Isaya 27 - Livulu lya Shukulu Kalunga

¹ A litangwa lije Shukulu Kalunga na moko yendi ya mukwale ya nzili yakama manene akanyanyamesa Levyatane linyoka wa lumbisi, wakulizenga-zenga, co akatsiya cikashama uje wakala mu mema a kalunga.

² A litangwa lije Shukulu Kalunga akendeka ku citungu cendi ca vwilo ca mikolovozi ya vushuka vwa vinyu ngwendi,

³ “Njicinyunga nakutukumwinamo mema simbu yoshe. Njikacinyunga vutsiki na mutanya ngeci kesi vaciviise.

⁴ Kunjikaluvala lalo na citungu ca mikolovozi ya vushuka vwa vinyu. Oloni nga mambimbo na mishwena vikamenamo, co njikacenyeka coshe njwa.

⁵ Oloni nga vitozi va vanu vange vashaka ngeci njivanyunge, veceleni valizivasane nange, co vakakala mu kwoloka.”

⁶ A matangwa aje akaijako, vanu va Isalele, vatekulwila va Yakomba, vakamena mizi, co vakashamwina vishani nakujovelela. Co kaye kakashula na vushuka vuje vukatunda kuli vakevo.

⁷ Shukulu Kalunga kahisile manene Isalele ngwe muje mwahisile vitozi vavo, nambe kuvatsiya manene ngwe muje mwatsiile vitozi vavo embwe.

⁸ Shukulu Kalunga wahisile vanu vendi akuvatuma ku vunzinda. Wavashekele na lihunzi lyakushaluka lya mu ngangela.

⁹ Oloni vuvi vwa Isalele vakavusambesa lika omo mamanya a mitula ya vaka-kujeneka kukulaela vakaatwa ngwe memba, co kukukakala lalo mitula ya insense nambe vimweso vya Ashela njambi wa munakazi.

¹⁰ Nganda ya cimpaka ikasala mu ngundu. Ikasala ayo lika ngwe mu mambo mwakujeneka vyuma. Ikapwa vulilo vwa vingombe, muje muvakavutama nakulilamo.

¹¹ Omo minango ya miti ijujwama nakupokozoka, co vanakazi vaikungulula nakuyipwisa vitale. Oloni vanu vavo vapwa vikolokomba ngeci Njambi uje wavatangele kakavazivila mema ku mbunge nambe kuvazivilako ngozi.

¹² A litangwa lije, kutunda ku Ndonga ya Yufuleti nakweta ku nginga ya Ingito, Shukulu Kalunga akakungulula vanu vendi umo na umo, ngwe munu aangununa tiliku ku lijungu.

¹³ Omo litangwa likaija, vakaimba lupembo lwakusana vaIsalele vaje vakele mu vunzinda ku Asilya na ku Ingito. Vakaija nakulemesa Shukulu Kalunga mu Yelusalema, a lilundu lyendi lyakujela.