Isaya 29 - Livulu lya Shukulu Kalunga

Luvinda lwa Yelusalema

¹ Mutula wa Njambi, ukewo Yelusalema vene, unanyongo! Nganda muje mwashimbikile Ndaviti cilombo inanyongo! Nganda eyi ilisambe na viwano vyamwo mwaka na mwaka,

² co Njambi akanena tuyando a nganda eyi ivatumbula “Mutula wa Njambi.” Co kukakala kulila nakuulula, nganda yoshe ikapwa ngwe mutula wakufwika na maninga.

³ Njambi akalwisa nganda, nakuyizengeleka, nakuyivandamena.

⁴ Yelusalema ikapwa ngwe ndumba ya munu ali na kwendeka oku ali mwisi ya livu, na lijwi lyakuyeveta kutundilila mu livu.

⁵ Yelusalema vitozi vove voshe vaje vakulwisile vakapekumuka ngwe likungu, na mbunga ya mashwalale vavo vakujujwisa vakavapekumuna ngwe vishati. Vwasi-vwasi, kuzivuka,

⁶ Shukulu Kalunga Muka-nzili yoshe akakupatula na nzili ya lihunzi lyakama na likuna lya tuhya twa vukalu,

⁷ asinoni mashwalale voshe va miyati vaje valwisile nganda ya mutula wa Njambi, vitwa vyavo vyoshe na vyuma vyavo vyakupangesa, vikahwa ngwe njozi omo vutsiki vunahu.

⁸ Miyati yoshe vaje vakakunguluka nakulwisa Yelusalema vakapwa ngwe munu natsi njala uje alota alinakulya, co omo akasumuka anga ali na njala, nambe ngwe munu natsi lihwila uje alota alinakunwa mema, co omo akasumuka anga ali na lihwila.

Kujeneka kuziva kunangula

⁹ Komokeni nakukasama! Lipwiseni vupuputwa kumona! Pendeni oloni kesi na vinyu! Pelyangeleni oloni kesi na vwala vwakulula!

¹⁰ Shukulu Kalunga namilalesa manene mu tulo. Vaka-kwimanena vakevo mesho a vanu, oloni Njambi nazivalesa mesho avo.

¹¹ Kulumbunuka kwa vimona vyoshe vya vuka-kwimanena kunapu kwakushweka kuli yeni, kunapu ngwe livulu lyakushoka na kasateso. Nga ulitwala ku munu umo uje azivuka kulava nakumwihula ngwove lavamo, co ikeye ngwendi, “kunjasa kulilava omwo vanalishoko na kasateso.”

¹² Nga ulyana ku munu umo uje kazivuka kulava nakumulomba ngeci akulavelelyo, co akakukumbulula ngwendi, “Kunjizivuka kulava.”

¹³ Shukulu Kalunga nendeka ngwendi, “Vanu ava vaija kuyehi nange vanjilemesa lika na tunwa twavo, oloni vimbunge vyavo vili kulyala nange. Kulemesa kwavo kunapu kwa mashiko a vunu.

¹⁴ Ngecivene, kengeni, njikalinga lalo vyuma vyakukomokesa a vanu ava, co njikanyongesa mana a vaje valiyongola ngwavo vali na mana nakuzivuka.”

Kukengelela kulutwe

¹⁵ Ngongo yavo vaje vashwekela Shukulu Kalunga matumbe avo. Vaje valinga vyuma mu vushweke, co valinakuyongola ngwavo naumo wai navamono nambe kuzivuka vije valinakulinga.

¹⁶ Yeni mukatengulula vyuma vyoshe nakuvitwala mweka. Cuma mukajo cili na seo, muka-kushonga vuma indi vuma vukevwo vavenya? Kuma ndeo ya vuma yasa kwendeka kuli uje naishongo ngwayo, “Kesi yove wanjishongele, yove kuuzivukamo kushonga?”

¹⁷ Mu kasimbu kakandondo lika, shwata yakuzika ikapwa lihya lya vushuka, co lihya lya vushuka likapwa shwata.

¹⁸ Omo litangwa lije likaija, tusinda-matwi vakaziva omo vakavalavela majwi a mu livulu, co tupuputwa, vaje vakele mu kazimba-vayeni na mu lisusulungu, vakamona.

¹⁹ Tuutu na vaka-kulikeesa vakajolela muli Shukulu Kalunga, Njambi wakujela wa Isalele.

²⁰ Cikapwa ca mamaneselelo kuli vaje vaka-muuka vaka-kuyeluwisa Njambi. Co muka-vuvi woshe vakamunyongesa.

²¹ Njambi akanyongesa vaka-kufweya vakwavo, na vaje vavindika mapwepwe kesi vawane milonga, na vaje vendeka makuli mukuvindika vaka-kulongwa kuwana vushunga.

²² Ngecivene, Shukulu Kalunga, Njambi ya Isalele, uje wapatwile Avilahama mu tuyando, nendeka ngwendi, “Vanu vange, kumukazivi lalo shwamwa.

²³ Omo vana vendi vakamona vije vinjinalingi akati kavo, co vakasingimika lizina lyange, vakanjishangazala nakunjisingimika yange Njambi wakujela wa Isalele.

²⁴ Vaje voshe vanapu vilema vakazivuka mana, na vaje vaka-kulinyenga simbu yoshe vakononoka vilongesa vyange.”