Isaya 30 - Livulu lya Shukulu Kalunga

Lizivasano lyangoco na Ingito

¹ Shukulu Kalunga nendeka ngwendi, “Ngongo yavo vaje valinakushwana mu Yunda, omwo vananjitengulukila nakunjilwisa. Valinakukava matumbe aje kunjalingile, valinga lizivasano kesi lya ku cizango cange, co valinakutwalao kulinga vuvi.

² Vakai ku Ingito mukulomba vukwasi kujeneka kwihula kunangula kwange. Vashaka Ingito ivanyunge, co vaaka kukulaela kwavo muli mwene wa Ingito.

³ Oloni mwene wa Ingito kakakala na nzili yakuvakwasa, co kunyunga kwa Ingito kukahwila mu vukalu.

⁴ Nameme vaka-kuvemanena vavo va lifuti vaneja laja mu vinganda vya Ingito vya Zoane na Hanese,

⁵ vanu va mu Yunda vakaziva shwamwa omwo vakulaelele muyati kuwesi na seo, muyati uje ukonwa kuvakwasa.”

⁶ Eli likelyo lijwi lya Njambi a tusitu va mu mambo ya mu mbwela ngwendi, “Vaka-kwimanena va lifuti vaketi mukati ka lifuti lya vushonde, muje mwakala vindumba, na manyoka va vushungu, na vyanza-ngombe vakupulula. Vakambata vwana vwa seo yakama a vimulu vavo na a tumelo kutwala ku muyati uje kuwasa kuvakwasa.

⁷ Ingito kuyasa kumikwasa, omu mukemwo njashendumuna Ingito ngwange, ‘Candza-ngombe Wa Vushungu.’ ”

Vanu vaka-kujeneka kwononoka

⁸ Njambi wanjilekele kusoneka mu livulu majwi endi kuli vanu, ngeci kukakale visoneka vya ku myaka yoshe vya a vuvi vwavo.

⁹ Simbu yoshe valinakutengulukila Njambi, simbu yoshe vapwa vaka-makuli, simbu yoshe vakavyana kutolilila ku vilongesa vya Shukulu Kalunga.

¹⁰ Vendeka kuli vaka-kwimanena ngeci voloke kuluu ngwavo, “Kesi mutuleke vya vushunga. Tulekeni lika vyuma vyavivwa. Ambululeni lika vya makuli.

¹¹ Kesi mutuleke vije vyanendeka Njambi. Kutushaka kuziva vya Njambi wakujela wa Isalele.”

¹² Oloni Njambi wakujela wa Isalele nendeka ngwendi, “Mulinakulimbulula vije vinjimileka, co munakulaela a muuka na makuli.

¹³ Ngecivene, mulonga weni unapu ngwe civumbe cacilaja cije cili na mwanzi wakutunda kwilu nakweta kwisi, co vwasi-vwasi ciwila asi.

¹⁴ Mukatsa ngwe mwikatsi ndeo ya vuma, nakujeneka kuwanao citambi cakulawila manungu a tuhya, nambe cakutekwisa mema mu lisima.”

¹⁵ Shukulu Kalunga wa Akamwa ya Vyoshe, Njambi Wakujela wa Isalele, nendeka kuli vanu ngwendi, “Mukutenguluka namukuhwima mukemwo mumukawana mwonyo, co mu kwoloka namukukulaela mukemwo mumukawana nzili.

¹⁶ Oloni mutumba vutumbe vwakutewa kuli vitozi veni akulonda a tuvalu twa lumbisi. Mwamuvwa kuli yeni kutewa! Munayongola ngweni tuvalu tweni vali na lumbisi, oloni tuvalu twa vaje valinakumisheka vali na lumbisi kutuvakana.

¹⁷ Vanu vakupwa 1,000 vakatewa omo vakamona citozi wa lishwalale umo, co mashwalale vatanu vasa kumisheka yeni voshe. Nacimo cai ca nzita yeni cikasalao kuvanga citi ca pandelo lika cije cikasala akamwa ya lilundu.

