Isaya 28 - Livulu lya Shukulu Kalunga

Kunangula a vumwene vwa ku kunto

¹ Vumwene vwa Isalele vunanyongo! Vumwene vwavwo vulinakuhwa ngwe cilongo ca vishani cili ku mitwe ya vantwama vamwo vaka-kupenda. Mitwe yavo ya kulyalesa vanaivwavesa mwamuvwa mazi akunika lwengo lwaluvwa, oloni vanalala, vanapende vwala.

² Shukulu Kalunga ali na munu uje muka-nzili manene nakutakama nalivwaesela cimweja kuvalwisa, uje akaija ngwe nyonzi ya mamanya, ngwe nyonzi ya lihunzi lyakama, ngwe mema a livazi lya muta wakama, aje ashulisa lifuti lyoshe.

³ Muka-kupenda woshe wa mu Efalime alyalesela a Samaliya, oloni vakainyongesa.

⁴ Vumwene vwa vantwama vaka-kulyalesa vukahwa njwa ngwe vushuka vwakulivanga vwa miti ya mikuyu vavuvuya nakuvulya vwasi-vwasi omo vuhya.

⁵ A litangwa lije Shukulu Kalunga Muka-nzili yoshe akapwa cilongo ca vumpau kuli vanu vendi vaje vanasalao.

⁶ Akana mana a vushunga kuli maako, nakumona ngeci vanu vendi vasa kwamena vinganda vyavo ku vitozi.

Isaya na vaka-kwimanena vakupenda va mu Yunda

⁷ Vaka-kwimanena na vaka-kukombelela vanapende, co valinakutalyangela. Vananu manene vinyu na vwala, vatalyangela nakujeneka kuzivuka vivalinga. Vaka-kwimanena na vaka-kukombelela vanapende manene ngeci vanonwa kuzivisisa vimona vyanavamwesa Njambi, nakusompa mwamuvwa milonga ije ivalinakuvanenela.

⁸ Vimesa vyavo vyoshe vinashulu vishanjo na mazilo, kukwesi mutambela unasalao wai wakwonwa mazilo.

⁹ Valinakulinyenga ali yange ngwavo, “Iyajo yakalongesa mana? Iyajo yakalongesa majwi endi? Vilongesa vyendi vinafwila lika vanike, vaje vanashumuka ku mavele!

¹⁰ Ali nakweseka ku tulongesa lilaka na lilaka, mukana na mukana, cilongesa na cilongesa.”

¹¹ Njambi akendeka na vanu vendi na majwi eka na ndaka ije kumukazivuka mukumilongesa cilongesa.

¹² Namihwimisa muvavoshe nakumyana kwoloka, oloni yeni mwavyanene kumutolilila.

¹³ Ngecivene, ololo Shukulu Kalunga akamilongesa lilaka na lilaka, mukana na mukana, cilongesa na cilongesa. Co mukatanozoka nakuwila kunima. Mukavulumuka na kutsa mu mweto, co vakamipwisa mu vinzinda.

Limanya lya mu mbango lya Siyone

¹⁴ Ngecivene, tolilileni lijwi lya Shukulu Kalunga yeni vaka-kulyalesa mulinakushwana mu Yelusalema.

¹⁵ Kuma munayongola ngweni mwalikwata vusamba na kutsa, co munete akulizivasana na lifuti lya vukalo vwa vatsi? Omwo vikajo mukulaela mu makuli eni ngeci amyamene ku vukalu na ku livazi lyakama?

¹⁶ Ngecivene, Shukulu Kalunga wa Akamwa ya Vyoshe nendeka ngwendi, “Kengeni, njikajala luvula lwakukola mu Siyone. Lukelwo vene limanya lya mu mbango lije vaneseka kupwa lya vushunga, naumo wai uje akulaela mulikelyo ivakazivisa shwamwa.

¹⁷ Vushunga vukapwa seteko ya mukana wa luvula, kasingimiko kakapwa mukole wa lumana.” Nyonzi ya mamanya ikakomba makuli oshe amwajendamena, livazi likanyongesa vuvando vweni.

¹⁸ Cikumiiyo mwalikumiiye na kutsa cikahwa, co lizivasano mwalizivasanene na lifuti lya vukalo vwa vatsi vakalitundisa. Co vukalu vwa mankimba akungwanjanga akamikupula.

¹⁹ Mutondo na mutondo, mutanya na vutsiki livazi lyakujujwisa likamyungumuna. Co lijwi limo na limo lyakutunda kuli Njambi likaminenela lyova!

²⁰ Mukapwa ngwe munu uje vasoneka mu livulu lya visimo, munu uje wesekele kulala a vulili vwavwihi oloni wonwene kutandavala, na lipai lyendi lalo lyapwile lyalindondo ngeci kasele kulishetula.

²¹ Shukulu Kalunga akalwa ngwe mwalwile a Munkinda wa Pelazime na mu Cimbongo ca Ngimbiyone, oloni a simbu eyi Shukulu Kalunga akalinga cuma cakukomokesa, kesi ngwe muje mumunayongola yeni embwe.

²² Ngecivene, kesi mushendumune, kutewa mukakala mu vukalu vwakama manene kutuvakana kunima. Njinazivi vutumbe vwa Shukulu Kalunga Muka-nzili yoshe vwakunyongesa kaye koshe.

Mana a Njambi

²³ Tolilileni vije njili na kwendeka, co akeni vimbunge ku vije vinjimileka.

²⁴ Kukwesi ndimi alima ngoco mahya endi kujeneka kukunamo.

²⁵ Omo napupulula laja masinde, co akuna vimbuto vya vindungu, na ndile, na kumine. Akuna tiliku na mbale ya maumwa mu mikana, co ku shongo ya mahya endi akunako vimbuto vyeka lalo.

²⁶ Azivuka kupanga vipangi vyendi, omwo Njambi ikeye wamulongeselevyo.

²⁷ Ndimi kesi kupangesa mbweti yakulema akupupa ndile nambe kumine, oloni akapangesa viti vyavyehu vyamweseko.

²⁸ Ndimi kesi kuviisa tiliku akuyipupa-pupa, oloni azivuka muje muvakaijungwila omo etisao livalo lya litemba kutsena vinona.

²⁹ Mana oshe awa atunda kuli Shukulu Kalunga Muka nzili yoshe. Matumbe oshe akalingi Njambi apwa akushungama, co simbu yoshe apwa amavwa.