Isaya 3 - Livulu lya Shukulu Kalunga

Shukulu Kalunga akasompesa Yelusalema na Yunda

¹ Shukulu Kalunga, Muka-nzili yoshe, natundisa vyuma vyoshe na vanu voshe vaje vavakulaela mu Yelusalema na mu Yunda. Ikeye akavanyeka vyakulya vyavo na mema avo,

² na vingenyenye vavo, na mashwalale vavo na maako vavo, na vaka-kwimanena vavo, na vaka-kutaa vavo, na vamyata vavo,

³ na vamyata va nzita, na vaka-kunangula, na vaka-kushwana, na voshe vaje vaka-kupangesa manseno akulukiya vyuma vya kulutwe.

⁴ Shukulu Kalunga akatava vanu ngeci vavashwane ku vanike.

⁵ Co vanu vakakala na muuka ku umo na mukwavo. Vakwenje kuvakasingimika vakulunu vavo, co vikolokomba kuvakasingimika vantwama vavo embwe.

⁶ Simbu ikaija omo vanu mu cikota cavo vakaangula umo wavo, co vakendeka kuli ikeye ngwavo, “Yove uli na vuzalo, ngecivene, pwa ntwama yetu a simbu eyi ya tuyando.”

⁷ Oloni ikeye akakumbulula ngwendi, “Yange shange! Yange kunjasa kumikwasa. Kunjesi na vyakulya nambe vyakuzala. Kesi munjipwise ntwama yeni embwe!”

⁸ Eyo, Yelusalema inanyongo! Co Yunda inau! Vyuma vyoshe valinakwendeka nevi valinakulinga vilinakulwisa Shukulu Kalunga, valinakushaula Njambi citona-mesho.

⁹ Vilinga vyavo vyavivi vikavelukila vakevo vavenya nakuvalwisa. Vakalingi vuvi citona-mesho ngwe muvalingile vaka-Sondoma. Vananyongo, co vanalikokela vukalu vakevo vavenya.

¹⁰ Vaka-vushunga vakavwaelela, co vyuma vyoshe vikenda mwamuvwa kuli vakevo. Vakavwaelela na vije vivanapangela.

¹¹ Oloni vaka-vuvi vananyongo, muje muvalingile kuli vakwavo mukemwo vakalinga lalo kuli vakevo.

¹² Vaka-kukumwisa vimbongo valinakuyandesa vanu vange, co vaje vavakumwisa valinakuvakwisa. Vanu vange, vantwama veni valinakumyungumwisa, ngeci mujeneke kuzivuka mu ngila ikajo mumunapande kuya.

Shukulu Kalunga asompa vanu vendi

¹³ Shukulu Kalunga nakatuka ngeci asompe vanu. Nemana mukusompesa miyati.

¹⁴ Shukulu Kalunga akasompesa vakulunu na vantwama va vanu vendi. Avasompesa ngwendi, “Munapukula mikolovozi ya vushuka vwa vinyu, co mu vinjuvo vyeni munashulu na vyuma vimunambata ku tuutu.

¹⁵ Kumwesi na moko yakuyandesa vanu vange nakwambata vya tuutu. Yange Kalunga wa Akamwa ya Vyoshe Muka-nzili yoshe njinendekamo.”

Kunangula vanakazi va mu Yelusalema

¹⁶ Shukulu Kalunga nendeka ngwendi, “Kengeni kulyalesa kwa vanakazi va mu Yelusalema! Venda nakukezima na tumanambo twatundondo, oku makai a ku mendi avo oya ca, ca.

¹⁷ Oloni njikavahisa, njikakongovola mitwe yavo nakuyipwisa ya mandya!”

¹⁸ Litangwa lilinakwija omo Shukulu Kalunga akanyeka vanakazi va mu Yelusalema vyuma vyoshe vije vivalinakulyalesela navyo manene, vyakuzala vya senga vije vili ku tusendengele twavo, na ku mitwe yavo, na ku mikoshi yavo,

¹⁹ na ku mavoko avo. Akatundisa vinanga vyavo vya ku mitwe,

²⁰ na vitepa vyavo na mikalo ya vyemba vya manseno vivanazala a mavoko avo na mu vimbunda vyavo,

²¹ na tunzeya tuje vanazala ku milavo yavo, na ku majulu avo,

²² na vikoveyo vyavo vyoshe vyavivwa vyavilaja mavoko, na vuzalo vwa vulaja, na tuzaku, na mapakumuna,

²³ na vuzalo vwavo vwakupepuka, na vinanga vyavo vya linyu vya ku mavoko, na vinanga vyakuzenga mu mikoshi, na malesu a ku mitwe yavo.

²⁴ Mu mwela wa mazi akunika lwengo lwaluvwa, mukakala mazi akunika mwamuvi. Mu mwela wa miva yaivwa, vakazalelamo mikole yakuvola. Mitwe yavo kuyikakala na vin̄ambu vyavivwa, ikakala na mandya. Kuvakakala na vuzalo vwavuvwa, vakazala vuzalo vwakutavozoka. Vuvwa vwavo vukemuka shwamwa!

²⁵ Vanalume va mu Yelusalema, eyo, nameme vanalume va nzili yakama, vakavatsiila mu nzita.

²⁶ Co vikolo vya nganda vikalinyenga nakulila ngwe vanu, co nganda nayo ikapwa ngwe munakazi natumbama asi mushelengwa.