¹⁸ Ngecivene, Shukulu Kalunga namivandamena ngeci amizivileko mema ku mbunge. Ikeye alinakumizivila ngozi omwo simbu yoshe akalingi vya vushunga. Vanavezika vaje vakulaela muli Shukulu Kalunga.”

Njambi akavezikisa vanu vendi

¹⁹ Yeni vanu va mu Yelusalema, kumukalili lalo embwe. Shukulu Kalunga akamizivila mema ku mbunge, omo mulilila kuli ikeye ngeci amikwase, co akaija kuli yeni.

²⁰ Shukulu Kalunga akamiitisa mu visimbu vyavikalu, oloni ikeye vavenya akakalako mukumilongesa, co kumukamushakezeka lalo embwe.

²¹ Nga mutengulukila ku cilyo nambe ku cimoshwe, co mukaziva lijwi lyendi ngwalyo, “Ngila eyi yenimo.”

²² Mukambata tumponya tweni twakufwika na siliva, na tumponya tweni twakufwika na ngolinde, mukatumbila kuti ngwe mazilo, co mukatambeka ngweni, “Tundeni kuli yetu!”

²³ Omo mukuva vimbuto vyeni, Shukulu Kalunga akanyokesa nyonzi yakuvikulisa, co mukateja vimbuto vyavingi, vimuna vyeni vakakala na mwila waungi.

²⁴ Vingombe vakulima na vimulu vakulima mahya eni vakalya mwila wauvwa.

²⁵ A litangwa lije omo vimpaka vya vitozi vyeni vanavifungulula nakutsiya vanu vamwo, co ku munkinda woshe na ku lilundu lyoshe kukaita vana va vindonga.

²⁶ Ngonde ikatwa ceke ngwe litangwa, co ceke ca litangwa cikatuvakana kuvyazima visimbu vitanu na vivali ngwe ceke ca matangwa atanu na avali ku litangwa olyo omo Shukulu Kalunga akakuta vimbandu vya vanu vendi, nakukangwisa mikiki ije yavapupile.

Njambi akahisa Asilya

²⁷ Nzili ya Shukulu Kalunga na vumpau vwendi wasa kuvimwena alyala. Tuhya na vwisi vimwesa vukalu vwendi. Ikeye endeka, co majwi endi ashukuma ngwe tuhya.

²⁸ Ikeye akatumu lihunzi kulutwe lwendi, co lipwa ngwe livazi lije lisindumwina vyuma vyoshe kulyala. Likakombo mafuti nakuwanyongesa nakumanesa matumbe avo amavi.

²⁹ Oloni yeni, vanu va Njambi, mukavwaelela nakwimba ngwe mumukalingi ku vutsiki vwa ciwano cakujela. Mukavwaelela ngwe vaje vaya na vimbendo mu ngila yavo yakuya ku Njuvo ya Shukulu Kalunga, muka-kwamena wa Isalele.

³⁰ Munu woshe akaziva lijwi lyakukomokesa lya Shukulu Kalunga, nakuziva nzili ya vukalu vwendi. Co kukakala milangi ya tuhya, na kankumba, na nyonzi ya mamanya, na mita yakama.

³¹ VaAsilya vakajaja omo vakaziva lijwi lya Shukulu Kalunga, co akavapupa na mulamu wendi.

³² Omo Shukulu Kalunga akavapupa lalo lalo, co vanu vendi vakatwalao kwimba vingoma na tulyalya. Njambi vavenya akalwisa vaAsilya.

³³ Simbu yalaja vavwaeselele cimweja mutambela wa tuhya twakama tuje vakenyeka natwo mwene wa Asilya. Mwela wa tuhya unapu wa kulova, nakujanjavala, valundikako mutumbo wa vitale waulaja. Shukulu Kalunga akashokwelao muku wa tuhya ngwe ndonga ya milangi kwenyeka uje mutumbo.