Isaya 26 - Livulu lya Shukulu Kalunga

Njambi akahyanesa vanu vendi

¹ Litangwa lilinakwija omo vanu va mu Yunda vakaimba mwaso ou ngwavo, Nganda yetu yapwa yakukola! Njambi ikeye wanyunga vivumbe vyayo!

² Shokololeni vikolo vya nganda ngeci muyati wa vanu va kulongwa vakovele, muyati wa vanu vaje vaka-kulinga mwa vushunga.

³ Shukulu Kalunga akana kwoloka, kuli vaje vakolesa kukulaela kwavo mbe, vaje vakulaela kuli yove.

⁴ Kulaela kuli Shukulu Kalunga myaka yoshe, akatunyunga simbu yoshe.

⁵ Ikeye nakeesa vaje valyalesele, nanyongesa vinganda vyavo vyakukola muje vayoyelele, nakusiwila vivumbe vyavo asi.

⁶ Vaje vavayandesele valinakwenda akamwa yavyo nakuvilyatangela na mendi avo.

⁷ Shukulu Kalunga, ukavwaesela vaka-vushunga ngila yakushalama ngeci vendelemo.

⁸ Tulinakukavangeya cizango cove nakwaka cinyangavili cetu muli yove, yove lika itushungwiya.

⁹ Mbunge yange ilinakukushaka a simbu ya vutsiki, omwo viyongola vyove vimwesa vanu voshe ano asi muje muvanapande kuyoya mwa vushunga.

¹⁰ Nameme umwesa ngozi kuli vaka-vuvi, kuvesi kulilongesa kulinga vushunga. Nameme mu lifuti muli vaka-vushunga, oloni vaka-vuvi anga vatwalelelao kulinga vuvi, kuvesi kumona vukama vwove.

¹¹ Vitozi vove kuvazivuka ngeci ukavahisa. Shukulu Kalunga, vazivise shwamwa, mwesa cizemo cove kuli yetu, co vombile mu tuhya tuje tuwavwaeselele vitozi vove.

¹² Shukulu Kalunga, ukatwana kuhwima, vyuma vyoshe vije tuwana, yove unatulingilavyo.

¹³ Shukulu Kalunga Njambi yetu, vanakala nakutushwana kuli vanu veka, oloni yetu twononoka lika yove Shukulu Kalunga.

¹⁴ Vaje vitozi vanatsi voshe, vanatsi kuvakasanguka lalo, unavahisa, co vananyongo, naumo wai lalo akavanuka.

¹⁵ Shukulu Kalunga, yove unaamesa muyati wetu, unaamesa vinginga vyoshe vya lifuti lyetu, co eci cinanena ngeci tukusingimike.

¹⁶ Shukulu Kalunga, omo wahisile vanu vove, mu tuyando twavo valombelele kuli yove.

¹⁷ Ngecivene, yove Shukulu Kalunga, twafwile ngwe munakazi uje akemanga akukita mwana.

¹⁸ Twazivile mushongo nakukemanga, oloni nacimo cai twakitile. Kutwahyanene nzita mu lifuti lyetu, kutwesi na vatekulwila ngeci vakale ano asi.

¹⁹ Vanu vetu vaje vanatsi vakayoya lalo! Mivila yavo ikasangukila lalo ku mwonyo. Voshe vaje vali mu vimbumbo, vakenduka nakwimba nakujolela. Ngwe lime litonolwela asi, ngecivene, Shukulu Kalunga akasangula lalo vanu vaje vatsile laja.

Kusompa nakwilwisa

²⁰ Vanu vange, koveleni mu vinjuvo vyeni, co lishokeyeyenimo. Vandeni kasimbu kakandondo lika, noo vukalu vwa Njambi vunahu.

²¹ Shukulu Kalunga alinakwija kutunda mwilu muje mwakala mukuhisa vanu va ano asi omwo a vuvi vwavo. Kulitsiya kuje kwalingiwile mu vushweke ano asi kukajomboloka, co livu kulikashweke vanu vaje vavatsiile.