakulinga kuvyesi na seo. Munzinzime wange unapu ngwe tuhya tuje tukaminyongesa.

¹² Mukatsenozola ngwe mamanya venyeka mukulinga memba, ngwe mambimbo enya kupwa lito.

¹³ Vanu voshe vali muyehi nambe kulyala vazive vije vinjinalingi nakuzivisisa nzili yange.”

¹⁴ Vanu vaka-vuvi vaka-Siyone valinakulijajela na lyova. Vendeka ngwavo, “Kusompa kwa Njambi kunapu ngwe tuhya tuje kutwesi kuzima. Kuma ali yetu kuli umo akasalao a tuhya twakufwa ngacije ndi?”

¹⁵ Mukasalao nga mwendeka nakulinga vije vya vushunga. Kesi mupangese nzili yeni na kunyanyamena tuutu, co kesi mutambule lizika-kanwa. Kesi mulipandakane na vaje vatumba matumbe akutsiya nambe kulinga vyuma vya vuvi.

¹⁶ Asinoni mukakala mwamuvwa, ngwe muli mu cimpaka cakukola. Mukakala na vyakulya na mema akunwa.

Vumpau vwa kulutwe

¹⁷ Mesho eni akamona vumpau vwa mwene, akamona lifuti mukujanjavala kwalyo kwoshe.

¹⁸ Mukalihula yeni vavenya ngweni, “Vali kulijo vamyata vaje vatujujwisile nakutufwetesa lisimu lyakama?”

¹⁹ Kumukamono lalo vaka-kwija va kulyalesa vaje vendekele muyati uje kumwasele kuzivisisa.

²⁰ Kengeni Siyone, nganda ije mutukalingila viwano vyetu vya vuNjambi. Kengeni Yelusalema! Ukapwa mutambela wauvwa kuli vaje vakakalamo! Ukapwa ngwe mbalaka ije kuvesi kushwenyesa na vipampalingo vyayo kuvyesi kushimbuka, na mukole wayo kuwesi kushutuka.

²¹ Shukulu Kalunga akatumwesa vumpau vwendi. Co tukakala ku ngenge ya vindonga vyakama na vana va vindonga vyavindondo, oloni mato a vitozi kuwakasa kujavukamo.

²² Shukulu Kalunga wapwa lyaako lyetu na mwene yetu, akatunyungu mwamuvwa.

²³ Oloni lifuti lyeni linapu vwato vwakama vuje mikole yavwo inazeye, co nanga ije ikavwendesa na lihunzi kuyasa kushangumuka ngeci vwato vwende. Litangwa limo nameme yeni vilema mukambata vyuma vyakupukula ku vitozi veni.

²⁴ Naumo wai lalo uje akayoyela mu lifuti lyetu akalinyenga a kuvinja, co vuvi vwoshe vakavusambesa.